الموضوع: تنضيف الفوانيس الأمامية لفيكترا ايه

بقالى كام يو عايز انضف الفوانيس عشان شكلها مطوس قوى
و مش عجبانى و بهدله شكل وش العربية
( ده على اساس ان العربية عندى نضيفه اصلاً - بس ما علينا )
النهارده قاعد فى البيت
و صحيت بدرى و مش عارف انام
رحت نازل
فكيت الشبكه ( و هى اصلاُ مدغدغه و على مسمار واحد بسبب حيوان حاول يسرقها و معرفشى فكسرها )
و فكيت الفانوس اليمين عشان هو اللى كان وحش من وجهه نظرى قوى
و فكيت الست كلبسات اللى ماسكينه ( فوانيس الفيكترا ايه ملهاش سيلكون بس ليها فريم كاوتش )
طلعت الأزازه
و جبت من فوق طبق كبير
فيه ايه بقى
مية سخنه
و فرشة بلاط ناعمه ( فرشة سجاجيد ) اللى متجوز مراته عارفها
اريال
كلور
صابون سايل
صنفرة ناعمه قوى
و لو فيه عندك شوية كلور مركزين يبقى لوز اللوز
و اديتها بقى نظافه
ادعك فى الأزاز لغاية ما يبانله صحب
و من بره و من جوه
لغاية ما ينضف
و بالصنفرة الناعمه
نضف الوش من بره كويس
بس من غير تكحيت
الأهم بقى
العاكس
اياك تيجى ناحيته باى حاجة خشنه
ولا حتى مناديل ورق
ولا مية
عشان هو مستوى لوحده من حرارة الللمبة
انا عندى حتة جلد غزال
كانت جايه مع نضارة اصلى
و نضفت بيها
و بالنسبة للحتت اللى فيها تمويج
بتاخدها بالطول مش بالاتجاه اللى فيه التمويج عشان هيطلع العاكس
و تقفل و كل سنة و انت طيب
الصور بقى
انا مصورتشى عشان نسيت الموبايل فوق
بس دى صور قبل و بعد بس
و لو حد عايز صور
اصورها تانى
تحت امركم
قبل التنضيف


بعد التنضيف