الموضوع: اسف جد اني كنت بنصحكو بالعربية دي

انا اسف جداً لكل الناس اللي نصحتهم يجيبو بروتون

حسبي الله ونعم الوكيل في التوكيل ده .. حسبي الله ونعم الوكيل الف مرة

الحكاية بدأت يوم 8-10-2012 وده كان اخر يوم ليا في الضمان

المهندس مصطفى هو اللي استلم مني العربية واشتكيت من صوت ونة مع لف الطارة خصوصا لو كاسر على الاخر ودايس سنة بنزين هيلاقي صوت ونة واضح جداً + ان في ونة واضحة مع المشي العادي للعربية

المهم العربية دخلت في اليوم ده واتعملها ( كونسولتو ) كامل ولقيت كام مهندس على كام صنايعي واقفين قدامها وفتحين الكابوت

المهم انهم اجمعوا ان دي فعلا طلمبة باور وانها كدة هتتغير في الضمان . طبعا فضلت مستنيها تيجي (بالحجز)

لحد دلوقتي حلو اوي واشكر المهندس مصطفى على كدة

يوم 16-1-2013 عرفيت ان الطلمبة موجودة روحت اركبها واستلم العربية مني المهندس " محمد عبد الهادي "

استلم العربية الساعة 11 وقالي هتخلص على 4 قولت مش مشكلة .. كمان كان في شكوى من صوت تزييق ورا بيبان لما اطلع مطب او انزل منه .. وده اشتكيت منه زمان واتقالي انه مساعد وهيتم تغييره وفعلا اتغير في الضمان ولكن الصوت لسة موجود

على الساعة 2 المهندس المحترم " محمد عبد الهادي " جيه وقالي العربية خلصت وتعالى استلم وجرب .. قولتله ماشي روحت مجرب العربية ولقيتها زي ماهيا كأن مفيش حاجة اتغيرت

قولته الصوت زي ماهو والباور لسة تقيل .. يقولي ده الطبيعي بتاع الواجا وان الصوت ده طبيعي في كل العربيات

طبعا استغربت انه بيقول كدة قولتله ده مش صوت طبيعي وكل اللي جربها اجمع ان دي طلمبة باور .. قالي مالطلمبة اتغيرت خلاص والصوت زي ماهو يبقى اكيد العيب من حاجة تانية ..
قولتله طب والحل؟
قالي خليني ارجع الورشة تاني واشوف
المهم رجعلي وقالي على فكرة الطلمبة مكانتش لسة اتغيرت وهنحتاج كمان نغير سير الباور عشان بدأ يشقق .. قولتله اتكل على الله غيره مع اني لسة 52500 كيلو

بعد 10 دقايق بالظبط جيه قالي الطلمبة ركبت خلاص .. استغربت طبعا وقولت " ايه الطلمبة اللي بتتغير في 10 دقايق دي؟ "

كبرت دماغي وجربت العربية لقيتها زي ماهيا محصلش تغيير .. طلبت اني اجرب عربيات تاني وفعلا جربت

جربت جين2 ولقيتها زي الفل ماشاء الله .. جربت بيرسونا جديدة بردو لقيتها زي الفل

قولتله يا هندسة الصوت ده مش طبيعي وانا عايز احل المشكلة دي .. قالي احنا غيرنا الطلمبة خلاص يبقى اكيد الصوت ده صوت حاجة تانية

بصراحة اقنعني ويأست من الموضوع ده وطلعنا نجرب الصوت اللي ورا والنتيجة ان العربية عايزة 2 شداد ورا في العجلة اليمين !!!!!!!!!!!!!!!!!!!!!!!

قولتله ازاي عايزة شدادات ؟

قالي جايز مطب

قولتله طب انا اشتكيت من الصوت ده قبل مااخرج من الضمان واتقال ان ده من المساعد

قالي ماهو الشدادات برة الضمان !!!!!

سلمت امري لله وقولته خلينا في الطلمبة دلوقتي .. قالي ده الطبيعي وكل المهندسين جربوها ومعرفش ايه

خدو بالكو من الحتة دي

بالصدفة كان في وفد من ماليزيا بيشوف المشاكل وطريقة الحل وكل ده

قولت للمهندس محمد خليه يجرب العربية ويعرف ايه المشكلة .. قالي اصل...... جاي من سفر وتعبان وكدة وانا اتكسف اطلب طلب زي ده .. قولتله يعني المفرووض مين اللي يحل المشكلة؟ . قالي معلش تعالى يوم تاني يكونو موجودين وهما كدة كدة قاعدين هنا اسبوعين عشان يعرفوا كل المشاكل ويحاولو يحلوها

قولتله يا هندسة ازاي ده وهاجي تاني مخصوص عشان يعرف في ايه؟

قالي العربية كانت خلصانة الساعة 2 والطلمبة راكبة بس احنا غيرنا السير كمان ( شايفين التناقض في الكلام؟ )

قولت في نفسي مفيش مشكلة هروح وهبقا اجي تاني اكون قدرت اظبط معهم عشان يعرفولي العيب من ايه

طبعا لما روحت في اليوم ده وانا متضايق وحكيت لاخويا الكبير على الحوار وجرب العربية ولقاها زي ماهيا قالي مش ممكن يكونو غيروها !!

