الموضوع: مهزلة غبور = العربية فى التوكيل من شهر ونصف ولم ينتهوا من التصليح

السلام عليكم

مهزلة جديدة من مهازل هيونداى غبور

هحكى لكم مهزلة من مهازل غبور وفروع صيانتة والمهزلة مازالت مستمرة حتى الان فى اكبر توكيل فى مصر واكبر شركة بتبيع عربيات فى مصر

حدث لى حادث فى عربيتى النترا 2013 ودخلت فى الرصيف بتاريخ 19-12-2012 الحمد لله على كل حال وطلعت سليم

وحدث طبعا عدة اصابات فى العربية فى الاكصدام الامامى وفوانيس الشبورة والكلاكس والبلاستيكات التى اسفل الماتور وخبطة فى مقدمة الفتيس وهذة هى المشكلة الاكبر

قمت بسحب العربية وروحت الى فرع غبور الجديد اللى على طريق الاسماعيليةلانة قريب منى تفاجات بانهم يقولون لى اننا مش بنشتغل فى الحاجات دية لسة الاجهزة لم تركب وبنشتغل الصيانات البسيطة ( مع انة بقاله ما يقارب من سنة شغال وبحجم خرافى )
المهم جيبت عربية قطر واخدت العربية وروحت على قليوب

من وقت ما دخلت التوكيل فى قليوب = تحس ان مهندسى الاستقبال مش عاوزين يستقبلوا العربية ولا عاوزين يشتغلوا مش عارف لية وكانى جايب لهم عربية فيات ولا مرسيدس وجاى اصلحها عندهم
كل واحد يقولك انت مين وهات 2200 جنية تامين لو ما اتصلحتشى وكلام غريب مع ان العربية كلها عندهم انا مش هخطفها واجرى ومامن عليها مش هضحك عليهم

المهم بعد ساعتين من الخناق مع مهندسى الاستقبال ومدير الاستقبال ودخلت العربية وكان دة يوم 20-12-2012 وكان يوم خميس
وقالوا يوم الاحد هنعمل مقايسة وشركة التامين تيجى توافق

روحت من الساعة 9 الى التوكيل فى قليوب وانتظرت ساعتين علشان اخد مهندس يشوف العربية ويعمل مقايسة ويشوف هتحتاج اية علشان التامين
المعاينة كانت شئ مضحك بص ليها من برة وقراء المحضر وكتب اللى تالف من خلال المحضر وكسل يبص اسفل العربية مع ان هيا الخبطة من تحت العربية تمام من برة مفهاش خدش
راح جاب فنى علشان يبص الفنى بص بصة سريعة بدون ما يرفع العربية – مش عارف ازاى مع ان العربية مخبوطة فى الرصيف من الاسفل

الفنى قاله عاوزة كذا وكذا وقال للمهندس كلمة تبين الاحترام المتبادل بين العاملين قاله( هتعرف تكتبهم يا بشمهندس ولا اكتبهملك ) احترام احترام يعنى
لما وجدت الوضع بالشكل دة قلت له على اشياء لم يكتبها من استعجالة

بعد المقايسة قال هيتغير ( اكصدام امامى – فوانيس شبورة – كلكس – شوية قيبر اسفل الماتور – وجزء من الفتيس الاوتوماتيك اسمة بلف بادى – بالاضافه الى مصنعيات كتتتتتتتتتتتير)
يعنى مبدئيا داخلة فى 30 الف جنية المقايسة - قدر الله وما شاء فعل

التامين جاء اخر اليوم ووافق على المقايسة وكان دة يوم الاحد

وقالوا هنبدا من يوم الاتنين عمل فى العربية بتاريخ 21-12-2012 وهتخلص على اخر الاسبوع ( حتى الان كويس )

