استفسار عن صيانه ال 1000 في السبع و حبه اسئله

السلام عليكم و رحمة الله و بركاته
معلش انا اسفه علي استفساراتي الكتير
دلوقتي انا قربت علي صيانه الالف .. السؤال دلوقتي هما السبع بيدوا تقرير بعد الصيانه و لا ايه النظام ؟
تاني حاجه العربيه اتحكت للاسف معرفش اتحكت في ايه و اتاشر حته من الاكصدام في حدود اقل من سنتي .. قالولي ممكن اشتري بويه لون العربيه من التوكيل و اعملها بفرشه او قطنه .. فالكلام ده كده صح و لا يبوظ حاجه ؟ و التوكيل هيرضي يبيعي البويه اصلا ..؟
ثالثا : انا الحمد لله لحد دلوقتي الفرامل مش بتصفر بس بتطلع صوت تاني خالص .. صوت احتكاك حديد ببعضه و انا بارفع رجلي من علي الفرامل هو الصوت مش علي طول بس بيبان قوي لما اكون دوست فرامل لحد موقفت تماما و بعد كده رفعت رجلي عن الفرامل .. حد عنده فكره كده ايه ؟
رابعا : كان زمان بتتكلموا عن ان العربيه مفيهاش فلتر هواء .. هو ده ايه ؟ و حاجه مهمه ؟ و اطلبه من التوكيل و انا بحجز و لا ايه النظام ؟
خامسا : انا في خرابش مش عارفلها سبب خالص بتظهر في اماكن غريبه جدا .. يعني خربوش في الكبوت فوق علامه نيشان ، و خرابيش عجيبه جدا علي الفانوس الامامي من فوق ؟ مع العلم اني بجرج العربيه بالليل في جراج .. بس الصبح للاسف علشان الشغل بتبقي في الشارع .. و ماكده علي الجراج ميبسحهاش بفوطه زفره هي الفوطه الصفراء و ينديها حاجه بسيطه لو احتاجت بس .. ففي حاجه ممكن اعملها احمي العربيه شويه ؟

و شكرا جزيلا و جزاكم الله كل خير

انشاء الله تعملى الصيانة على خير .
بالنسبة للسبع مبيدوش تقرير ( انا مطلبتش ، ممكن لو طلبتى يوافقوا )
بالنسبة لصوت التكة او الطقطقة اللى بتسمعيها ، دى بتظهر لما تكونى واقفة و تبدأى تتحركىى ببطء ، و ده طبيعى لانى كنت عندهم فى السبع يوم الخميس بسبب الموضوع ده و قالوا ان الصوت ده بيظهر مع اول الحركة ودى هتشعرى بيها لما ترفعى رجلك من على الفرامل ببطء .
ممكن تغطيها و اكيد ده هيحافظ عليه من الخرابيش اللى بتظهر .

بتبقى نازلة من غير فلتر تكييف مش فلتر هواء

نصيحة كده علي الماشي :)
عايزك تكتبي كل ملاحظاتك مرقمة في ورقة و تعملي منها نسخة و تدي نسخة للمهندس اللي هيستلم منك العربية و النسخة التانيه تكون معاكي بحيث اول ما العربية تخلص تسألي لعي كل نقطة مكتوبة و ايه اللي تم منها
بالنسبة لصيانة الـ 1000 :
تغيير زيت الموتور و فلتر الزيت و تربيط عفشة
الف مبروك الصيانة مقدما ً و عقبال صيانة الـ 500000 كيلو ان شاء الله

اعتقد ان الخرابيش دي ممكن تكون بسبب الرمل و التراب اللي بيخبط في العربية وهيا ماشيه

بالنسبه لموضوع الصفاره مع الفرمله فى الغلب التيل عليه تراب و ده بيبقى فى الاغلب بسبب مرورك بالعربيه على طين فبينشف على التيل و بيعمل الصوت ده و حضرتك ابقى اطلبى منهم انهم يبصوا على تيل الفرامل علشان الصفاره و هما هيكشفواعليه و ينظفوه من التراب و بعدها ان شاء الله الصوت هيروح و طبعا موضوع كتابه ورقه بالملاحظات ده مفيد جدا علشان تفكرهم اثناء عمل الصيانه و ما ينسوش حاجه زى ما بيشوى باشا قال لحضرتك. بالنسبه للخرابيش دى ليها أسباب كتير زى ان يكون على العربيه تراب و تتمسح بفوطه ناشفه ففى الحاله دى التراب على الفوطه الناشفه بيبقى عامل زى الصنفره و بيعمل مواضيع الخرابيش و للموضوع ده تحديدا فى بعض المنتجات بيتم طلاء السيارات بها فى بعض. مراكز الكار كير بتحمى دهان الفابريكه و بتجعله مقاوم الخدوش اللى من النوع ده بس هى بتبقى غاليه فى حدود ٦٠٠ جنيه للعربيه و بيبقى ليها حدود يعنى خدوش بسيطه مش خربوش بمسمار مثلا لان ده ملوش علاج إلا الرش و عامه يستحسن تبقى تغطى العربيه بغطاء للحفاظ عليها و هى واقفه فى الشارع
بالنسبه للبويه اللى قشرت دى الموضوع بيتوقف على المساحة فلو صغيره ممكن الكمبوند او قلم ازاله الخدوش يداريها و اعتقد ان التوكيل مش بيبيع البويه ده غير ان اللون ممكن يبقى مفارق عن بقيه لون العربيه خاصه و ان الدهان بيتعرض للشمس و بالتالى بيفتح شويه إنما الجديد ممكن يبقى اغمق و يبوظ منظر العربيه إنما الكمبوند و المنتجات اللى زيه بتسيح البويه فى المناطق اللى حوالين الخدش و بالتالى بتملأ مكان الخدش بنفس لون العربيه

