رثاء في قطعه حديد-عربيتي-الحمد لله

مع السلامة يا اصيلة
كنتي خير دابه وماشوفتش معاكي يوم وحش
وديتك من شرقها لغربها وشوفتي ايام معايا ميستحملهاش صاحب وفي
دلعتك وروقتك وشيلتني
شيلتيني انا وعيالي واسرتي
وديتك اماكن ومشيت بيكي في طرق ماينفعش امشيكي فيها
ولكنك استحملتي وكنتي دايما اصيله
والنهاردة انا حزين عليكي
لكن عذري اني سيبتك لواحد يعرف قيمتك ويقدرك مش تاجر يبيع ويشتري فيكي
يعلم ربنا اني مابخلتش عليكي بقرش لغاية اخر وقت كنت بركبك فيه
ولتاني مرة اظبط نفسي بدمع على فراق قطعه حديد لا بتفهم ولا بتعقل
الاولي وقت بيع تالت عربية بيتلز مشيت بيها اكثر من 50 الف في سنة
والتانية لما بعتك يا شاكي
كرولتي ال 2007
سلام
وحزين
ولكن هذا طبع الحياة
الحمد لله

الف مبروك البيع
وربنا يعوض بالخير ..

هذا ان دل على شىء يدل على انك راجل اصيل يا استاذ كريم ايه الجديد بقى غشان نقول مبروك

ترانى تأثرت :)
ألف مبروك على البيع و ربنا يباركلك و يبارك للمشترى

الف مبروك

فكرتني بيوم ما بعنا البيجو 504. اللي عاشت في بيتنا عشرييييييين سنه. ....
لحد النهاردة فاكر وقفتها قدام بيتنا. .. صوت سرينتها. ...
فاكر ريحتها. .و. خدمتها لبيتنا واسرتنا
:)

ترانى تأثرت :)
فعلاً فى حاجات الواحد مبيبقاش متخيل أن فراقها محزن للدرجة دى زى العربيات و الحيوانات الأليفة
ألف مبروك على البيع و ربنا يباركلك و يبارك للمشترى

الكل مفارق ولا يهمك ولا تخزن وان شاء ربنا هبعوضك خير واوعى تزعل المهم انت واهلك ادعو الله لك بدوام الصحة والعافية وان يكرمك الله بزيارة النبى ان شاء الله

قلبت عليا المواجع وفكرتنى بالذى مضى
ممكن الانسان يرتبط بقطعة حديد بدافع العشرة و المواقف و الذكريات
وذاكرة لاتمحى منها ادق التفاصيل
ودة دليل على ان السيارة كانت وش السعد او قدم الخير زى مابيقولوا ( قرفتها حلوة )
ولكن تأتى رياح التغيير وتسيطر على بحر الافكار
وتهون الذكريات وتمحى التفاصيل ونستغنى عنها فى انتظار المركب الجديد
لعلة يكون خير
فى انتظار التغيير

الف مبروك البيع و عقبال العروسه الجديده :)

فكرتني بالخنثاء وهي بترثي اخوها صخر لما وقع عليه طبق الدش
ربنا يبارك للي اشتري ويباركلك في بيعتك وفي عربيتك وفلوسك
بس مش شايفك جايب سيره العربيه اياها يا كيمو

يوم مابعت عربيتي ال 25
كانت قدم خير
الراجل دور العربيه وانا واقف في الشارع متابعها لحد ما ختفت عن نظر ي
كان بتودع شيء عزيز مش هاتشوفه تاني

أنا حاسس بيك يا أستاذ كريم معلش هو فعلا طبع الحياة

بعدين ما أنت جبت ستها برضه ههههههههههههه

والجديدة ايه ياريس؟

اقتباس:

---

المشاركة الأصلية كتبت بواسطة محمد يوسف

والجديدة ايه ياريس؟

---

316
بس عاوزه مساعدين وكارتيره وصرف عليها تمنها تقريبا ههههههههههه
فباع الكرولا علشان يكمل تصليح البي ام

أحترم الراجل اللى يرتبط بعربيته :)
العشرة ماتهونش إلا على سواقين الميكروباص!! lol

- وهى مش حته حديد -صحيح.. أكيد صحبة شالتك سنيـــــــــــن؟!!!
الواحد ممكن يعيط فعلا - وآخر مرة تشوفها: كل ذكرياتك معاها بتعدى قدام عنيك :bye:

