الموضوع: حكايتي مع بنزين 80

السلام عليكم ورحمه الله وبركاته
امبارح كنت في رحله سفاري (اللي هي البحث عن البنزين ) وحصل اللي ححكيهولكم ده
الساعه 11 ونص بالليل قولت اطلع اتمشي شويه بالعربيه وقولت بالمره امون العربيه (اللمبه كانت بتنور علي المطبات شديده الانحدار)
اتصلت بواحد صاحبي كنت شايل عنده جركن كبير علشان قدامه بنزينه وهو عامل واجبات كتير معاهم قولتله ايه الكلام الجركن اخباره ايه
قالي للاسف المحطه بقالها 5 ايام مش بينزل فيها 80 قولتله ليه
قالي الحكومه منعته علشان السيوله المروريه من محطات وسط البلد قولتله يعني القرار ده ملهوش علاقه بالجركن (قولت يمكن علشان المنطقه سياحيه شكل الجيركن معجبهمش واجيبلهم كولمان كبير بداله )قالي لا دا تقريبا اتمنع من بنزينات وسط البلد قولتله والمدموع ماليه عيني وماله ياعم شوفلنا بيعه للجيركن بقي
واتوكلت علي الله ودورت العربيه وقولت اتفسح واتنقل وسط محطات البنزين
(كنت فاضي وعندي حاله ملل )
روحت اول بنزينتين لقيت مفيش طبعا
لقيت بنزينه من بعيد عليها طابور صغير (10عربيات بس) لما دخلت ملقيتش 80
برجع بضهري خبطت في سواق تاكسي فهلوي كان بيلف علشان شاف برضه نفس الطابور شرخلي الفانوس اللي ورا وطبقتله نص الرفر اللي قدام
قولت وماله اللي ييجي في الحديد مش مهم المهم انا سليم
طلعت ناحيه المرور واخيراااااااااااااااا لقيت بنزينه فيها 80
بس فيه مشكله صغيره
الطابور طالع من البنزينه ومعدي من جنب توكيل لادا وداخل جنب سور منطقه عسكريه ودا كل اللي شوفته علشان الباقي واقفين في الضلمه جوه ومش شايفهم
اتكلت علي الله وقولت الف وادخل اخر الطابور (4 كيلوا متر من الطرق المروريه السليمه و500 متر لو دخلتها رونج)
دخلت اخر الطابور وطبعا انا شايف الشارع اللي فيه البنزينه علي مرمي البصر بس مش شايف البنزينه نفسها
الكلام ده كانت الساعه 12 ونص (بعد منتصف الليل )
وبدات الحكايات
اول ما دخلت راح واحد قايل المفروض الملاكي ميمونش 80 وعدي الموضوع
الطابور كان حوالي 200 عربيه فيهم 8 ملاكي والباقي تاكسيات
السواقين مشاء الله عليهم جايبين كل مستلزمات الرحلات معاهم من اول شرايط ام كلثوم مرورا بالساندويتشات وحتي الكيوف من مخدرات وما يتبعها كان موجود
وكان فيه ترابط جميل جدا اللي عمال يفضي تانك البنزين علشان يملا جركن لواحد واللي عمال يغسل عربيات واللي نايم
المهم
وتسمع بقي التعليقات اللي تموت من الضحك
سواق تاكسي داخل ومعاه صاحبه جنيه راح واحد قايله ايه ده انت جايب واحد بس معاك فالتاني قاله لا الباقي جايين في اتوبيس ورا مننا
وكلمه من هنا وضحكه من هنا
وفييييييييييييييييييييييي يييين وصلت وشوفت الاسفلت الساعه 3 الا ربع (الشارع اللي كنا واقفين فيه كان تراب)
وربنا كرمني بعد نص ساعه وشوفت مضخه البنزين من بعيد والساعه 4 الا ربع كان قدامي عربيتين
راح العمال اللي في المحطه قايلين حنريح المضخه ربع ساعه
واكتشفت ساعتها ان مكانش فيه غير نص مضخه بس هو اللي شغال (خرطوم واحد بس)
وربنا كرمني ومونت العربيه ومشيت من محطه البنزين الساعه 4 وربع فجرا وسط مئاذن اسكندريه وهو تكبر وتقول الله اكبر استعدادا لصلاه الفجر
ههههههههههههههههههههههههه ههههههههههههههههههههههه
والله يا جماعه دا اللي حصل معايا امبارح من الساعه 11 ونص لحد الساعه 4 ونص
وعلي فكره انصح كل واحد بيدور علي بنزين 80 ياخد عياله معاه علشان لو وحشوه
وياخد اكل وشرب كفايه
واي حاجه يتغطي بيها علشان لو نام وميقلقش انه يتسرق حتي في مكان مهجور لان حواليه نص الشعب واقف
وياخد سبراي للناموس علشان ممكن يجيلك انيميا من كتر الدم اللي حتفقده في معركتك مع الناموس
واهم حاجه يكون فاضي جدا وعنده حاله ملل رهيبه ويا ريت لو يكون عنده اكتئاب كمان علشان لما يتزنق الزنقه دي ويفك يخف من المرض
ومتروحش بالعربيه وهي لمبه البنزين منوره علشان ممكن يخلص منك اثناء الطابور وتزق العربيه
علي فكره دي بنزينه التعاون اللي بعد مرور محرم بيك في اسكندريه اللي علي الصحراوي
اتمني انك متملوش من الحكايه انا شفت انه يوم مسخره وضحكت فيه كتير برغم صعوبه الموقف وحيبت اني اشارككم الحكايه لان دي ححكيها لاحفادي واستاذنكم علشان السمسار جه علشان نويت ابيع العربيه وحشتري عجله بدالها او عربيه بحمار (اهو اي حاجه بياكلها وممكن تمونه من اقرب صندوق زباله جنب البيت )
والسلام ختام