الحمد لله عملت حادثه

**ahmad--ezzat** · 28-01-2013 09:29 AM

سلام عليكم
قدر الله وماشاء فعل الحمد لله
عملت حادثه عند كوبري النادي الاهلي ودة بسبب سواق ميكروباص حمار وقف مره واحده عشان ينزل ناس في اول الكووبرى

السرعه كانت 80 او 90 وجاي من شيراتون وطالع الكوبري
واذ في اول الكوبرى ميكروباص وقف مره واحده وكانت سرعته 80 تقريبا وطبعا انا وراه وملحقتش افرمل
مجرد ضربت شمال فى يمين
العربيه عومت منى
وفى الاخر اترزعت فى الرصيف

حسبى الله ونعم الوكيل

المساعد اتعوج والمقص وطبعا البيض

الحمد لله انا لميت العربيه وجبت كل حاجه مساعدين ومقصات و و و (ب 1600 ج بالمصنعيه)

المهم اللى حصل ان العربيه وانا رايح بيها الشغل...لايتها بتحدف مع الفرامل يمين (ناحيه الرزعه).....بالاضافه الى انى بحس انها بتيجى يمين وشمال وانا ماشي ...فى حاجه غلط فى العربيه
العربيه مفهاش اى اصوات ولا اى حاجه ولكن الحدفه مش طبيعيه والعربيه زى الشوربه
كلمت الميكانيكى
قالى المشكله دى بسبب ان الشمعدان ملووح شويه ومش ظابط الطنابير كويس فمع الفرامل بتعمل كده

فانا عايز اعرف اعمل ايه دلوقتى
اجيب شمعدان ستيراد ولا ايه

وهل المشكله دى فعلا فى الشمعدان !!! علما بان القنطره كويسه

**egman** · 28-01-2013 10:31 AM

حمد لله على سلامه حضرتك انا عارف الكوبري ده وعارف السواقين المحترمين والمحترفين والى دايما بيقولوا على سواقين الملاكى انهم مش بيفهموا فى السواقه ولا ليهم انهم يركبوا عربيات هما ما شاء الله عليهم استاذة فى الحوادث والسير العكسي والمخالفات والرزع فى عربيات الناس وصدم البشر فى الشارع محترفين فعلا اقصد حماريين فعلا ، انا عارف الكوبري ده كويس وعارف ان كل السواقين الى قلت عليهم من شوية بيعملوا الحركة الغبية ده وكتير اشوف عربيات بتلبس بسببهم ربنا ياخدهم كلهم سواقين الميكروباص والنقل والتكتك او يدخلوا مصحه تاهيل نفسي ويطلعوا منها على مدرسة سواقه من اول وجديد ، حمد لله على سلامه حضرتك المهم انك سليم ده بالدنيا والى فيها .

اما بخصوص العربية بعد الاصلاح :

يا ترى حضرتك ضبط زوايا بعد الشغل ده ولا لأ ولو ماكنتش ظبطت الزويا روح عند حد كويس واظبطتها وجرب ؟

لو طلع نفس العيب موجود اكشف على الشمعدان مع ان الراجل المفروض يكون شايفه وهو فاكك الدنيا وبيركب المساعد والمقص وكده والطنابير ، عموما احتمال يكون فى لوحه مش باينة فى الشمعدان ممكن غيره يا باشا استيراد هيجي بالبليه بتاعته وريح دماغك ..

ولو حابب تتاكد من الحكاية ده امسك الفرده من الجنط بتعها وحاول تحركها يمين وشمال وشوف هتحس فىها ببوش ولعب ولا لأ لان لو الشمعدان لو ملوح يبقى الطنبورة مش هتبقى مظبوط وهى راكبه عليه وممكن تبقى فى بوش وممكن تعرف ده بايدك والافضل انك توديها عند الميكانيكي الى اشتغل فيها ويفك الطنابير ويشوف الشمعدان .