اتصلت بعدها بيومين اشوف اية الاخبار قالك مفيش قطعة غيار بتاع الفتيس وهنحتاج نعمل لها اورد من كوريا – قلت ماشى بتحصل هتيجى امتى قالك اسبوعين بالكتير وكانت هذة اكبر كدبة فى غبور
كل اسبوع اتصل يقولى اخر الاسبوع يا باشا هتوصل وتابع معايا واسبوع وراء اسبوع ولا اسبوع لغاية ما عدى 4 اسابيع لغاية لما وصلت القطعة
طبعا خلال هذة الفترة اتصلت 10 مرات عملت شكوى وكلمت مدير بتاع خدمة العملاء والجميل كل واحد يقولك هرد عليك يا فندم خلال دقائق ومحدش بيسال ولا حد يقولك اية اللى بيحصل
مش عارف لية امال عاملين خدمة عملاء لية وانتوا مش هتحلو شئ ولا هتكلموا حد – تحس انك شغال فى هيئة حكومية درجة تالتة

واحد فقط اللى كلمنى يوم ما وصلت القطعة بعد ما يقرب من اربع اسابيع

دة كان الاسبوع الماضى وقالولى يوم 20-1-2013 كان يوم الاحد يعنى بعد شهر من دخول العربية
قالولى 4 ايام وهتخلص ووجدت انهم من وقت ما دخلت العربية معملوش اى شئ اصلا يعنى خلال شهر فى التوكيل ومحدش خلص ولا الاكصدام ولا الفوانيس ولا اى شئ وكأن قطعة الغيار بتاع الفتيس مرتبطة بتركيب الاكصدام

منهم لله وحسبى الله ونعم الوكيل

بعد عدة مكالمات للى ماسك الورشة ومحايلات قالى تعالى يوم الاربع الماضى علشان تستلم العربية – كلمت شركة التامين وروحت من الصبح وجدت العربية على جهاز الزوايا
واللى ماسك شغل الورشة بيقولى لما شغلنا العربية وجدنا فية زيت بينزل من الفتيس ومحتاجين تغغير حاجات فية ومحتاجين حاجات تانية خالص ( زهرة فتيس – فيبرة جديدة – حساس حرارة – قاعدة خلفية للماتور )

اكتشفوا كل دة بعد ما ركبوا مع ان الحاجات دية كانت ظاهرة من الاول ولكن للاسف التهريج والتسرع وعدم مراعاه قواعد عمل المقايسة وعدم رفع العربية للكشف على الاجزاء التالفة سبب كل دة

بعد كلام كتير وقلت ماشى والتامين هيجى علشان يوافق على الملحق دة
وروحت عند بتاع قطع الغيار وقلت لة شوفلى الحاجات دية موجودة وبكام وبعد معاناه وجبنا مهندس علشان يقولة اية القطع دية قالة اه موجودة دة كان الاربع الماضى 23-1-2013

التامين راح ووافق على الملحق وكلمتهم الاحد الماشى 27-1-2013 علشان يبدواء شغل قالى مسئول الورشة يومين وكلمنا
ولانى بقيت خبرة فى العك بتاعهم كلمت الراجل بتاع قطع الغيار وسالتة هل صرفت لهم القطع وكانت المفاجاءة ان قطع الغيار مش موجودة وعمل بيها طلب من كوريا ( طبعا هنا لازم اشتم )

وهنتظر تانى شهر علشان يبجوها – طبعا استبهال مفيش بعد كدة وعدم فهم على كل المستويات اللى يقولك الحاجة موجودة ويعد كدة مش موجودة واللى يقولك بتاع الورشة كلمنى واحنا شغالين مع ان القطعة مش استلمها من المخزن اصلا
تحس ان كل واحد فى عالم تانى ومحدش فاهم حاجة

طبعا بعد اللى حصل دة قولت خلاص متاخر متاخر ومش فارقة ونبداء قلة الادب لان دة احسن اسلوب معاهم وهو اللى بيشغلهم للاسف

كلمت مدير خدمة العملاء وقالى هكلم لك مدير قطع الغيار وهيرد عليا وهو عارف المشكلة من الاول من المشكلة القديمة اللى قعدت شهر وقالى هكلم مدير قطع الغيار – واحد من بتوع قطع الغيار كلمنى وقالى يوم الاحد الجاى هتيجى ( للاسف سمعت الكلام دة كتير )