ربنا يبارك للى خدها، ويباركلك فـ البيمر ياكريم -ان شاء الله

العشرة ما بتهونش غير على سواقين الميكروباس هاهاهاهاهاها

انا نفسى زعلت اما عرفت انك بعتها
مش كنت تديها ليا ولا لشنورى هدية

ربنا يباركلك ويبارك للي بقت في عصمته...
هههههههههه
وزي ما ودعت تلاقي ان شاء الله...
تحياتي

Sent from my SE Arc S using Forum Runner

الله يكرمكم جميعا
شنوري انت بتقول فيها اه والله عايزة نص عفشة امامية برقم يوجع
في الكرولا كنت بدخل فيها مدق في جبل ولا تقول انت رايح فين
مش الجديدة اللي غرزت في شوية رمل صغيرة وفضحتني وجبت لودر عشان يطلعها :(
والله ما ببالغ
غرزت فعلا في شوية رمل وماطلعتش الا بلودر

الكرولا فعلا انا مسميها صندوق الذكريات
اكتر عربية قعدت معايا في حياتي لاني بغير عربيات كتير
واكتر عربية شافت معايا اوقات غريبة في حياتي
واتاثرت بيها لان قرفتها حلوة جدا وكانت بتشيل الاصحاب والاحباب والعيلة وكله
ومابتقولش اي حاجة
ربنا يبارك للي اشتراها بقي

الف مبروك البيع يا كريم .. و ربنا يبارك لك وللمشتري.

مبروك البيع
وربنا يعوضك عنها بأحسن منها
تقبل ارق تحياتى

قلبي عندك يا كريم باشا
بس مكان الموضوع ده مش هنا لازم ننقل الموضع ده لقسم تويوتا علشان الناس تعرف قد ايه تويوتا عزيزة على قلب كل تويوتاوي ... وينطبق عليها كلمات الشاعر الكبير هاني شاكر ( نسيانك صعب اكيد .... ملهوش غير حل وحيد ... ابيعك وانا قلبي باكي واركب جديد في جديد .... نسيانك صعب اكيد )

انا لحد دلوقتي اتذكر تويوتيتنا الكرسيدا. ومش قادر انساها .... ذكريات الشباب والطفولة كلها كانت معاها ... كبرنا وترعرعنا على الكرسيدا ومزال ذكرها في القلب والقلب يدمع ... ومهما ركبت. بعد التويوتا لن تستطيع ان تنسى التويوتا ابداً ... العربية مع الوقت بتبقى حته منك ... وتلاقيك حتى لمن تركنها في مكان. وتنزل تتمشى على رجليك قلبك وعقلك معاها وتقعد تقول ياترى يا هل ترى. ... ياترى هرجع الاقيها مكنها ولا هلاقي حد خطفها .... ياترى هيجي واد دوبة بشيلة ويقعد على الرفرف بتعها ولا كبوتها ويفعصهالي ولا هرجع ومش هلاقي حد ساند عليها. ... وتلاقي نفسك قلبك مشغول عليها تماماً زي مايكون قلبك مشغول على ابنك الصغير وهو في المدرسة

تصور تكون نايم وتسمع عربيتك بتعيط او بتصوصو. ( جهاز الانذار ). تلاقي نفسك قمت من النوم جررررري على الشباك علشان تبص وتطمن عليها. تماماً زي لمن تكون نايم وتلاقي ابنك الصغير بيعيط حلم بكابوس ولا حاجة .

تصور حتى لمن تيجي مروح قلبك ميطوعكش انك تركنها بعيددد عن البيت علشان العربية متخفشي لانها بعيدة عنك وركنها لوحدها بعيد ... ولو يطلع بايدك تطلعها معاك الشقة وتغطيها مش هتقصر .

وكل الاحاسيس دي واكتر كمان لايمكن تحسها غير مع تويوتا بتبقى جزء لايتجزء منك. ... فربنا يصبرك على فراقها وبكرر قلبي عندك ياباشا :) .... وتحياتي

أنا كنت فاكر ان أنا لوحدي اللي كده. أصل أصحابي بيبيعو بدم بارد كأنهم بيبيعو عبيد. ازاي تهون عليا وهيه كانت معايا في كل مشوار مفرح أو محزن. مش هنسى اول مره وأنا رايح المطار أقابل مراتي وهيه جايالي ومعاها بنتي اللي بشوفها لأول مره وأول ما دخلنا العربيه شلت بنتي وحضنتها وبوستها لأول مره. عايزين الواحد تهون عليه عربيته ازاي وهيه كانت معاه وهوه رايح انترفيو شغل ويتقبل في الوظيفه أو وهوه رايح يتقدم لعروسه وتوافق عليه ولا والواحد راكبها ورايح يشتري أول شقه ملكه ولا وهوه رايح بيها يجيب حاجات التشطيب. العربيه بتشهد على كل خطوه في حياه الواحد يبقى ازاي عشرتها تهون ده العشره مش بتهون الا على ابن الحرام حتى لو كانت حته حديده ولا ايه؟

