الفرانكو !!

**AhmedGen2** · 28-07-2008 03:58 AM

للأسف ظاهرة الفرانكو أصبحت سائدة فى أى شات سواء ماسنجر او فيس بووك ، والعربى دلوقتى بقى حاجة مش كووول ، والصح إنى أكتب كلام عربى بحروف إنجلش وأرقام 7aga zay keda ! ، للأسف 95% من الشباب عالماسنجر والفيس بووك بيكتبوا فرانكوا ، ونادراااااااا جدا لما ألاقى حد بيتكلم عربى ، و الحروف الإنجلش المرقمة بتجيبلى حول ومملة جدا فى القراية ، الجمل متداخلة وغير منظمة ، شىء مقزز.

ياريت تشاركونا أرائكم حول هذه الظاهرة وسبب انتشارها والحلول المقترحة لعلاجها.

**ashour** · 28-07-2008 04:50 AM

انا كمان كان بيبقى عندى نفس الاسمئزاز ده..
بس اكتشفت ان الموضوع ده مش فى العربى بس ده كمان فى الانجليزى
لا و اكتر بكتير... لان العربى بيحصلوه فرانكو عشان بعض الكيبوردات مفيهاش عربى
او عشان عايزين ننجز بالحروف اللى موجوده..
لكن فى الانجليزي الحروف موجوده بس عايزين ينجزوا فبيختزلو اللغه بيتاعتهم مش كده و بس لان مش الانجليز بس اللى بيعملوا كده ده كل اللى يقدر يستخدم الانجليزى و يطق في دماغه اختصار ممكن ينتشر في العالم كله بسهوله.

**Akram** · 28-07-2008 08:57 AM

الموضوع على اللي بيكتبوا العربي باللغة الانجليزية مش اللي بيختزلوا في اللغة الانجليزية ,
انا عن نفسي الموضوع ده بيضايقني جداً و ببقى مش عايز اقرأ الموضوع اساساً ,

**Noha.M** · 28-07-2008 10:09 AM

انا برضه الرغم انى متعودة على الفرانكو و برضه متعودة على العربى لكن بجد بقيت بتخنق جدا من قراية الفرانكو و فعلا لما بلاقي ردود فرانكو بكسل اقراها فعلا

**MoToRiZeR** · 28-07-2008 10:38 AM

هي لو في منتدي أو موقع بتبقي مملة طبعا بس عالمسنجر و الفيس بوك عادي .. يعني انا بكتب هنا عربي بس عالمسنجر و الفيس بوك فرانكو لأنه بيريحني أكتر انا بكتب عربي بطئ .. كمان الفرانكو بيبقي حلو لو ليك أصدقاء أجانب لأن ده بيسهل عملية التواصل لأنهم بيحبوا يعرفوا مصطلحات عربية و يعرفوا يستخدموها و يكتبوها فا كدة بتبقي سهلة عليهم أحسن ما يتعلموا الحروف العربية .. انا اعرف واحد انجليزي لو تشوف بيكتب ايه علي فيس بوك تقول ده من بولاق ابو العلا ..

**tutankhamoun** · 28-07-2008 10:47 AM

إنحدار للثقافة و المعرفة و العلم

و الإنسلاخ من الهوية الثقافية الأصلية للبلاد و التقليد الأعمى للسلبيات فقط دون الإيجابيات

-----------------------------------------------

أنا بطق من انواع الناس دي
1 - اللي في وسط كلامه ........ مرسي قوي .......... ساي ( قول ) ...... الديسك ( المكتب ) ......... الهوتيل ( الفندق ) ......... التراين ( القطار ) ........... ........................ .................... الخ
و كلمات أخرى كثيرة تفقع المرارة

2 - الناس اللي بتكتب لغة أجنبية للحوار مع أهل بلدها
يا ساتر ............. أيه .............. خلاص مش عارفين تكتبوا عربي !!!!

البلاد في انحدار ثقافي و أخلاقي و بقت حاجة تقرف

أرحمنا يارب ................... و ريحنا

**جمال** · 28-07-2008 01:22 PM

هل الموضوع عن الذين يكتبون عربى بحروف انجليزية , ام عن الذين يدخلون كلمات اجنبية ( بالعربى ) فى اللغة العربية ؟
مش واضح من صاحب المشاركة والردود غير متفقة

انا عن نفسى لااحاول ان اقرأ اى مشاركة عربى بحروف اجنبية
لو مشاركة بالعربى بحروف عربية ماشى , مشاركة بلغة اجنبية ماشى
انما مشاركة خلطبيت لغة و حروف مش ماشى

**MMamdouh** · 28-07-2008 01:56 PM

المشاركة الأصلية كتبت بواسطة tutankhamoun

إنحدار للثقافة و المعرفة و العلم

و الإنسلاخ من الهوية الثقافية الأصلية للبلاد و التقليد الأعمى للسلبيات فقط دون الإيجابيات

مش شرط... ساعات بتبقى لضرورة و ساعات منظرة

أنا بطق من انواع الناس دي
1 - اللي في وسط كلامه ........ مرسي قوي .......... ساي ( قول ) ...... الديسك ( المكتب ) ......... الهوتيل ( الفندق ) ......... التراين ( القطار ) ........... ........................ .................... الخ
و كلمات أخرى كثيرة تفقع المرارة

دى تندرج تحت بند المزربة.... و هو مصطلح مشتق من المزراب اللى بينزل الميه من البلكونة للشارع... وجة الشبة هو ان المزراب بيبقى طالع نشاز وسط الشكل الهندسى للعمارة... زى اللى بيكتب الديسك و الترين عشان يعمل فيها بيعرف لغات و كدة... فى حين انك لو بصيت كويس حتلاقى المزراب وظيفتة انه ينزل ميه مش نضيفة و بالتالى اللى بيتمزرب بيبقى.....

2

- الناس اللي بتكتب لغة أجنبية للحوار مع أهل بلدها
يا ساتر ............. أيه .............. خلاص مش عارفين تكتبوا عربي !!!!

we do know how to write in english but in some cases were a ton of technical stuff is being discussed it is much much easier to do it in english rather than arabic... even the articles that you use for evedence will most probably be in english so it is just a technical necessety rather than anything else

البلاد في انحدار ثقافي و أخلاقي و بقت حاجة تقرف

أرحمنا يارب ................... و ريحنا

امين

MMamdouh