رسالة إلى كل من يفكر في اقتناء الفورتشنر .. تجربتي قبل ان تندم
رسالة إلى كل من يفكر في اقتناء الفورتشنر .. تجربتي قبل ان تندم
http://t3.gstatic.com/images?q=tbn:A...Bza88jyNG1yWeK[/CENTER]
بسم الله الرحمن الرحيم
هذي رسالة لكل من يفكر اوخطرت في باله فكرت شراء فورتشنر
سأذكر لك تجربتي بالتفصيل :-
انا طلعت فورتشنر 2012 6 سلندر لون فيراني ( اسود فاتح ) ومواضب على صيانة الوكالة حتى صيانة ال30ألف .. لكن لاحظت اشياء في السيارة تمنيت اني عرفتها قبل ما اشتري السيارة .. ممكن البعض يشوف انها عادية لكن بالنسبة لي هي طامة .. لدرجة اني الان افكر ابيع السيارة بسببها .. البعض منكم بيضحك لكن هذا الواقع المشاكل الي طلعت لي ما اقدر اتحملها في السيارة لاني انسان احب الهدوء في السيارة اثناء القيادة
رحت للوكالة بسبب الاصوات الي طلعت في المكينة لما اكتم عليها والاصوات اللي تطلع لي من عند الكبوت والكفر الامامي الايسر كأنها صوت صرصرت حديد واصوات في المراتب الخلفية مع العلم اني ربطتها زين أكثر من مره يعني مستحيل تكون متفككه
لما ركب معي المهندس الله لا يبارك فيه " كل ما سمع صوت يقول لي هذا طبيعي وكل الفورتشنرات كذا .. طيب هذا الصوت ؟ بعد هذا طبيعي .. كل شيء عنده طبيعي
وعشان يثبت لي دخلت معه للصيانة وركبت فورتشنر 2011 وجربت الاصوات صوت القير نفس مشكلتي قلت له ليه ما تصلوحنها قال لي ما تتصلح قلت له الاصوات الثانية موب موجودة في هذي السيارة .. قال لي لا عادي موب كل الفورتشنرات فيها
رفع ضغطي اقسم بالله كل شيء عنده طبيعي ..
والاصوات الي اقصدها كالتالي :-
1- صوت طقه في القير
2- لما امسك فرامل بهدوء عند اشارة وتوقف السيارة تماما كأن واحد صدمني من ورى ترجف السيارة بشكل غريب
3- اصوات كأنها الرمانة خربانه
4-اصوات ديكور حفلة صاخبة موب سيارة
5- اصوات في المراتب الخلفية
6- صوت صرصرة عند الكفر الامامي ( سألت ورشة قال لي الاغلب ان المساعد خربان )
7- مرتبتي الظهر حقها طلع من مسارة
8- قبل فترة طاحت القزازة حقتي ( حقت السواق ) رحت الوكالة قالوا لي مساميرها تفككت .. ياحبيبي على العذر ( عذر اقبح من فعل )
9- ياي خلفي ضعيف ما يتحمل ابدا على طول يطيح مع اقل تحميل
10- صوت مساعد الشنطة مزعج اذا جيت افتحها كأنها السيارة 2001 موب 2012
11- ملزم انك تعبي 95 واذا عبيت 91 استلم الاصوات المزعجة .. زيادة على الاصوات اللي فيه
^^
كل العيوب مع العلم ان السيارة 2012 ولا طبت البر إلا 3 مرات فقط وكلها خايف عليها ما جلدت عليها صح
والوكالة كل مشكلة يبوني آخذ لها موعد يحسبون الواحد فاضي لهم 24 ساعه
الايجابيات من باب احقاق الحق :-
1- سعر رخيص مقارنة بصبر المكينة وتحملها عبر الزمن
2- مكينة حلوه في الطعوس
3- رباعي مستمر مريح في البر بدون تنسيم الكفرات
4- تحميل عدد ركبات جيد
5- صرفية بنزين متوسطة
6- تانكي نوعا ما جيد ( يمشيك 450كيلوا تقريبا )
.
.
إلخ
هذي تجربتي واتمنى تتقبلونها بصدر رحب و والله ما حطيتها إلا حب فيكم ولا ابي احد يطيح في نفس تجربتي
وتبا لعبداللطيف قبيح ( قال افضل صيانة قال )
شكرا المصدر ( تويوتا فور عرب)
