من العمرانيه لباب اللوق شارع جواد حسنى

السلام عليكم ورحمة الله
ياريت حد يوصفلى الطريق من العمرانيه الى باب اللوق وبالتحديد شارع جواد حسنى اللى فيه مباحث الاموال العامة

الا من مجيب افيدونى افادكم الله

فى مثل هذه الظروف الافضل ماتروحش
على العموم افضل شيء خد المترو من اقرب محطه ليك وغير فى التحرير عشان تنزل محطة سعد زغلول هتكون قريب قوى
و ممكن تتمشى من التحرير بس برضه منصحش بكده

متشكر لردك والنصيحة بس انا مضطر اروح بالعربيه عشان هروح مع والدتى للدكتور فى باب اللوق ياريت لو حد عنده اخبار عن الوضع هناك يفيدنا انا رايح انهارده ان شاء الله على 7 مساءاً

طيب هوصفلك و ربنا معاك ... انا معرفش مباحث الاموال دى فين بالظبط بس شارع جواد حسنى موازى لمحمد فريد و يبدأ من عند ميدان اللى فيه محطة مترو نجيب لحد عبدالخالق ثروت (معرفش بالظبط انت عايز انهى حته فيه بس اوله من عند المترو يبقى فى باب اللوق فهوصفلك تروح هناك ازاى)
بص هيه لفه طويله و فى طريق تانى اقصر بس فيه عك كتير فى وسط البلد و احتمال تلاقى قلق او طرق مقفوله فاستحمل اللفه الطويله
هتطلع من العمرانيه على الجيزه و تعدى كوبرى عباس و تعدى المنيل و تمسك صلاح سالم و تعدى السيده عيشه و طوالى لحد ما تعدى مشيخة الازهر ... تلف من تحت كوبرى الفردوس و ترجع تنزل نفق الازهر و اول ما تطلع من النفق خش شمال (تمثال ابراهيم باشا هيكون على شمالك) و هتعدى اول اشاره (بتاعة عبدالخالق ثروت) و تانى اشاره (هتلاقى جامع اثرى كده على اليمين فى وشك) و تالت اشاره (على الشمال بعد الاشاره على طول فى بنك و محل الاسواق الحره و على اليمين محكمة عابدين) و مع رابع اشاره خش يمين هتمشى حاجه بسيطه هتوصل لميدان اللى فيه محطة نجيب ... عدى الميدان بحيث ان التمثال يكون شمالك و فوت اول مخرج (اللى هو يمينك قوى) و تكمل تانى مخرج ... اول شارع على اليمين ده جواد حسنى (فيه قبله حاره صغيره ملكش دعوه بيها) .... ربنا معاك

لو ليك فى وسط البلد و تعرف توصل لملابس الاهرام فى شارع شريف هتكون قريب قوى من جواد حسنى

شكرا يا باشا