الموضوع: أين مدارس المرور لتعليم القيادة

بص ياسيدي مدرسة المرور اللي تبع محافظة الجيزة دي مكانها في الدقي في شارع بين السرايات قريب من جامعة القاهرة عند محلات الاكل اللي هناك الشارع الجانبي اللي على ناصيته مؤمن والشبراوي كوكرز وفي محلات كتير اوي كده هاتعرفه لوحدك يعني اسإل عن مدرسة المرور معروفة هناك.
اما اللي تبع مرور القاهرة دي مكانها في مجمع التحرير نفسه
ودول عشان تروح تسأل من الساعة 1 ظهرا حتي الساعة 2 (مش عارفة ايه الناس اللي شغلها لمدة ساعة واحدة فقط دي) ومواعيد الكورس نفسه يوم من 3 عصرا لحد 5 مساءاً ويوم من 5 مساءاً لحد 8 مساءاً (يعني يوم كده ويم كده عشان النظري والعملي يعني) ومدة الكورس تقريبا شهر او شهر وشوية مش فاكرة بالضبط والورق المطلوب تجيب صورة بطاقتك وصورتين شخصيتين وتقريبا شهادة التخرج (عموما وانت رايح تقدم خد ورقك كله معاك مش هاتخسر حاجة يعني ) بدل مايرجعوك تاني خصوصا اني زي ماقلتلك بيشتغلوا لمدة ساعة واحدة فقط لاغير( ناس وقتهم من ذهب يعني:biggrinjester:)

والسعر تقريبا 260 جنيه الكلام ده من حوالي 3 شهور مثلا الله اعلم هما كمان غلوا اسعارهم مع البنزين والعلاوة وكده ولا لسة زي ماهما

ملحوظة المواعيد والاسعار المكتوبة فوق دي بالنسبة للمرور اللي تابع للقاهرة اللي هو في مجمع التحرير لكن بتاع الجيزة معرفش عنه حاجة بصراحة غير مكانه

بس في ناس كتير هنا في المنتدي مش بتشكر في المدارس دي وقالوا عنها انك لازم تدفع للي بيعلموك السواقة هناك وترش عشان يساعدوك في الرخصة برده بس عموما انتظر رد باقي الاخوة وهما هايفيدوك
اتمني اكون افدتك ولو بالقليل

انا بتعلم دلوقتي في المرور التابع للقاهرة
ودول تقدم الورق في مجمع التحرير الدور الارضي من الساعة 2 ظهرا لحد الساعة 5 والاوراق المطلوبة هي:صورة البطاقة وصورة شخصية وصورة المؤهل وشهادات طيبة
باطنية ونظر وسمع وفصلية دم
الرسوم155 جنية بالظبط
والتدريب العملي بيكون في عين الصيرة
اما مستوي التعليم بصراحة لحد دلوقتي مش عاجبني والمدربيين عايزة فلوس طول الوقت علشان يعلموك كويس.
بالاضافة انهم بيقولوا انهم هيعلموك الحركات اللي خاصة بامتحان الرخيصة علشان الناس بتروح هناك علشان تاخد الرخيصة بس.
دا بقه غير انهم مش بيعلموا وسط الزحمة يعني هتتعلم في اماكن مافيش ناس وعربيات كتير.