حمد لله على سلامتك

**ramyraby** · 28-01-2013 10:54 AM

قدر الله ومشاء فعل
الحمد لله انك بخير

**ahmad--ezzat** · 28-01-2013 10:54 AM

شكرا لردك...والله انا مش عارف اخرتها ايه مع البلد دى
مرور زفت سواقين زفت شوارع زفت سواقه زفت حفر واسفلت مبهدل

انا فكرت للحظات انى ابيع العربيه واريح بالى بس قلت هتحرك ازاى ...حسب الله ونعم الوكيل

بالنسبه لموضوع االزوايا

انا ظبط زوايا كويس...والعربيه مش بتحدف معايا خالص فى المستقيم...ولكن اول ما بدوس فرامل تدى يمين وتحسها مراجيح...وكمان حاسس انها مش مظبوطه...بمعنى ان العربيه تحس انها ماشيه فى ناحيه و العجل فى ناحيه....ولما كشفت على الشاسيه لايته كويس (والعجل جايب اصفار مع الزوايا كمان)

وحسبى الله ونعم الوكيل

ياريت حد يفيدنى فى الموضوع ده

**a7mous** · 28-01-2013 11:01 AM

قدر الله وما شاء فعل
الحمد لله انك بخير
فعلا ازمة سلوكيات القيادة الخاطئه دى من اهم اسباب الحوادث اليوميه وخصوصا سواقين النقل والميكروباص

**SAMEH_FOUAD** · 28-01-2013 11:13 AM

قدر الله وماشاء فعل , معلش مكتوب علينا ندفع ضريبة البهايم والخرفان اللى سايقين ميكروباصات والناس اللى بتطلع الرخصة واسطة وهية ماتعرفش حاجة عن السواقة

عموما ياباشا انت بتقول ان الشاسية تمام الحمد لله

طيب معلش ياباشا عشان بس نديك حل صح , لازم الكلام يتوحد لان انت كاتب فوق ان العربية بتروح منك يمين وشمال وانت ماشى عادى , وكاتب تحت ان العربية فى الطريق المستقيم زى الفل مافيش فيها اى انحراف , يبقى ازاى ؟؟؟

فمعلش اشرحلى الحالة دلوقتى عندك اية بالظبط ؟؟؟؟ وربنا يسهل وحمد لله على سلامتك ياباشا

**egman** · 28-01-2013 11:36 AM

ايو يا فندم يعمل كده لو ملوح وزي ما قلتلك هتجيب واحد استيراد بالبلية بتاعته وتريح دماغك من الموضوع ده والاول روح فك العجلة عند الراجل وفك الطنبورة وشوف الشمعدان الدنيا فيه عاملة ازاى علشان تبقى متطمئن وانت بتغير الشمعدان بما ان كل حاجة انت جايبها جديدة ....

**ahmed.zahra** · 28-01-2013 12:07 PM

حمدا لله على سلامتك و خد بالك من مطالع و منازل الكباري مع الميكروباصات لأنهم بيعملوا اي حاجة. و طبعا ممكن الشمعدان لو فيه لوحه يعمل كده و م الأخر الرك ع العفشجي لو تمام حيقول لك العيب فين بالظبط و الشمعدان استيراد حيكون تمام و يوفر لك فلوس و ربنا معاك.

**فادى محمد** · 28-01-2013 12:15 PM

حمد الله علي سلامتك ..
في تجربه مماثله مع عربيه صديق لي
نفس الاعراض اللي عندك وكان الشمعدان فعلا معووج ومحتاج يتغير
بس عملنا حاجه تانيه لان ظروفه كانت صعبه
العوجه كانت 6 ملي للداخل
عوضنا المسافه دي بمسمار نفس السمك حشرناه بين طرف الشمعدان
وبين الدوشمه اللي شايله الصره والماستر مار (نهايه الشمعدان في 2 مسمار هويناهم وحطينا المسمار)وظبطنا زوايا بعد كده والعربيه للنهارده
ماشاء الله بحاله المصنع

-

الموضوع: الحمد لله عملت حادثه

LinkBack

أدوات الموضوع

عرض

الحمد لله عملت حادثه - انشر الموضوع فى :

-

-

-

-

-

المواضيع المتشابهه

الحمد لله عملت حادثه

الحمد لله عملت حادثه....

عملت حادثه و الحمد لله......

عملت حادثه و الحمد لله

الحمد لله .... عملت حادثه

الكلمات الدلالية لهذا الموضوع

المفضلات

المفضلات

ضوابط المشاركة