المشاركة الأصلية كتبت بواسطة hosam_optrawy
هحاول ابسطلك الحسبه بس ركز معايا :)
اولا لازم ان شاء الله لما تشترى طبعا تبقى المالك الأول وشاريها فى نفس سنة الموديل ويبقى معاك الفاتورة وتصدق عليها من الجهات الرسمية ( معرفش ايه هى الجهات دى بالظبط ) , المهم نفترض مثلا ان سعر العربيه 60 الف ريال
بعد كدا يتضاف اليها قيمة الشحن اللى هى النولون + التأمين + التفريغ ( برضه معرفش ايه النولون دا ) , هانفترض ان الشحن هايكلفك 5 الاف ريال
يبقى الاجمالى 65 الف ريال , تحولهم لجنيه مصرى يبقى هو دا سعر العربيه اللى هايحسبولك عليه الجمرك
الجمرك بيبقى 40 % ضريبة وارد + 15 % ضريبة مبيعات + 3 % رسم تنمية , وبيتحسبوا بشكل تراكمى عشان كدا بيعدوا ال 60 % لكن لو حسبناهم لوحدهم هايبقوا 58%
يعنى لو افترضنا مثلا تمن العربيه 100 الف جنيه
يبقى 40 % بتاعت ال 100 الف = 40 الف
15 % بتاعت ال 140 الف = 21 الف
3 % بتاعت ال 161 الف = 4830
الاجمالى 66 الف او 66 % من تمن العربيه
خصم الإستعمال بيكون 10 % لأول سنه على ضريبة الوارد فقط اللى هى ال 40 % مش على كل الإجمالى , وكل سنة بعدها 5 % لحد ماتوصل ل 50 % خصم , يعنى ال 40 % اللى فى الاول بعد اول سنة يبقى 36 % وبعد 9 سنين او اكتر يبقوا 20 % , وفى كل الاحوال هاتضيف عليهم ال 15 % وال 3 % دول مابيتغيروش ولا بيقلوا
حاجه اخيره عربيتك معليهاش الخصم بتاع الاوروبى ولا حتى التركى لانها جاية من كوريا
اتمنى انك ماتكونش توهت منى واسف على الاطاله :)