زواج المصري من أجنبية.. ليه؟
من خلال شغلي في شركة يعمل في أجنبيات بعدد لا بأس به.. عاصرت عدد برضه لا بأس به منهن متزوجات من مصريين.. مصريين عاديين جدا تزوجوا منهن في ظروف مختلفة و أنجبوا و عايشين في مصر.. إنما الملاحظ ان نسبة لا بأس بها (الموضوع كده شكله كله هايحتوي على عدد لا بأس به من كلمة لا بأس به) - نسبة منهم حصل بينهم إنفصال و طلاق.. و ده برضه بعدد عدد لا بأس به من السنين.. يعني فيه فضلوا مع بعض 5 سنين.. و فيه 10 و فيه حتى 20 سنة و بعدين الزوج بيكتشف ان فيه فروق جوهرية بينه و بين زوجته الأجنبية.
طبعا ما انكرش ان فيه نسبة أخرى من الأزواج مستقرين.. إنما النسبة دي أقل بكتير من اللي اعرفهم انفصلوا.. طيب ليه أصلا تتزوج واحدة مش من بلدك و لا تمت بصلة لعادات و تقاليد أهلك و بلدك و بعدين تكتشف الفروق بعد سنين طالت أم قصرت؟ ذنبها ايه هي انك انبهرت بالشعر الأشقر و العيون الزرق و طبيعة الشخصة الأجنبية و بعد ما تزوجتها لقيت فيه بينكوا اختلافات؟ و ذنب ايه الفتيات المصريات عشان ولاد بلدهم يسيبوهم يعنسوا (مع اني مش باحب الكلمة دي عندنا تطلق على الفتيات دون الرجال) و يروحوا يتزوجوا واحدة أجنبية :pinch: