اول مرة اسافر بالكارينز

**mido_a_s** · 02-02-2013 01:21 PM

السلام عليكم ... عربيتى يا جماعة كارينز 2013 اول فئة اتوماتيك وكيل
المهم يوم الخميس الى فات كان اول سفرية ليا بجد بالعربية
العربية عاملة حوالى الفين كيلو قبل السفر
طلعنا على الساعة 4 ونص تقريبا الفجر من اسيوط الى القاهرة على طريق الجيش الجديد ( الكريمات)
عربيتين ورا بعض اوكتافيا فانتازيا 2013 وعربيتى
انا كنت مفول من اسيوط بس لفتلى مشوارين كده على السريع ويعنى كان التنك شبه مفول
المهم طلعنا وكده وكنا ساحبين على 150 - 170 حوالى نص ساعة او اكتر شوية وبصيت لقيت تقريبا التنك ربعه فضى !!! استغربت وفضلت ماشى على نفس الوضع لقيت البنزين بيتاكل اكل مش عادى !!!!! بمعدل 170 كم فى العشرين لتر !!!(ده تقريبا طبعا يعنى ممكن يكون اكتر ( طبعا لما شفت كده هديت السرعة ومشيت على 120 وده الى سترها معايا لغاية ما وصلت حلوان وهناك فولت واكتشفت ان التنك لسه فى حوالى 20 لتر ....
الغريب قووووى بقه انى فى القاهرة وبعد التفويلة دى اخدت على الدائرى رايح جاى حوالى 160 كم وكل ده وعداد البنزين رف رفة بسيطة قوى عن الفل تانك !!! وبصراحة انا سبت العربية هناك فى القاهرة عشاان تتصلح فمجربتش لسه وانا راجع ومش عارف ايه السر فى الى حصل ده ...يا ترى ممكن البنزين فى حاجة بتاع اسيوط عن القاهرة ولا يمكن العربية لما هبدت المشوار فاااقت كده وراقت ...يا ريت تقولولى رايكم ايه؟؟
اه ..كمان ملحوظة صغيرة الاعربية اتوسخت قوى ف المطر بتاعت يوم الخميس واكتشفت ان كل العربيات الكارينز كتوسخة بالشكل الغريب ده والظاهر ان ده عيب فى التصميم

**mohammedabdallh** · 02-02-2013 02:02 PM

احسن استهلاك بنزين عند سرعه 96
اكتر من كدا استهلاك البنزين بيعلى

**Land_Cruiser** · 02-02-2013 02:08 PM

بالنسبه لموضوع ان العربيه اتوسخت جامد ده مش عيب كارينز .. ده عيب بلد يا باشا. الشوارع مليانه طين و تراب و ما بتتنضفش فطبيعى جدا ان كل العربيات تتبهدل بس حضرتك ممكن تركب دلايات لو ماكنش عندك ودى بتقلل من تطاير الطين من الكاوتش على جسم العربيه بس طرطشه العربيات اللى حواليك عليك و هى ماشيه دى بقى اللى ملهاش حل

**hossam_elwani** · 02-02-2013 03:12 PM

المشاركة الأصلية كتبت بواسطة mohammedabdallh

احسن استهلاك بنزين عند سرعه 96
اكتر من كدا استهلاك البنزين بيعلى

كلام سليم انا عندى فعلا الاستهلاك فى الكروز على السرعه دى اقتصاديه للغايه قراءة الكمبيوتر على 7.2 لتر لكل 100 كيلو

**AlGazar2** · 02-02-2013 03:35 PM

طبيعى يا باشا الاستهلاك ده خصوصا ان انت كنت ماشى بسرعه لاول مره يعنى بتفتح الموتور و الاستهلاك كده على السرعه دى ممتاز طبعا 180:200 كيلو فى الصفيحة على سرعه 150:170 بعربيه اوتو بحجم الكارينز

و وانت راجع هتلاقى الاستهلاك قل سنه كمان عشان الموتور اتفتح اكتر و هيظبط بعد 5 الاف

**S O P H O S** · 02-02-2013 04:08 PM

السرعة العالية اكيد بتسحب بنزين اعلي
وكمان العربية تقيلة فأعتقادي ..

**محمد بدر** · 04-02-2013 10:52 AM

ما لحظته فى سيارات مختلفة
فى حالة السرعة لاتتعدى 90 كم فى الساعة وطريق مفتوح تلاقى إستهلاك البنزين اقتصادى بشكل رهيب (متوسط إستهلاك 7لتر / 100 كم)
ونفس السيارة فى حالة السرعة تتعدى 120 كم فى الساعة الإستهلاك بيزيد بشكل ملحوظ جدا" متوسط الإستهلاك ممكن يزيد عن 11 لتر / 100كم )

**mohamed_selim** · 04-02-2013 11:06 AM

الكارينز لحد 110-120 استهلاك ممتاز بيوصل معايا لحوالى 240-250 كيلو فى الصفيحه
اكتر من كده لو ماشى 140-160 الاستهلاك الىل بتقوله طبيعى !
لو فى هوا فى وشك الاستهلاك هيزيد برضه
على الدائرى كنت ماشى على كام؟
بالنسبه للتفويله فى اسيوط فصل او ل ما المسدس فصل ولا كمل .. و فى القاهره؟ اول فصله للمسدس بعديها 10 لتر على الاقل و المؤشر مابيتحركش خالص وانت بتستخدمهم