الموضوع: الحقونى مشكلة فى نقل رخصة العربية

السلام عليكم

أخي الفاضل لو ورق العربية لتحرق في ايام الثورة يبقي لازم تاخد معاك العربية لمرور اسماعيلية عشان هيفحص هناك و هيعملها ملف بالفحص ده عشان يسجل العربية من جديد لأن حاليا عربيتك من غير ملف و لكن ليها رخصة هيتم الاستعلام عنها امنيا من ضابط وحدة المرور و طالما مش مسجله مسروقات هيتعمل الملف و هتخلص المطابقة

في بورسعيد المفروض انك رايح تفحص موتور و تعمله افراج جمركي يبقي لازم العربية عشان يطلع رقم الموتور منها و يعملك افراج جمركي

يبقي في كل الحالات هتحتاج العربية معاك عشان تضمن علي الأقل انه لو خلصلك افراج من غير فحص تبقي خلصت بدل ما تروح من غيرها و ترجع تاني

قصص المرور بتختلف و الافراج الجمركي كذلك كل واحد و هواه و كل وحده بمزاجها ممكن تمشيلك الورق و ممكن تعقده و لكن موضوع الفحص بعد الملفات المحروقة ده لازم تاخد العربية فيه لكل مكان عشان يتعملها ملف جديد

بخصوص صلاحية شهادة براءة الذمه فدي مش مشكلة لأنهم بيعدوها كتير حتي لو عدت وقتها و انت و حظك مع الموظفين لأني و انا بنقل عربيتي حصل معايا نفس الموقف و عدت اسبوع و الظابط و الموظف قالولي مش مشكلة هنمشيها
لو عقدت معاك يبقي طلع براءة ذمة جديدة و خلاص ... و خليك صبور لأن قصص المرور دي هي اسوأ ما نعيشه كمالكي سيارات تبقي كابوس لسوء الادارة و النظام عندنا في مصر و ربنا يصلح الحال و تتظبط
و بالتوفيق ان شاء الله