اعضاء



بقالى كتير غايب عنكم قولت مرجعش وايدى فاضية

من يومين كدة كلمت المهندس هانى
Speed Service Center

واتفقت عليه على عمل الصيانة بتاعت ال 70000 كم
ومفروض فى الصيانة دى نغير فلتر هواء وبوجيهات وتيل فرامل بس

روحت اشتريت الحاجة وطبعاً زى ما التجار بيقولوا قطع الغيار غليت 15% علشان الدولار
مش عارف الدولار يزيد 10 قروش يولعوا هما قطع الغيار كدة
ما علينا
اشتريت البوجيهات الاصلى بتاعت العربية




واشتريت تيل فرامل امامى موبيس






واشتريت فلتر هواء موبيس





بعد كدة روحت لهانى

وطبعاً زى ما البشمهندس هانى اعلن عن تركيب كوريك فى المركز
وكمان مكان استراحة للاعضاء دون اى تكلفة اضافية على العملاء
قولت اصور لكم الحاجات دى علشان محدش عمل عنها تقرير من يوم ما ركبت

اول لما دخلت قولت اصور الكوريك والاستراحة للاعضاء









ودى الاستراحة قاعد فيها هانى واخويا الكبير :))




بعد كدة
العربية اتحطت على الكوريك وبدأ الشغل











هانى شغال بنفسه فى العربية :))











وغير البوجيهات ودى البوجيهات القديمة





فلتر الهواء مع انه عامل 20 الف كيلو بس منيل بنيلة




وغير التيل ودى التيال القديمة
الحمدلله لسة كان فيها كتير



وهنا كانت اللطمة الكبرى لاقيت وائل الصنايعى اللى عند هانى بيقولى كريم باشا العربية محتاجة طقم مساعدين امامى وطقم بيض طرف وطقم مسامير ميزان

طبعاً انا حسيت كأن حد ادانى بخرطوش فى عينى
ناديت على هانى وقولتله تعالى بص كدة
قالى يا كريم المساعد جايب زيت والتانى خفيف
قولتله بعد 66 الف كيلو مساعد يضرب
قالى عادية فى ظل سوائة حضرتك وكمان شوارع بلدنا
بس انا والله ما باخدش مطبات غير نادر جداً بس لاجل الحلفان لابس مطب على 100 مكنتش شايفة وملحقتش افرمل ممكن دة اللى يكون عمل كدة

قالى كمان اعمل حسابى بعد شوية كدة اغير تيل خلفى لانه قرب يخلص

ما علينا
اتفقت مع هانى انى هنزل اشترى الحاجة واجيلة تانى يوم
نزلت الف على الحاجة

جبت طقم المساعدين Mando
علشان الاصلى ناقص
وكلمت هانى قالى يا كريم الماندو حلو
قولت اتوكل على الله



وجبت طقم مسامير الميزان نوع اسمه CTR
ودة اللى هانى كان طالبه



وجبت طقم البيض نوع كورى علشان الاصلى مكانش موجود CTR بردو


وجبت التيل الخلفى موبيس بردو






وروحت لهانى تانى

وبدأ الشغل







فك المساعد القديم وزى ماهو ظاهر ضارب زيت من كل حتة

وبدأ فى تركيب المساعد الجديد









هانى وهو بيزلنى بقطع الغيار القديمة والجديدة والفرق بينهم
هههههههههههه









دة المساعد الملعون
الى جهنم وبئس المصير هههههه





دة بيض الطرف الجديد



دة القديم



دة القديم والجديد والفرق بينهم





ركبوا بعد كدة التيل الخلفى ودة القديم




الحمدلله خلصوا العربية وبعد كدة العربية اتحطت على الكمبيوتر



سجلت error على الباور الكهرباء EPS
وهانى عمل calibration له والحمدلله ظبطه

غسلوا الماتور




وخدت بعض ومشيت

نيجى بقا للتكاليف

اولاً تكاليف قطع الغيار :

1- طقم مساعدين امامى ماركة Mando
470 جنيه

2- طقم بيض طرف CTR
135 جنيه

3- طقم مسامير ميزان CTR
130 جنيه

4- تيل خلفى Mobis
125 جنيه

5- تيل امامى Mobis
125 جنيه

6- فلتر هواء
75 جنيه

7- بوجيهات
80 جنيه

============

الاجمالى :
1140 جنيه


ثانياً المصنعيات :

50 جنيه صيانة ال70 الف
20 جنيه تغيير تيل خلفى
80 جنيه تغيير طقم مساعدين امامى
25 جنيه تغيير طقم بيض طرف
25 جنيه تغيير طقم مسامير ميزان

طبعاً الاسعار دى من غير خصم نايل موتورز

واحب اشكر المهندس هانى على تعبه معايا
واقولك يا هانى انك بجد اكتر من اخ والله
ربنا يعلم معزتك عندى قد اية
بس لو قولتلى حاجة تانية بايظة فى العربية هفجرلك المركز بتاعك


واسف على الاطالة بس كنت عايز اقدملكم تقرير مفصل مصور
علشان اى حد يحب يستفاد من التجربة
بالتوفيق للجميع

تحياتى
اخوكم فى الله
كريم فوزى
منسق مساعد قسم هيونداى

واقعدوا بالعافية :)))))))