عين الجمل وحسد السيارات حقيقة ام خيال ؟
السلام عليكم
من الافتكاسات المصرية اطلاق مصطلح عين الجمل على الحاسد و هو مصطلح دارج بالاكثر على عالم السيارات ، فعندما يحدث شئ لا قدر الله في سيارة احد يقول عين الجمل اصابتني
https://fbcdn-sphotos-c-a.akamaihd.n...07461315_n.png
و مما هو جدير بالذكر ان المصريين ليهم افتكاسات رهيييييييييبة جدا تصل لدرجة الخيال العلمي احيانا و لا انسى ابدا صديق لي نصحني باني اذا دوست على قطة و ماتت لازم اجيب حصيرة و اوديها لجامع اسمه الحصري في السيدة زينب و الا ........... ستنتقم مني القطة !!!
مش عارف هتنتقم ازاي لكن دا معتقد راسخ عند ناس كتير و طبعا مسكناه تريقة لكن هو مقتنع تماما .
ايضا دبح ارنب او فرخة او اي دبيحة و تلطيخ السيارة الجديدة بدمائها و ال ايه علشان الحسد و تتحفظ و طبعا دا شرك واضح و صريح لكن للاسف ناس مقتنعه بالكلام الفارغ دا تماما و بتعمله .
نرجع لعين الجمل
مما لا شك فيه ان الحسد موجود و مقر به و مذكور في القرأن الكريم و في السنة النبوية و لكن الاغراق في مفاهيمه و الوصول لحالة الرعب و الهلع منه فيه شئ من عدم الايمان بالقضاء و القدر و رسولنا الكريم بمنتهى اليسر و الحكمة علمنا ان نقي انفسنا من الحسد بقرأة المعوذتين او عندما ترى شئ تقول ما شاء الله لا قوة الا بالله و بكدا خلاص قضي الامر .
لا تفضل بقى تعلقلي خرزة زرقا و خمسة و خميسة و شغل الشعوذة بتاع زمان دا و تفضل متخوف من شخص او من اشخاص و لا تدبح مش عارف ايه لان كللل دا وحي خيال بل احيانا تاخد ذنب عليه و ربما تصل لدرجة الشرك ربنا يحفظنا .
بالمناسبة احيانا ما يحدث في السيارة يكون عقاب لصاحبه او لفت نظر من ربنا علشان حاجة هو بيعملها في سيارته زي مثلا مشغل مزيكا طول النهار او ماشي يعاكس بنات او اي حاجة و معنى كدا ان مش الحسد بس هو الي بيمس العربية ممكن اعمالك نفسها .
و في النهاية ربنا يحفظ عربياتنا و يحفظ طريقنا و طريق كل المسلمين و يقينا شر الحسد .