يوم أجازة في حياة عضوه (للأزواج والزوجات فقط) !!!!

**hossam_elwani** · 05-02-2013 05:14 PM

المشاركة الأصلية كتبت بواسطة friendship7897

ما هو المصيبة الظاهرة في مجتمعنا إن دا العادي
بس ياريت نحط حلول - يعني فيها أيه لو كل راجل أو ست قرأ الموضوع دا يشتري وردة ( بإثنثن جنيهات فقط لا غير ) للطرف الثاني - ونشوف الريآكشن هيكون أيه ! أعتقد أنها هتكون حاجة إيجابية .

كلام سليم وانا عن نفسى حجربها ... دى اول نقطه ايجابيه فى الموضوع... محتاجين دايما نكون ايجابيين وسط ضغوط الحياه

**ehab** · 05-02-2013 05:15 PM

المشاركة الأصلية كتبت بواسطة friendship7897

عارف يا أ/ survival إن الحب دا عامل زي براعم الزرع لازم يتنمى علشان يكبر أكتر وأكتر.

مش بس عشان يكبر و عشان يستمر
و اعتقد ان دا هو مربط الفرس

**Imhotep** · 05-02-2013 07:24 PM

ببساطة. . . رتابة و روتين الحياة اليومية بتخلى مواضيع الحوار مستهلكة. . . بالاضافة الى الاختلاف الدائم فى التوقعات. . . الزوجة فى تمنى دائم لاستمرار الحياة بعد الجواز كما كانت ايام الخطوبة فى حين الطابع العملى بيتغلب على الراجل و اختلاف التوقعات ده احيانا كتير بيعمل مشاكل بس المسايسة بتمشى الدنيا . . ادى الموضوع ببساطة

**mohammedabdallh** · 05-02-2013 07:33 PM

بره البيت وجوه البيت
لا تعليق

**ahmedhilmy** · 06-02-2013 12:38 AM

الحقيقه ان الأخت الزميله فتحت موضوع من اخطر و اهم ما يمكن او من الأخر جت علي الجرح
الحياه في البيت بقي فيها كم من الرتابه و الملل رهيب ( الحمد لله ان مراتي معندهاش اكونت علي المنتدي و لا تعرف سكته)
و كتير الواحد يفكر طب ليه كده و ايه السبب بس انا وصلت انها سوء تقدير من الطرفين و عدم حسن اختيار يعني الراجل بيبقي طالع عينه من 7 الصبح اللي ما شاء الله و يدخل بيته تلاقي بووز و لا مثيل و لا قبل له طبعا في لستت مشاكل حصلت طول اليوم ده ضرب ده ده قال لده ده حصله في المدرسه و......الخ الخ الخ
اللي يغيظك انك ممكن تصبري علي اللسته دي لغايه الراجل ميهدي و يستريح و ياكل لقمه لأ ازاي و دي تيجي في المقابل هتللاقي البوز العكسي طبعا و التكشيره من الراجل و محاوله الانتقام باي وسيله و طبعا اهمها الصمت الرهيب و تتحول اللي صنم من اصنام قريش لحد متنام و دي طبعا بيزيد الأمر اشتعالا و يمتد الأمر اللي اليوم التالي عن طريق الموبيل ( ده مرات البواب عملت -ده فاتورة الكهربا مش عارف جت كام - ده الأسانسير عطلان )حاجات انت ملهاش عندك حلول و انت في شغلك طالع عينك بس ازاي توابع تسونامي بتاعه امبارح و يبقي الحال يوم يجر يوم يوم يجر يوم لغايه منوصل لمشهد النادي بتاع اختنا العزيز طيب الحل ايه؟؟؟؟؟؟؟؟؟

