بسم الله الرحمن الرحيم
وبه نستعين
بناء على طلب اعضاء كتير عن معرفة جوان وش السلندر وكيفية معرفة اذا كانت العربية فيها جوان ولا لأ , عملت موضوع عشان محدش يشتغلكم تانى وتبقوا عارفين كل حاجة :
اولا : اسباب تلف جوان وش السلندر :
1- سبب تلف جوان وش السلندر الاصلى هو نقص المياة بشكل ملحوظ واستمرار دوران المحرك مما يؤدى الى ارتفاع درجة حرارة المحرك , مما يؤدى الى تلف الجوان , واذا استمر عمل المحرك اكثر يؤدى الى عمل اعوجاج فى وش السلندر
2- ارتفاع درجة حرارة المحرك بصورة مفاجأة , وذلك نتيجة لوجود قصور فى نظام دورة التبريد فلا تستطيع تبريد المحرك بصورة كافية , فالجوان يتلف بصورة مفأجاة بعض مثلا الضغط لفترة على المحرك للتسارع ( وهذا السبب يكون نتيجتة تلف الجوان فجأءة بدون سابق انذار )
ثانيا : كيفية معرفة اذا كان هناك تلف فى الجوان ام لأ :
1- نقص مياة بصورة واضحة حتى وانت واقف على السلانسية مش لازم تتحرك بالعربية , وطبعا مؤشر الحرارة بيرفع عن الطبيعى ودية بتبقى اخر مرحلة للجوان ( الجوان جاب اخرة خلاص )
2- المكنة بتتعب على ماتدور بدون سبب اخر , ودة راجع بسبب كبس المحرك
3- فية عندك تسريبين من الجوان ( مياة - زيت ) بمعنى
- ان ممكن الجوان يضرب ومش شرط , يدخل الزيت على المياة او العكس , لان كدة الجوان ضرب من ناحية مجرى المياة , ودة لما بيضرب بيسرب المياة على البساتم فالمياة بتنقص بسرعة جداااااا
- ان الجوان يضرب من مجرى الزيت ودة اللى بيعمل خليط بين الماء والزيت , وبيكون طبعا اثرة واضح جدا ( على غطاء وش التاكيهات - القربة - الزيت - مياة الردياتير ) بيعمل لون بنى فاتح او زى مابنقول طحينى
4- فى اول بدايات الجوان بتيجى عند سرعة مابعد 100 كم وتلاقى العربية رفعت بدون سبب , حتى بعد تنظيف الردياتير
5- نقص فى مياة الردياتير , والمياة ثابتة فى القربة , ودة طبعا راجع لان مع ضعف الكبس الموجود فى الدورة , فلا يستطيع ان يضغط على فالف غطاء الردياتير حتى يغلق ويسمح بمرور المياة بداخل القربة ليتم التخلص من الضغط الزائد والحرارة واعادتها مرة اخرى للمحرك لتأخذ الدورة مرة اخرى , وطبعا دة بيحصل مع التأكد من عدم وجود تسريب او تلف فى غطاء الردياتير
6- سبب اخر هو بعد الوصول لدرجة الحرارة الطبيعية وبالتحديد بعد مرور 20 دقيقة , من تسخين المحرك , اذا تم الضغط على الخرطوم العلوى وتم ايجادة طرى ويسهل الضغط علية بكل سهولة , وعند التأكد من عدم وجود عيوب فى دورة التبريد ( تنفيس ) يبقى كدة دة جوان وش سلندر تالف
دية الاسباب اللى تعرف بيها ان العربية فيها تلف جوان وش السلندر
ثالثا : كيفية اصلاح تلف جوان وش السلندر ( شامل الاسعار ) :
1- يتم تبريد السيارة تماما حتى تكون درجة حرارة المحرك اقل من 35 درجة مئوية
2- فك وش السلندر والذهاب بة اللى الخراط , للقياسة والتأكد من سلامتة وعمل تنظيف لة اذا تم التأكد من سلامتة , ثم عمل معاينة لبلوكة الماتور للتأكد من سلامتها ايضا وتنظيفها من اثار الجوان
3- فى حالة وجود اعوجاج فى وش السلندر يجب تغير الوش بواحد اخر استيراد وذلك لعدم التأثير بعد ذلك على اداء السيارة ( لا افضل بأى حال من الاحوال تركيب جوانين )
4- بعد ظبت وش السلندر والتأكد من سلامتة هو والبلوكة , يتم تنظيف كامل لدورة التبريد , والكشف على ترس طلمبة المياة , وسلامة ثرموستات الكوعة , وثرموستات المروحة , يجب مراجعة كل خراطيم دورة التبريد واى خرطوم يكون طريا حين الضغط علية يجب تغيرة فورا لان مع احكام الكبس بعد الجوان يجب ان يتحمل الخرطوم قوة الضغط القوية
5- يفضل تغير مسماير جوان السلندر لانها مع الحرارة اللى تعرضت لها ممكن ان تفقد صلابتها
6- يجب تغير جوان السلندر ( يفضل الاصلى ) او اليابانى
7- بعد تركيب وش السلندر والتأكد من عدم وجود تسريب , يجب عدم الضغط على السيارة لمدة اسبوع او ( 500 كيلو ) ايهما اقرب , والسير بدون سرعات عالية او حرق على الغيارات حتى يتم تطبيع المكونات الجديدة وتوافقها مع بعضها
8- بعد مضى اسبوع او 500 كيلو يجب ان تذهب مرة اخرى الى الميكانيكى ليتم ربط مسامير الجوان مرة اخرى لاحكام ربطها بعد عملية التطبيع
9- عمل كبس لدورة التبريد للتأكد من سلامتها 100%
10- تغير البوجيهات
11- يفضل تغير الزيت والفلتر فى حالة اختلاط الماء والزيت
او تغيرة مع الفلتر بعد 500 كيلو من تغير الجوان فى حالة تلفة من مجرى المياة
وهكذا تكون قد انتهيت من عمل جوان وش السلندر
رابعا : المدة التى تستغرق فى اصلاح جوان وش السلندر :
* المدة تكون من يوم الى يومين على الاكثر
خامسا : اسعار القطع التى سوف تشتريها لتصليح الجوان
1- جوان وشد سلندر : اصلى ب 275 , يابانى ب 85 جنية , تايوانى ب 40 جنية ولا انصح بة
2- مسامير جوان وش السلندر : 50 جنية استيراد
3- طلمبة مياة ان احتاجت : يابانى ب 185 جنية , واصلى ب 275 جنية
4- بوجيهات : 75 جنية بكود bkr6e-n11 ngk
سادسا : اسعار المصنعيات :
1- حساب الميكانيكى لوحدة : 200 جنية
2- حساب الخراط : 100-150 جنية
فى ميكانيكة ودول اغلبيتهم بياخدوا المقاولة كلها على بعض , بس نصيحة منى لازم تتأكد من دة بنفسك
ملحوظة : لازم انت اللى تشترى قطع الغيار , لاززززززززززززم
هذا الموضوع من مجهودى الخاص واهداء منى الى نايل موتوزر واخوانى فى المنتدى عموما وقسم هوندا خصوصا
وارجو ان يكون عجبكم , وان شاء الله تستفادوا
والذى يتم نقل هذا الموضوع فى اى منتدى اخر , ان يكتب علية منقول