اقتباس:

---

المشاركة الأصلية كتبت بواسطة ahmed_adham

أنا كنت فاكر ان أنا لوحدي اللي كده. أصل أصحابي بيبيعو بدم بارد كأنهم بيبيعو عبيد. ازاي تهون عليا وهيه كانت معايا في كل مشوار مفرح أو محزن. مش هنسى اول مره وأنا رايح المطار أقابل مراتي وهيه جايالي ومعاها بنتي اللي بشوفها لأول مره وأول ما دخلنا العربيه شلت بنتي وحضنتها وبوستها لأول مره. عايزين الواحد تهون عليه عربيته ازاي وهيه كانت معاه وهوه رايح انترفيو شغل ويتقبل في الوظيفه أو وهوه رايح يتقدم لعروسه وتوافق عليه ولا والواحد راكبها ورايح يشتري أول شقه ملكه ولا وهوه رايح بيها يجيب حاجات التشطيب. العربيه بتشهد على كل خطوه في حياه الواحد يبقى ازاي عشرتها تهون ده العشره مش بتهون الا على ابن الحرام حتى لو كانت حته حديده ولا ايه؟

---

حبيبي يا بوحميد حتى أنتا كان عندك تويوتا ؟

اقتباس:

---

المشاركة الأصلية كتبت بواسطة Y a r i s

حبيبي يا بوحميد حتى أنتا كان عندك تويوتا ؟

---

لاء كانت شيفروليه ابيكا 2006

http://media.wheels.ca/vehicles/1041...9515-10-sm.jpg

اشكركم لمشاعركم الطيبة
هي فعلا صندوث ذكريات بجد
ياما استنين فيها وياما شالت غضبي وياما قعدت اشتغل فيها وياما عملتفيها اجتماعات والله وبالساعات
الحمد لله بس برضه بحبها وحزين على فراقها
دول 6 سنين الا ربع برضه

كلامك مؤثر جدا والله يا كريم بك
أدعو الله إنه يرزقك بخير منها وبرضه تبقى عشرتها حلوة

ربنا يعوضك باللى احسن منها ان شاء الله

فعلا العشرة ماتهونش الا على بن الحرام !!

العربية نص حياتنا خاصة لمن يتحرك بيها يوميا

يارب تدوم علينا نعمة الركوبة الطيبة

والف مبروك للمشتري وربنا يبارك للبايع في فلوسها

على فكرة تويوتا مش تويوتا أي عربية بتبقى عشرة وتحس معاها نفس الأحاسيس ههههه.

بس تصدق زعلتني، العزبية دي ماشاء الله علامة في التاريخ. أعرف ناس كان معاهم واحده ٢٠٠٥ وبعوها ٢٠٠٨ وغيرو لأوبل فيكترا زيرو وإنهارده الأوبل مطلعة عينهم وبيترحمو على الكورولا.

الف مبروك البيع وربنا ان شاء الله يرزقك وتجيب اللي تحبها اكثر من دي

هي فعلا حكاية
عاملة زي تويوتا موديل الملكة بتاع 93 كدة
صنعت لتتحمل

متزعلشي انا يوم ما والدي باع الماذدا ال 323 كنت هعيط بس بعديها لما ركبت الانسر نسيت ابوها ههههههههههه

كنت لسه في 3 اعدادي و اتأثرت جدا لحد ما اخدت العربية في اولي ثانوي في الدروس و كانت موديل السنه بقي ههههه

ذكريات والله فكرتني بس بجد الحمد لله انك بعتها و جبت حاجة احسن ربنا يسترها عليك و زعلت من موضوع العفشة ده !!!

اقتباس:

---

المشاركة الأصلية كتبت بواسطة karim_monir

هي فعلا حكاية
عاملة زي تويوتا موديل الملكة بتاع 93 كدة
صنعت لتتحمل

---

رثاء مؤثر ومعبر ..من محب وعاشق للسيارات .. ربنا يبارك لك يا أستاذ كريم وللمشتري وبالتوفيق.
وبمناسبة الكورولا الملكة 93 مش قادر اتنازل عنها ولا اغيرها من الزيرو ..ماشاء الله ده ارتباط قوي بموديلات أسطورة لن تتكرر ..