نصائح تغنيك عن الذهاب لمحل صيانه الكمبيوتر
السلام عليكم ورحمة الله وبركاته
بصراحه لاحظت في الآونه الاخيره ان الناس بتفك كيسه الكمبيوتر و تشيلها على قلبها تروح لمحل
الكمبيوتر و من غير اما يبص المشكله ايه تلاقي الرد البارد عاوز ويندوز مع ان الموضوع مايستهلش
ويندوز خالص بالعكس بيكون حلها ببرنامج لا يتعدى الكام كيلو بايت بس هو مش عاوز يتعب نفسه و يدور
و المهم عنده ياخد ال 20 و لا 30 جنيه بتاعت تنزيل الويندوز عشان كده عاوز افيد الناس هنا مبدئيا عشان
مفيش ناس كتيره تعرفني انا خالد عندي 18 سنه في تالته ثانوي عندي كمبيوتر من 6 سنين تقريبا اول
4 سنين كمبيوتر شخصي و اخر سنتين لاب توب مبدئيا لازم نعرف حاجه مهمه ان 95% من اعطال
الكمبيوتر بتكون اعطال سوفت وير اما عطل في الويندوز او لأسباب اخرى طب الطريقه اللي هتلاقي
بيها حل لأي مشكله تقابلك حاجه بسيطه جدا جــــو جــــــل ايوه هو ده بس كل الحكايه ان يكون عندك
صبر اكتب مشكله الجهاز بتاعك بالعربي مره و دور في اول 3 او 4 صفحه و غالبا هتلاقي الحل مالقتش
اكتبها مره تانيه بالانجليزي دور و اصبر و هتوصل بس لازم كام حاجة نتفق عليها
1- الدرايف اللي عليه الويندوز اللي هو غالبا بيكون ال C متحطش عليه اي حاجة خالص غير نسخه
الويندوز بس و اي حاجة تانيه على اي درايف تاني كده تضمن ان حاجتك مش هتضيع
2- لازم تعرف ان اكبر ضرر ممكن يحصل انك هتضر تنزل ويندوز و ده بقى موضوع سهل جدا هتلاقي اكتر
من شرح
3- بالنسبه لمشاكل الهارد وير ديه يستحسن تروح فيها لبتاع الكمبيوتر عشان بيبقى فاهم هو بيعمل ايه
و الهارد وير هو الحاجة الوحيده اللي حاولت فيها و كانت بتنتهي بالفشل :fdsa:
عاوز اقولكوا اني بقالي 6 سنين مروحتش لبتاع كمبيوتر غير لو حاجة تتعلق بالهارد وير فقط لا غير و ديه
كانت حاجات نادره جدا
في النهايه جمد قلبك و اديك عرفت كبيرها ايه