الموضوع: أستاذ محمد ممدوح: النجدة؟

محمد بك ممدوح كيفك ؟ يا رب تكون بخير أنت وباقي الأعضاء
معلش حنطول عليكم شوية:
من فترة ف شهر واحد اللي فات كنت في معرض القاهرة للكتاب، حصل إن الموبينة بتاعة العربية طقت من جنابها وتوفاها الله، المهم رحت للميكانيكي الوحيد اللي كنا نعرفه في القاهرة وللحظ عنده عربيته لانوس زي عربيتي عرف المشكلة وتكرم علينا واشترى موبينة جديدة وركبها وبقت العربية زي الفل، رجعت سوهاج مفيش كام شهر وابتدت العربية تظهر عليها أعراض غربية، تقطيع على سرعات مختلفة، ريحة بنزين ني، السلانسيه مش مظبوط يعني مؤشر Rpm مش مظبوط هو تحت الواحد لكن ينزل ويطلع كأنها حتبطل، المهم بعد لفة ودوخة على الصنايعية اكتشفنا إنها الموبينة، جبت واحدة استيراد، اشتغلت حلو شهر زمن، وبعدين عملت نفس الأعراض، قلت يمكن عشان كانت شغالة ومستهلكة، وطبعاً كل الجديد اللي في مصر صيني، بعت جبت واحدة من الإمارات من توكيل دايو جديدة أول يد تلمسها كانت ايدي، ركبتها وبقت العربية زي الفل، الكلام ده من حوالي أربع شهور.
إمبارح ابتدت تظهر بعض الأعراض : عدم استقرار المؤشر في السلانسيه، لكن أخف من الأعراض القديمة، كمان لما آخد غيار على أقل من سرعنه، يعني لما آخد التاني على سرعة عشرة، ألاقي العربية تتهز كده كأنها حتبطل، المؤشر ينزل ويرجع تاني بسرعة.
مش عارف دلوقتي إيه الحكاية:
هل الأعراض الجديدة دي حتكون برضة من الموبينة اللي لسة مكملتش أربع شهور، وإن كانت منها فإيه هي الأسباب اللي بتخلي الموبينة تخرف بالشكل ده؟ هل ممكن تكون واخدة كهربا زيادة أو فيه مشكلة في الكهربا اللي داخلة على الموبينة؟
وإن مكانتش الأعراض دي من الموبينة : يا ترى تكون بوجيهات ولا سلوك بوجيهات ولا رشاشات؟
مع العلم إني مغير بوجيهات دنسو ياباني من أربع شهور وسلوك بوجيهات جي إم .
والرشاشات منضفهم من نفس التاريخ تقريباً.
آسف للإطالة، بس أرجوكم أفيدوني يرحمكم الله

لكن مقدرتش اروح علشان أسيوط بعيدة عليا والطريق اتجاهين والعربيات بيمشوا 3 و 4 بالعرض غير المقطورات اللي بتمشي في وسط الشارع والطريق محتاج اعصاب.
صدقت يا أخي روحت إمبارح وكان مشوار فظيع، يعلم الله إن مشوار القاهرة أسهل منه بكتيييييييييييييييييير، رغم إن المشوار لغااية أسيوط حوالي 120 كيلو، المهم بعد ما وصلت ودوخت عشان ألاقي مركز خدمة دايو، رحت لقيتها ورشة عادية فيما عدا بعد الأجهزة .طيب يا أخوانا عاوز أكشف على العربية بالكمبيوتر، فوجئت بإن المهندس الوحيد اللي بيعرف يشتغل على الكمبيوتر في المصيف. يعني إيه يا أخوانا نمشي 250 كيلو عشان ولا حاجة. طبعا لا تقولي استقبال ولا معاملة ولا صنعة، المهم بعد أن أخدت طول النهار ألف في أسيوط على مكان خدمة في جهاز رجعت إلى سكني بخفي حنين.
وما زالت المشكلة قائمة ، ولا أعرف ماذا أصنع؟ أنتظر المهندس اللي جاي من المصيف الأسبوع القادم؟ ولا أغير موبينة؟ ولا أروح فين بس؟