الموضوع: اخيرا مخترع موضوع الميزان ركب الميزان

انا من زمان و انا كنت بشتكي ان العربيه الصني مش ثابته و كل الناس كانت هنا بتقولي بالعكس دي ثابته بس الفرق ما بيني و بين معظم الناس هنا اني طالع من اوربي هاتش باك (جولف - فليشيا) فكنت بمعنى الكلمه مبطيقش اروح مشوار بالعربيه الى ان اتعودت على العربيه و ابتديت اتأقلم معاها و في يوم كنت بربط عفشه و اكتشفت ان الصني مفيهاش عمود اتزان امامي و مكانه فاضي و مش راكب طيب هو باين من اسمه انه بيزود الاتزان و انا مشكلتي كانت في الاتزان فدورت و محصت و فحصت و طلعت شويه مراجع قديمه و حديثه من النت الى ان توصلت لان اي عربيه بشنطه لازم يكون فيها ميزان و ما اكبر شنطه الصني لانها كمان بتزود البدي رول و كمان طول الشاسيه بيخلي التحكم في العربيه في الملفات يعوم شويه و مطبات الهواء فقررت اعمل موضوع للساده الاعضاء هنا اشرح الميزان بيتركب ازاي و ايه فوايده
و ادي الموضوع افكركم بيه

http://www.nilemotors.net/Nile/307953-ex.html


المهم قررت و بعد طول انتظار اني اركبه و ده بعد تجربة كتير من الاعضاء و تاكدت من صحة كلامي و كمان اتوفرت الماديات و طلبت من اخويا WalidAdel بحكم قربه للمكان ده انه يشتريلي الحاجات بتاعته من التوكيل و فعلا جابهالي و تعب على اما لمنيها لانها بقت نادره بسبب الضغط على شرا الميزان و فضل الميزان فشديت الرحال على الحرفيين و طلع عيني لاكتشافي ان الميزان بتاع الصني بقى السحب عليه جامد و بقى نادر و هما عرفوا كده فلقيت الي بيقولي 450 و 500 جنيه لحد ما لقيت واحد بيقولي 200 جنيه بس هايتفك من نص ب 100 جنيه اديته 200 و فكيته انا وربنا كرمني ان اخويا AmrIBM عرفني بورشة جامده فيها ناس فاهمه النيسان و كانو قبل كده شغالين في احد التوكيلات و حافظين العربيه و على فكره عندهم عده جامده مخدش في ايدهم ربع ساعه و جربت العربيه و حسيت اني اشتريت عربيه تانيه اولا المطبات انعم ازاي معرفش العربيه ماسكه في الارض الدركسيون مسك و رد الفعل اتحسن كتير و مطبات الهوا مبقيتش تعوم العربيه نهائي و الملفات مبقيتش العربيه تميل و تروح مع الملف بالذات في مطالع و منازل الدائري

القصه كلها اتكلفت 300 لوازم تركيب الميزان + 200 ميزان + 100 تركيب الميزان و تربيط كل مسمار في العربيه = 600 جنيه


الحمد لله
اللهم بارك لنا في ما رزقتنا و احفظه من الزوال