المعاناه في مرور المعادي والبساتين
مش عارف أبدأ منين ولا أقول ايه .. اللي بيتعمل في وحدة مرور المعادي والبساتين ده مصيبة كبيرة .. وإليكم المعاناه :
أولاً : وحدة المرور لسه جديدة تقريباً بقالها سنة .. وبالتالي مفيش نيابة مرور فيها .. فعشان تطلع شهادة المخالفات لازم تتشحطط في المرور اللي كنت فيه الأول (عين الصيرة) .. وبعدين تكمل إجراءات الترخيص في مرور البساتين .. معقول الكلام ده .. ماشي الحال
ثانياً : لما تروح وحدة المرور (تحت الطريق الدائري في الأتوستراد) حتلاقي الوحدة بصراحة مفيهاش أي تجهيزات لأي حاجة لأن حجمها صغير جداً .. عدد الموظفين المتعاملين مع الجمهور قليل جداً .. مفيش أي مرافق .. مياه .. حمامات (أو فيه وأنا مخدتش بالي) .
ثالثاً : أنا خلصت إجراءات شهادة المخالفات .. ودفعت الضريبة والتأمين في مرور عين الصيرة .. كل ده مش أكتر من نص ساعة .. أما تقديم الورق واستلام الرخصة في مرور البساتين أخد حوالي أربع أو خمس ساعات .. وده أيه بعد المهابرة والمناهدة ..سواء مع موظف الشباك أو مع الناس اللي واقفة ومش عاوزة تلتزم بالطابور .. كل واحد فاكر أن العملية فهلوة .. مع أن الناس لو التزمت حتبقى العملية سهلة وسريعة .. إنما الهرجلة مش حتجيب نتيجة :toot:.
ثالثاً : أنا متعود أني أجدد سنة .. لكن مع المرور ده جدتت الباقي حتى تاريخ الفحص علشان متعذبش كل سنة .
رابعاً : كان فيه ناس أجانب بيطلعوا رخصة .. والله العظيم مقعدوش أكتر من ربع ساعة ومشيوا .. وتقريباً معملوش حاجة .. منظرنا ايه قدام الأجانب ؟!
مفيش حد في المنتدى بيرخص في المرور ده يقدر يفهمني عانى المعاناة دي زيي ولا أنا بس .. !!!!!!!!!!!!