الحقيقه لازم اي اتنين بجد يقعدوا يتكلموا مش يقعدوا يتكلموا و خلاص لأ تقعد مع مراتك كانك قاعد مع واحد صحبك و انت كمان احكي احكي عن يومك مشاكلك في الشغل الناس و المواقف اللي قابلتك اشركها في حياتك الخارجيه بحلوها ومرها و انت كمان نفس الوضع اسمعي و اسمعي باهتمام كانك صديقه مش زوجه شاركيه كل نقطه صغيره و كبيره حاولي توفريلوا جو مريح في المقابل اجلي لسته المشاكل و الطلبات ليوم يكون راجع بدري يكون شكل يومه كان لطيف او مقبول و بلاش تصري المشكله علي انها كارثه احكيها باسلوب يحسسه انها حاجه بسيطه مش عائق عايزله سوبر هيرو يحله
انت بقا في المقابل اسمع و اسمع بسعه صدر و ابتسامه لاحظ انها هي كمان شيله حمل مش هين البيت و الولاد و المشتريات و المذاكره و الدروس الفسح احيانا و الدكاترة وووووو حاول تاخدها صديقه بلاش زوجه اوهم نفسك انك قاعد مع صحبك مش مراتك اسمع منها ناقشها اشركها حطها معاك في مشكلك بتاعه شغلك و حياتك و عربيتك اي حاجه خصص يوم في الاسبوع او كل اسبوعين ودي ولادك عند جدودهم و خدها و اخرج اتعشى بره روح سينما امشي علي رجليك في الشارع لو مش عايز تروح حته المهم تقعدوا انتم الاتنين و بس بلاش في الخروجه دي تكلموا غلي البيت و الشغل و المشاكل اكلم في اي حاجه
يا جماعه اللي اتورط و اجوز فينا و خاصه اللي ربنا كرمه باولاد عارف انه و الحمد لله في نعمه وفضل كبير من ربنا سبحانه و تعالي في كتير محرومين منه فنحاول اننا نشكر ربنا علي النعمه دي باننا نحافظ عليها و نميها بالحب و الود و التربيه الصالحه لاولادنا
ربنا يعني و يعنكم علي تنفيذ حتي لو جزء بسيط من اللي فات و يديم علينا و عليكم نعمه الصحه و اهدوء البال و يبارك في اولادنا جميعا

**طارق _عبد السلام** · 06-02-2013 04:57 AM

الموضوع ده فعلا مهم وكل التقدير لصاحبه الموضوع والمشاركين.........
موضوع تقريبا موجود بنسبه كبيره جدا فى كل بيت
عارفين المشكله فين
فى البدايه.......
فى فتره الخطوبه الاصتطناع والتجمل من الطرفين طبعا الموضوع ده بيعطى انطباع خيالى لكل طرف عن حياه (فرع من فروع الجنه)
وبعد كده الاصطدام بالواقع وكلا الطرفين بيمارس الحياه بطبيعته التى يعيش بها فعلا
مهو مش معقول التجمل حتى فى الكلام والطباع سيستمر على طول الخط يعنى :)
فتأتى الصدمه الاولى بعد ماكان عايز يسمع صوتها كل ساعه وبقول احلى كلام يقدر عليه ونفس الموضوع هى تسير على نفس المنهاج والدنيا بتبقى وردى ............
ينقلب الموضوع .لمشكله طبعا لا هو بيسمع كلام زمان ولا هى حتى
هو كان بيعمل مشكله علشان يخرج فى ايام الخطوبه ويتمنى يخرج كل يوم وبعد الزواج اصبحت كلمه خروج كلمه مزعجه ......طيب ليه
هيقول ضغوط الحياه ومشاكل الشغل !!!
طيب ما انت كنت مضغوط اكتر وانت خاطب علشان تتجوز
وهى ضغوط البيت والذى منه طيب ما انتى كنتى بتتجملى بالساعات للخروج أو الذهاب للجامعه أو العمل !!!!
الموضوع بأختصار هو حاله من الفتور ويجب ان نتغلب عليها حتى لا تكون روتين حياه
الموضوع ببساطه الزوجه المفروض عرفت طباع زوجها (ظهر على طبيعته بقى ) وتبدأ تتجنبه فى ظروفه الضيقه ههههههههه
والزوج طبعا المفروض فهم طباع زوجته (ظهرت على طبيعتها بردوا ) وأيضا يجب ان يعلم اين مربط الفرس
بكده يكون فيه توازن
انا بقى مختلف شويه عن كل الردود انا مشكلتى فى الخروج الاولاد هم سبب العكننه فى الخروج وايضا فى البيت
ده انا لو بروض اسود فى سيرك كان المووضع اسهل (بهزر طبعا )
بجد والله يا جماعه
اصل رمانه الميزان فى الموضوع الذاكره لاتفقدوا الذاكره (ايام الخطوبه) والكلام الجميل والابتسامات بدون داعى ههههههه افتكر ده وطبق منه شويه بعد الزواج
وايضا موضوع الهدايا
له مفعول السحر لكلا الطرفين (هو فى كلتا الحالتين انت اللى دافع) بس والله بيرفع المعنويات للسماء
ويارب يجعل لكم فى بيوتكم السكينه والمحبه
تقديرى واحترامى لكم

