الشركة عايزة تديني فيرنا ب 77 الاف !!!

**Ahmod** · 21-01-2013 11:58 PM

السلام عليكم ورحمة الله وبركاته

حاليا شغال في شركة ادوية ومعروف نظام شركات الادوية انها لما بيعدي على تاريخ تعيينك 6 شهور

حاجة من 2 ياما بيكون معاك عربية وسعتها بيدولك بدل عربية زيادة حوالي 1000 جنيه شهريا على مرتبك

ولو مش معاك عربية بيجبولك عربية وياما بتكون عربيتك وطول مانت شغال في الشركة قسطها الشركة بتغطيه

ياما بتكون عربية الشركة ولو فضلت في الشركة 5 سنين بعدها تتملك العربية

الشركة اللى انا شغال فيها حاليا نظامهم عشان يدولك بدل عربية في حالة لو معاك عربية لازم عربيتك تكون موديل 2011

طبعا انا عربيتي موديل 2007 فمش هينفع اخد عليها اي فلوس

اتكلمت مع ال HR في الشركة قالتلي لازم نجبلك عربية زيرو وهتبقى بتاعتك وباسمك وطول مانت شغال في الشركة قسطها الشركة بتغطيه

طيب كلام جميل وزي الفل !!

الوحش بقى انه اجباري لازم يا فيرنا يا ما لانوس !!! وماينفعش حتى اني اكمل من معايا واجيب فئة اعلى بحيث تفضل قيمة القسط زي ماهي !!

فكرت في الموضوع لقيت اني لو وافقت اني اخد فيرنا لو لاقدر الله حصل اي ظرف ومشيت من الشركة !! مثلا جالك فرصة في مكان افضل او ما الى ذلك !! لان العربية اقساطها تخلص بعد 5 سنين !! فالمدة دي طويلة ولو مشيت

هضطر اني البس اقساط العربية !!! وطبعا عشان العربية تقسيط فهتبقى واقفة عليا الهاف اوبشنز مانويل بحوالي 77 الاف جنيه !! ؟ يعني زيادة 10 الاف جنيه على تمنها عشان الفوايد

لو حتى حبيت ابيع بعد سنة مش هتجبلي 60 الاف على بعض !! ده لو افترضنا انها فضلت بحالتها وفبريكة وماشية كم قليل !! يعني هخسر كتير

حاولت من هنا لهنا مع ال HR مافيش فايدة !! وبتقولي بيع عربيتك واحنا هنديلك عربية احسن منها موديل 2013 زيرو !! طبعا كنت عايز اقولها كلمة قبيحة

قلتلها انتي عايزة تديني فيرنا هاف اوبشن مانويل ب 77 الاف !! ؟ ولو لاقدر الله مشيت من الشركة البس اقساطها ؟؟؟ <<< والله واعلم بعد زيادة الاسعار دي هتبقى عاملة ازاي !! ؟ ده انا بقول 77 الاف ايام ماكانت هي زيرو ب 67 يعني زيادة 10 الاف جنيه فوايد عشان التقسيط !!

المهم عشان ماطولش عليكم هما شرطهم انك يبقى معاك عربية 2011

فانا فكرت اني اجبلي اي عربية موديل 2011 ولتكن حتى ماروتي او جيلي !! ايهما ارخص

وبرخصتها اخد بدل العربية من الشركة واسبها مركونة او حتى استخدمها في مشاوير الشغل الخفيفة وبعد كام شهر ابيعها وابقى استفدت فلوسها وفلوس بدل العربية اللى هفضل اخدها من الشركة !!

انتم ايه رايكم ؟ وياترى ايه ارخص عربية 2011 مستعملة ممكن اجبها ؟

الماروتي هتكون في حدود كام ؟ وهل في ارخص منها ؟

**Sehsss** · 22-01-2013 12:22 AM

فكر كويسة بتاعة الماروتي دي، بس أنا عاوز أبشرك إن الفيرنا الفول أوبشن رفعت من 73 ألفا إلى 77 ونص طبعا دي الكاش

**MARTINDALE** · 22-01-2013 01:57 AM

لاتشتري ولا تبيع .... الشركه دي من تعاملها شكلها شركه لوكال وعمرك ماهتكمل فيها سنتين على بعض .
مشي حالك باي شكل ولو الموضوع هيقفل سيبها خالص وقدم في الشركات المعروفه وبرضوا ماتلبسش عربيه هتضطر بسببها تقعد في الشركه اكتر من 3 سنين لو كنت بتفكر في السفر .
شركات الادويه عارفين كويس هما بيدوك ايه وعارفين كويس هياخدوه منك ازاي , وصدقني العربيات اللي بيتلف فيها في شغل بيطلع $#%&$# اهلها ومبتبقاش نافعه في حاجه ....... اسئلني انا :)

**eng.m7md.ali** · 22-01-2013 01:58 AM

المشاركة الأصلية كتبت بواسطة land_cruiser

طيب ما تشوف لو فى امكانيه عربيه كويسه فعلا و عاجباك موديل 2011 و تبيع عربيتك و تكمل على تمنها و الفلوس كده هترجعلك بالتقسيط بعد كده و تبقى جبت حاجه كويسه و من غير قسط و موديل حديث برضه فتبقى ما خسرتش حاجه

الاقتراح ده احسن الاقتراحات
+111

**S O P H O S** · 22-01-2013 07:19 AM

انت لو بتفكر تغير عربيتك ممكن تبعها وتكمل بثمن الفلوس الي هتتدفعها فالماروتي
وتجيب ياريس 2013 هتشباك مثلا
لو مش عاوز يبقي تجيب ماروتي زي ما فكرت
والله اعلم ..