غيرت طلمبة المياه : الحكاية والأسعار
السلام عليكم
من اسبوعين كده غيرت الزيت من موبيل وان (5000) إلى زيت كسترول (3000) في عربيتي الاسترا ال 1200 موديل 2000. لاحظت بعدها بيومين ان صوت الموتور عالي اوي لدرجة ان الناس بقت تتفرج عليا في الطريق. المهم روحت الميكانيكي (مش متخصص اوبل بس انا بظبطه يعني) فتح الكبوت قالي طلمبة المياه بتودع خلاص وفي صوت خشانة عالية. المهم اتفقت معاه ان اجيله يوم الخميس (امبارح) علشان نعملها. روحت جبت طلمبة ماركة هيبو hepu الماني من عند خميس الصعيدي في صلاح الدين ب 350 جنيه. روحتلوا على الساعة 1 كده قالي سيبها وتعالى خدها الساعة 7. قلتله لا يا باشا انا قاعد معاك ان شاالله تخلصها الساعة 12 بليل. يظهر اتخنق مني قام اشتغل فيها على الساعة 2 كده مفيش ساعة زمن كان ركبها. وهو بيركبها قالي انا حلغيلك الترموستات يا باشا علشان ده بتسخن العربية وكده كده بتاعتك بتودع. وافقت بس مكنتش فاهم ساعتها. كمان بالمرة روحت مغير زيت وجبت فلتر وزيت شل 5000 ب 120 جنيه من بنزينة شل اللي في الحضرة على المحمودية. الراجل دور طبعا الصوت بقى هااااااااااااااادي جدا بشكل فرحني قوي. بس العربية مش بتسخن بسرعة. اخدت العربية ولفيت بيها شوية بس الموتور بيبرد. روحت بليل قاعد على النت على المنتدى وعلى المواقع وكده لقيت ان خطر قوي موضوع شيل الترموستات ده. معرفتش انام بصراحة لاني سمعت انو بيسحب بنزين اكتر علشان الموتور بارد وكمان بياثر سلبيا على عمر الموتور. روحت قايم الصبح رايح اجيب الكوعة بالترموستات بتاعتها لقيتها ب 150 جنيه (ماركة الماني اسمها هيبرو او بيهرو حاجة زي كده). رحت للباشا قالي يا عم سيبك منهم قلتله بص ركبها وملكش دعوة. طبعا الحرارة رجعت زي الاول وبقى صوت العربية ناعم اوي بصراحة لدرجة اني مش عارف العربية دايرة ولا مبطلة وانا جوة العربية.
التكاليف
طلمبة مياه 350
كوعة بالترموستات 150
مصنعية 100
زيت شل 120
فلتر زيت الماني 40
760 جنيه
دلوقتي في كذا استفسار
اولا: في بخار زيت على جوان التكيهات وكمان على جوان التقسيمة دول علاجهم ايه وكمان مصنعيتهم كام
ثانيا: لو حبيت اغير مساعدين اجيب ايه علمان بان المساعدين الساكس sachs ب 800 اللي قدام
ثالثا: علبة الشكمان اللي قدام لو حبيت اغيرها اجيب ايه
شكرا وربنا يكرمكم