**شريف** · 06-02-2013 10:06 AM

المشاركة الأصلية كتبت بواسطة mahora

ببساطة. . . رتابة و روتين الحياة اليومية بتخلى مواضيع الحوار مستهلكة. . . بالاضافة الى الاختلاف الدائم فى التوقعات. . . الزوجة فى تمنى دائم لاستمرار الحياة بعد الجواز كما كانت ايام الخطوبة فى حين الطابع العملى بيتغلب على الراجل و اختلاف التوقعات ده احيانا كتير بيعمل مشاكل بس المسايسة بتمشى الدنيا . . ادى الموضوع ببساطة

ممكن تفسير اكتر بامثلة مثلا علي جزئية الاختلاف الدائم في التوقعات ؟ ز اية اخطر حاجة ممكن يحصل فيها اختلاف علي المستوي المادي و لا العاطفي و لا اية ؟

المشاركة الأصلية كتبت بواسطة mado83

انا اول واحد اقترحت موضوع اننا نروح ونبتسم حتى لو مش قادرين ونتكلم حتى لو تعبانيين وتاخد هديه
وقد كـــــــــــــــــــــــا ن:
اخدت علبه جاتوه وروحت البيت وابتسمت وضحكت واتكلمت واذ فجأه
انا ليا عندك 45ج جبت بيهم حاجات وكان فى 105ج من الشهر اللى فات ماخدتهمش وصرفت من فلوس البنت 50ج فعايزاهم بقه
بصراحه فضلت اضحك لدرجه انها اتنرفزت من ضحكى بسص طبعا انا كنت بضحك على الموضوع بتاع freindship
وقولتلها حقك على امى ودخلت نمت
ادى جزاء اللى يتكلم ويضحك ويبتسم ويجيب هدايا لا خلينا فى الروتين احسن

ههههه كويس انها مفتكرتش انك عامل عملة و ضميرك واجعك

**ahhazem** · 06-02-2013 10:35 AM

الموضوع يا جماعه ان الناس بعد الجواز بتبقى مهمتهم الاساسيه رعاية الابناء وبس ومحدش من الزوجين بيفتكر التاني اصلاً ا ما يكون الموضوع متعلق بولادهم
واعتقد ا ده اللي حضرتك شوفتيه في النادي كل الآباء رايحين النادي علشانالمهمه دي وبس ومحدش منهم فكر ابداِ انه رايح علشان الطرف الآخر ولا حتى علشان نفسه
والحاجة التانيه ان روتين الحياه في مصر شغل و مشوار شغل بياكل اليوم ويفضل وقت الوجود في البيت للأكل ان ماكانش كل بره والنوم بالطبع فاحنا في العادي مش بنشوف بعض أصلاً لو حسبناها وده موضوع صعب جداً
علشان كده في اوروبا وامريكا مثلاً في قوانين صارمه في موضوع ساعات العمل وكل المحلات ليها مواعيد ثابته ومحدده علشان الناس تروح بيوتها وتكمل يومها مع اولادها
مره سألت واحد سويسري على الموضوع ده وقاللي بالحرف ان القانون ده معمول علشان الموظف يقدر يكون مستريح وهوا بيتعامل مع المواطنين بدون ضغوط ولا شد عصبي نتيجة سهره او عمله لمدة طويل بالإضافه لإنه ياخد الفرصه هو وكل المواطنين في قضاء وقت مع اهله واولاده وزوجته فبالتالي يكون في توافق اسري وجو ملائم لعمل العلاقات الاجتماعيه وأسريه وينشأ معاها مجتمع هادئ الطباع منتج وقوي طبعاً
وحسبي الله ونعم الوكيل

والله الموضوع ده هم كبير