السلام عليكم
الحمد لله ربنا كرمني واشتريت فورد لنكون 2001
طبعا ده في السعودية
دي سعرها والله ارخص من 128 موديل التسعينات في مصر
نيجي بقى للي حصل معايا وانا بشتري العربية دي
انا حاليا مقيم بمنطقة جيزان ولي احد اقربائي مقيم بالرياض (المسافة 1400 كيلو متر) وهو بيشتغل في التشليح (يعني بيشتري العربيات المصدومة وبيرجع يبيعها قطع غيار)
قلتله اني عايز اشتري عربية وساعدني علشان مايضحكش علي من التجار ومش هعرف اكشف عليها قالي ماشي
رجع كلمني وقالي في واحد شريطي مصري (شريطي يعني تاجر سيارات مستعمل) معاه عربية نفس طلبك وعلى كلام التاجر ده ان العربية زي الفل وقالي انه لسه ما اتفرجش عليها بس هو واثق في كلام التاجر ده
المهم قلتله ماشي انا جايلك وسيبت مراتي وابني لوحدهم وسافرت خدت 18 ساعة في الطريق
وصلت على الظهر واتصلنا بالتاجر قال انه مشغول ومش هيعرف ييجي رغم انه عارف اني جاي
قلت مش مهم نروح الحراج (سوق المستعمل) وقعدنا نتفرج كتير وفي الاخر معجبناش حاجة
وعدى اول يوم
تاني يوم لقيت التاجر بيتصل انا جايلكم علشان تشوفوا العربية
بصراحة العربية عجبتني جدا لكن كان فيها شوية مشاكل
لمبة الفرامل وال ABS شغالة قالي ده علشان التيل الخلفي هغيرهولك على حسابي واخرط الطنابير
وارشلك الاكصدامات هدية على حسابي (لم يتم ورجع طلب فلوس ويوم زيادة علشان يرشهم )
وهغيرك الكاوتش بالكامل من عربية تانية تبعة لسه مشتريها (لم يتم ايضا)
وعداد السرعة مش شغال قالي اصلها كانت مع طبيب وراح غير زيت الفتيس والعامل مربطش سلك السرعة كويس
طبعا كل ده كذب واكتشفت السبب بعد كده وهقولكم عليه
والاكصدام الامامي كان عايز يتربط لانه مريح لتحت شوية وده عمله
وراح قالي خد العربية معاك اسبوع بحاله جربها وابقى ادفع فلوسها وان الراجل قريبي ده حبيبي وكلام من ده
خدت كلامه ثقة ورحت المعارض علشان ننقل الملكية (النظام في السعودية انك بتروح لاي معرض ويتكتب العقد عنده والمشتري يدفع الفلوس بالكامل للمعرض والبائع يسيب العربية مرهونة في المعرض وبعد كده يرحو تاني يوم بعد العصر المشتري يستلم الرخصة والعربية والبائع يستلم فلوسه كاملة) ودفعت عربون
كلمناه تاني يوم الصبح قال انه غير تيل الفرامل واللمبات زي ماهي بس الميكانيكي بيقول تمشي شوية والمبات هتطفي لوحدها وانه نسي يصلح عداد السرعة قلتله ماينفعش لازم يتصلح لاني همشي على طريق سفر وفيه رادارات كتير قالي طيب
جيت اكلمه على الظهر قالي هنام شوية واصحى اخلصهالك قالي بعد المغرب روح المعرض استلم عربيتك وهتلاقيها زي ما انت عايز
رحت استلم العربية ملقتش اي حاجة اتعملت والتاجر قلب وشه علينا واتخانق معر قريبي جامد في التليفون وقريبي قالي كل الفلوس اللي انت دفعتها هجيبهالك دلوقتي حالا واعملي بس مبايعة بالعربية وانا هتصرف معاه قتله لا خلاص مش مستاهلة طبعا هو حاسس بالذنب انه ورطني مع تاجر نصاب زي ده
المهم اصريب واستلمت العربية ويادوب لحق ورشة فاتحة رحت كشفت عليها قالي خبر صادم ان سبب المشكلة دي كلها هو جهاز ABS عطلان ولازم يتعير وان عداد السرعة في الامريكاني مش زي الكوري والياباني مش بيقرأ السرعة من ترس السرعة اللي على زيت الفتيس
طبعا كانت صدمة كبيرة اني لازم اقعد يوم ثالث علشان اصلح العربية
والحمد لله ربنا كرمني وصلحتها وغيرت الكاوتش بمستعمل (ما انصحش اي حد يعمل كده لانهم باظو على طول واتبدست في شراء جديد برضه)
ورجعت بيها تاني لجيزان انا اللي سايقها وكانت اطول رحلة في حياتي اخدها بالعربية وانا سايق لوحدي
عايز اعرف ليه الناس بتعمل كده رغم اني والله بعد لما اتفقت على السعر قلتله في مني مساهمة معاك 500 ريال في التصليحات المطلوبة وخدهم لانهم للاسف اتسجلوا في العقد ومعملش اي حاجة من المتفق عليها
وحسبي الله ونعم الوكيل
طولت عليكم بس حبيت احكي احنا ليه مكروهين بره علشان بنعمل في بعض كده امال في الغرب هنعمل ايه
كان نفسي نكون زي الشعب السوداني في الغربة والله تحسهم كلهم شخص واحد
المفضلات