شكرا جدا لردودكم
بس انا عايزه اسال انا عندي صوت كأن حاجات حديد بتحتك ببعض لما ارفع رجلي من علي الفرامل ، مش لما بدوس ، مش مستمر بس بسمعه يوميا الصبح في اول المشوار و احيانا لو وافقه علي مطلع كوبري ..
سؤال كمان عن الفرامل باردوا ، دلوقتي انا لما بشد شويه يعني في حدود 80 ل 100 مثلا بلاقي الفرامل خفت يعني لازم ادوس جامد علي الاخر علشان العربيه تقف ، انما لو علي سرعه قليله ، اقل لمسه للفرامل بتوقف العربيه .. الكلام ده طبيعي ؟؟

و شكرا جزيلا

اقتباس:

---

المشاركة الأصلية كتبت بواسطة gomana85

السلام عليكم و رحمة الله و بركاته
معلش انا اسفه علي استفساراتي الكتير
دلوقتي انا قربت علي صيانه الالف .. السؤال دلوقتي هما السبع بيدوا تقرير بعد الصيانه و لا ايه النظام ؟

الصيانه فى السبع تتم بدون اعطاء العميل ترقير بما تم صيانته فى السياره

تاني حاجه العربيه اتحكت للاسف معرفش اتحكت في ايه و اتاشر حته من الاكصدام في حدود اقل من سنتي .. قالولي ممكن اشتري بويه لون العربيه من التوكيل و اعملها بفرشه او قطنه .. فالكلام ده كده صح و لا يبوظ حاجه ؟ و التوكيل هيرضي يبيعي البويه اصلا ..؟

اتركيها كما هى لانه لو تم الاصلاح ستجدى من قام بحكها مره اخرى واعتقد ان ده مش مؤثر فى حاجه

ثالثا : انا الحمد لله لحد دلوقتي الفرامل مش بتصفر بس بتطلع صوت تاني خالص .. صوت احتكاك حديد ببعضه و انا بارفع رجلي من علي الفرامل هو الصوت مش علي طول بس بيبان قوي لما اكون دوست فرامل لحد موقفت تماما و بعد كده رفعت رجلي عن الفرامل .. حد عنده فكره كده ايه ؟

يفضل ان تذكريها لمهندس الصيانه اثناء دخول السياره للصيانه واطلبى من مهندس الصيانه ان يخرج معكى لتجربه السياره وسماع الصوت حتى يمكن تحديد سببه بوضوح

رابعا : كان زمان بتتكلموا عن ان العربيه مفيهاش فلتر هواء .. هو ده ايه ؟ و حاجه مهمه ؟ و اطلبه من التوكيل و انا بحجز و لا ايه النظام ؟

لو تقصدى فلتر تكييف فان السيارات تكون بدون فلتر واطلبى تركيبه فى الصيانه لانه مهم اثناء تشغيل التكييف

خامسا : انا في خرابش مش عارفلها سبب خالص بتظهر في اماكن غريبه جدا .. يعني خربوش في الكبوت فوق علامه نيشان ، و خرابيش عجيبه جدا علي الفانوس الامامي من فوق ؟ مع العلم اني بجرج العربيه بالليل في جراج .. بس الصبح للاسف علشان الشغل بتبقي في الشارع .. و ماكده علي الجراج ميبسحهاش بفوطه زفره هي الفوطه الصفراء و ينديها حاجه بسيطه لو احتاجت بس .. ففي حاجه ممكن اعملها احمي العربيه شويه ؟

حاولى تغطى العربيه والجراجات دلوقتى بقت من احد الاسباب الرئيسيه للخرابيش والحك بالعربيات

و شكرا جزيلا و جزاكم الله كل خير

---

تحياتى لحضرتك

بالنسبة للصوت اللى بتسمعيه و انتى بترفعى رجللك من على الفرامل ( دى بتظهر فقط لما ترفعى رجلك ببطء) و دى ناتجه عن ابتعاد التيل عن الطنابير ( حاجه زى كده) و دى طبيعيه لانى سألتهم فى السبع و مهندس الاستقبال سمعته الصوت ده و قالى عادى.
أما بالنسبه للفرامل انا برده زيك فى اوقات باحس انه خفيف.

فعلا السيارة ما فيهاش فلتر للتكييف، انا كنت فى اوتو ايجيبت يوم الخميس اللى فات ومهندس الصيانة قال انه لسه مش موجود، وكمان صاجه التيل الخلفى للفرامل.

بالنسبة لموضوع الخرابيش ده فاكيد الجراج فيه قطط أو كلاب بتطلع على العربية وهى اللى بتعمل كده بضوافرها، والحل أنك تغطى العربية زى ما انا كنت بعمل فى الاول بالغطاء بتاعها، وبعد شويه زهقت من انى كل شويه افرد الغطاء واشيل الغطاء وسيبتها بقى اللى يخربش يخربش.

ربنا ما يجيبش حاجه وحشه بس ابقى شوفى المشاركه دى لتفعيل الضمان http://www.nilemotors.net/Nile/33642...post3874814828