قولتله ازاي بس والمهندس محمد عبد الهادي راجل محترم ومش هيضحك عليا واكيد فعلا غيرها ( شايفين الثقة العامية؟ )

المهم اخويا جاتله فكرة واتصل بالمخزن وقالهم انا حاجز طلمبة باور بأسم فلان الفلاني ياترى هيا جات ولالا ؟

قاله ايوة جات يا باشا وموجود

اخويا قاله موجودة؟ !!!!!!!!!!!

قاله ايوة ياباشا موجودة

اخويا قاله طيب ممكن تتأكد انها موجودة؟

الراجل قاله ايوة ياباشا متأكد انها موجودة

اخويا قاله على فكرة اخويا الصغير كان عندكم من اسبوع وركبها .. الراجل قاله لا ياباشا لسة موجودة بس خليني اتأكد

وفعلا اتصل بأخويا بعد ربع ساعة قاله الطلمبة اصلا سليمة عشان كدة متغيرتش !!!!!!!!!!!!!!!!!!!!!!!!!!!!!!!!!!!!

اخويا عرف الموضوع ده قاله طب ازاي اخويا يجي وتمشوه من غير ماتتغير؟ وليه اتقال انها اتغيرت ؟

قاله يا فندم انا مقدرش ارد لاني بتاع المخازن والكلام ده .. راح اخويا قافل معاه

طبعا لما عرفت الموضوع وعرفت ان المهندس محمد عبد الهادي هو اللي عمل كدة اتصدمت جامد جداً فيه

واتصدمت وثقتي انعدمت فيه نهائي وانعدمت في التوكيل وكل الناس اللي هناك

وفعلا مينفعش نصاحب ولا نثق في حد من التووكيل الزبالة ده .. بجد اتخدعت فيه

حسبي الله ونعم الوكيل فيهم كلهم ربنا ينتقم منهم

محمد عبد الهادي فاكرني عيل صغير عشان يضحك عليا .. قولولي اعمل ايه معاهم انا دمي محروق بجد

المشاركة الأصلية كتبت بواسطة ahmad--ezzat

عادي الكدب عادي وعدم المسؤليه عادي وعدم احترام العميل عاديه وماركه منيله بنيله عادي وتوكيل زفت عادي

انت ف مصر


وسيبك من الضمان واطلع علي ميكانيكي نضيف بس هتدفع

وربنا معاك

وانت عندك حق في كل حاجة .. العربية مظلومة جداً ده الناس هناك لا يفقهو لشيء .. تخيل كنت بشتكي من " طقة " ورا دخلوني في حوار كاليبر ومعرفش ايه .. مع اني عارف المشكلة فين وحلها سهل بس قولت اشوف هيعرفو يوصلو ولالا .. وفي الاخر غيرت مسمار الميزان ورا

المشاركة الأصلية كتبت بواسطة s o p h o s

معلش يا باشا
عندك حق
لكن عربيات بروتون الي ظلمها التوكيل بجد
وده كفيل يقتل اي عربية لكن علشان هي عربيات كويسة
لسه مازالت ماسكه نفسها
وان شاء الله مشكلتك تتحل ..

ياارب .. انا املي بعد ربنا سبحانه وتعالى في المهندس امر لاني عارف انه راجل محترم .. وانا قررت اروح اقدم شكوى في المهندس محمد عبد الهادي على استخفافه بالعميل " اللي هو انا "

المشاركة الأصلية كتبت بواسطة mohamed osama

سيبها على الله وقول يارب

وربنا هايكرمك ان شاء الله

امين يارب .. اشكرك على مرورك الكريم

المشاركة الأصلية كتبت بواسطة algazar2

انا لو منك بعد الحركة دى هطلع على التوكيل و اقابل الوفد الماليزى الى موجود و تشتكيلهم و تخليهم يشوفوا اوردر الحجز بتاع الطلمبة و انها ما اتغيرتش و الى حصل كله

حتى لو مغيرولكش الطلمبة انت كده هتبقى وضحت عيوب التوكيل قدام الناس الى جاية تتابعه من بره و ان شاء الله يغيرولك الطلمبة

انا فعلا بفكر في كدة .. واخويا دمه محروق وقالي تعالى نعمل كدة او ندخل للمهندس امر علطول

المشاركة الأصلية كتبت بواسطة hesham ahmed

سوري في اللفظ ... شرشحلهم ( اتبع اسلوب الصوت العالي ) و مش همشي غير لما تتحل و حمايه المستهلك و الضمان و هبعت للشركه الام و عايز المدير و كده
و الكلام دا بيجيب مع الناس دي اوي ... عن تجربه يعني
بس تكون عامل حسابك انك مش هتسيب حقك .... عشان دا حقك انك تغير الطرمبه ...عشان دي مش هتلاقيها رخيصه اصلا

هيحصل والله ياباشا وفعلا مش هسيب حقي

المشاركة الأصلية كتبت بواسطة ahmed_h_g

أبعتلى أسمك بالكامل أو أسم مالك السيارة ورقم الموتور ورقم الشاسيه وربنا يسهل يمكن أقدر أفيدك وربنا يعينك

حاضر يا بشمهندس هبعته بس انا جربت ابعت لحضرتك قبل كدة والرسايل مبتوصلش .. اعتقد في مشكلة في الانبوكس عندك