الموضوع: حادث سطو مسلح + التفاصيل والصور-واقعه حقيقية

بسم الله الرحمن الرحيم
بداية اتوجه بالشكر لكل اعضاء المنتدى الكرام الذين توجهوا لله بالدعاء من اجلي وجعله الله في ميزان حسناتكم جميعا
............................
القصه بدأت يوم السبت الماضي 26/1/2013
اتفقنا انا وصديق ليا نروح كارفور نجيب شوية طلبات للبيت
خرجنا من الشرقيه الى العبور طريق الشرقيه بلبيس القاهرة الصحراوي
وصلنا كارفور وتسوقنا وخلصنا واتعشينا هناك وخرجنا من هناك الساعه 10 ليلا عدينا القاهرة بلبيس الصحراوي واخدنا طريق بلبيس ابوحماد حتى وصلنا الي منطقه اسمها العباسه
في المنطقه اللي هناك
في كوبري على اليمين ده بيودي على اسماعيليه وده الزراعي
لقيت عربيه اسكودا سوداء متفيمه طالعه من الكوبري
عديتها ومشيت ...المنطقه دي متكسرة
فهديت سرعتي
فوجئت بالعربيه بتكسر عليا جامد جدا والازاز نزل وفي سلاح متوجهلنا
ونزلوا جري على العربيه
طبعا ازازها كان مقفول والعربيه اتوماتيك بتقفل عليا اول ما بتحرك
انا اول ما شفت الموقف بطلت العربيه وشديت المفتاح ما طلعش لان العربيه على الغيار المفتاح ما بيطلعش لازم تكون على وضع الباركينج
قعدوا يخبطوا على ازاز العربيه بالاسلحه اللي معاهم ما عرفوش يكسروه
راح الواد اللي ناحيتي ضارب بالسلاح اللي معاه في الازاز بتاعي
انا لقيت وشي مولع في ساعتها والعربيه كلها غرقانه دم الدريكسون والكرسي وايدي
ساعتها بس انا كنت بدأت افوق من الخضه وافهم واستوعب ان انا باتعرض لسطو مسلح
بعد ما كسروا الازاز ما عرفوش يفتحوا العربيه
لان الزرار اللي بيفتح الابواب فوق الكاسيت
المهم وجه السلاح ناحيتي وقاللي افتح فتحتله الباب شدونا ونزلونا وركبوا العربيه
قعد يحاول يدور فيها ما دارتش
لان العربيه كانت على ال direct
قعد يجيبها على 3 ويدور 2 1 العربيه مش راضيه تدور
حاول يطلع المفتاح ما عرفش لان العربيه واخده غيار
اتشغل بتطليع المفتاح بدل ما يتشغل بتدويرها وهذا من فضل الله علينا
لحد ما جابها على البارك وراح مطلع المفتاح ولو كان دور ساعتها كانت دارت بس الحمد لله المال الحلال ربنا هو اللي بيحميه
ورمى المفتاح تحت الكرسي
واحنا ما نعرفش رماه فين كنا فاكرينه خده
اخدوا الموبايلات والفلوس اللي في العربيه وجريوا

قعدنا نحاول نوقف في العربيات كله خايف يقف
ولكم ان تتخيلوا الرعب اللي احنا فيه لاننا كنا متاكدين ان العربيات دي هنعدي وهيرجعولنا تاني ويتسلوا علينا
لحد ما ربنا كرمنا بعربيه جيب صاحبها راح جاي واقف وموقف الطريق كله

وجابولنا ميه غسلنا وشنا
وبيتصلوا على 122 ما حدش بيرد اه والله رقم الشرطه ما حدش بيرد عليه
واحد جه قعد ينضف في الدم والازاز لقى المفتاح تحت الكرسي
دور العربيه وقالنا اركبوا واحنا هنمشي وراكم
والحمد لله وصلنا بلدنا لقيت البلد كلها مستنيانا خدونا وصلونا المستشفى وقضينا الليله هناك
اصبت بالكثير من الشظايا في وشي والحمد لله على كل حال
واسلام صديقي اصيب بشظية في عينه وفيها شوية نزيف
........................
.........................
..........................
...............................
وانا راض بقضاء الله يمكن لو كانت العربيه معايا دلوقتي كانت حصلت مصيبه اكبر من كده
الف حمد وشكر ليك يا رب
جعلت امري كله خير
صابر .... راض .... محتسب
...............
..................
................
........
...............
.....................