غيرت رومبيلات العجل الامامى كلها
السلام عليكم ورحمة الله وبركاتة
من اول ما اشتريت العربيه وانا سامع صوتها عالى وماكنتش عارف من ايه بس كنت بقول يمكن العربيه دى صوتها كده وماتورها عالى
وبعدين كنت بستغرب لان الصوت مش بيبدأ الا من عند 50 كيلو ويبتدى يزيد عند 60 و80 و90
و90 دى العربيه تبقى طايره منى ومش حاسس بأمان
وكمان لما كنت بمور الاقى الصوت ما رحش قولت يمكن الماتور مش بيقل بسرعه
روحت للميكانيكى اللى بتعامل معاه قالى تعالى نجرب قولتله سوق انتا
طلع معايا جرى وفرك بالعربيه لانه كان بيحسبه ديسك واسطوانه قالى زى الفل ما فيهمش حاجه
الحمد لله :w6266d
وبعدين قعد يجرى على البحر بالعربيه ويمور قالى رومبيل قولتله بجد مش الماتور ؟ :fdsa:
طبعآ انا فرحت الحمد لله جدآ لان انا لو كان الماتور كنت هبقى زعلان اوى لان بحب العربيات الناعمه
رجعنا الورشه رفع العجله اليمين وجاب اول فى تانى فى تالت فى رابع لقى الصوت عالى
قالى تعالى نشوف العجله التانيه قولتله فل
رفع واول فى تانى فى تالت فى رابع طلع الرومبيل التانى كمان بالسلامه يا فلوس :B4_611:
روحت جبت اربع رومبيلات كل عجله اخدت اتنين وغيرتهم امبارح الحمد لله
وطلعت اجرب سبحان الله فرحت بالعربيه جدآ والله الحمد لله
فعلآ الرومبيلات دى ممكن تحسسك انك راكب عربيه جاز مش عربيتك
بس قالى بقى المساعدين ناشفين وغيرهم وبيض المقصات وحش هتحتاج مقصين جداد :D
يعنى ايه المساعدين ناشفين ؟
والمساعدين الجوز والمقصات يعملو فى حدود كام ؟