عملت لهم المشكلة وحطتها على الفيس بوك فى صفحة هيونداى مصر = وجدت واحدة بتكلمنى وقالت واحد من بتاع الشكاوى هيكلمنى ووجدت واحد امبارح كلمنى وقالى هشوف المشكلة وراح كلم مدير بتاع قطع الغيار ورجع قالى انا كلمتة وقالى ان مدير قطع الغيار هيحاول ان القطعة تيجى بدرى شوية بدل ال 20 يوم ممكن تيجى يعد 10 ايام قلت لك مينفعشى الكلام كدة ودية مش غلطتى قالى هكلمة تانى ويقولى بعدها بنصف ساعة كلمنى وقالى انها هتيجى كمان اسبوع ( للاسف كاننا فى فصال) وطبعا انا عارف ومتاكد انها مستحيل هيجبوها خلال اسبوع

عملت لهم شكوى فى صفحة ....... us فى موقع هيونداى العالم مش مصر دة كان يوم الاتنين وحتى اليوم محدش رد عليا بشئ


المحصلة حتى اليوم الاربعاء ان واحد قالى يوم الاحد هتيجى القطعة وواحد قالى يوم الثلاثاء هتيجى وبتاع المخزن قالى مش قبل اسبوعين
مش عارف اصدق مين صراحة

كلمت مهندس سمير الشهاوى = علشان اخد رائية فى هذة المشكلة وكان مشكور قالى اعمل موضوع وانا هكلم اللى اعرفة فى غبور وهيحاول يبعت المشكلة الى مسئولى المبيعات
كلمت مهندس هانى = وكنت كلمته وقت ما حصل الحادث وحذرنى من غبور والراجل قالى انى اروح ابورواش واقابل منير عبور ومسئول الصيانة بتاع غبور ككل

هذا ما وصلت اليه حتى الان يوم الاربعاء 30-1-2013

والمكالمات شغالة والفصال شغال ومحدش عارف ميعاد حتى هذة اللحظة لوصول القطعة – وندعو الله انها تكون اخر قطعة ومش يطلع شئ تانى

انا عملت الموضوع لاكتر من حاجة:

1-بنصيحة مهندس سمير الشهاوى لتبادل الاقتراحات
2-ان الناس تشوف غبور على حقيقتة وتشوف ازاى اكبر واحد بيبيع عربيات فى مصر معندوش قطع غيار – مع انها مش هتبوظ ولا هتتركن عندة ما شاء الله الورشة مليانة عربيات حوادث بكل الاشكال واللوان
وعلى فكرة الحاجات الناقصة عندة دية موجودة فى الحرفين بكثرة وسالت عنها وموجودة وبربع ثمنها فى التوكيل
3-كل واحد ياخد باله قوى فى التعامل مع الوكيل ويمشى معاه فى كل خطوة لان للاسف مفيش حد بيعمل بشكل سليم ولا بيراعى ربنا فية
4-كل واحد ميسبشى حقة معاهم لانهم بياخدوا حقهم يزيادة قوى والحاجة اللى بتتباع بجنية بيبعها بعشرة جنية وغصب عنك وبدون مناقشة
5-واخيرا يمكن لما كل الناس تعرف حقها هما يعرفوا شغلهم ويراعوة شوية


معلشى ان كنت طولت عليكم بس حاولت اعرض المشكلة بكل التفاصيل والمواعيد علشان مبقاش ظلمت حد او افتريت

دة اسمى ورقم تليفونى لو حد عاوز يساعد او يعرف اى شئ او عندة نفس المشكلة

م: خالد الدسوقى
موبيل : 01280000515

ياااااااااااااااه على المعاناه قلبى معاك

بس والله الحكايه مش حكايه غبور بس ............. اصل الحكايه ان هو ده المصرى = قلة ضمير وكدب ونصب وخداع وقلة ادب الالا من رحم ربى