>>>تقريرى المصور لتغيير قطمه مازدا 323 م 83 لموديل 91 وازاله عك 30 سنه فى الكهربا<<

**mazagngi2010** · 09-02-2013 03:51 AM

عنوان الموضوع طويل مش كده

بعد موجه المطر اللى فاتت النور كان بيطفى ويشتغل مع نفسه ودخنه من هنا وقفله من هناك وسنتر بيفتح لوحده وربنا هو الستار
قلت كفايه كده على الضفيره ونظبط كل العك اللى فى الكهربا لان كل حاجه عندى كانت متوصله على العمومى وكبارى وعلبه الفيوزات مفيهاش فيوز شغال

بالمره كان نفسي اغير الطاره العفشه بتاعتها بدراعات نورها والكونتاكت اللى بيشتغل بمعلقه مهما تغيره

لما حسبتها :
طاره سبور ب 150 اى كلام وبالزور بتاعها
دراع نور جديد تايوانى ب 130 وهيلمس تانى بعد شهر عن تجربه
كونتاكت جديد ب 75 تايوانى وهينعم مع الوقت
قول التكلفه ب 350 ونفس الشكل العفش ماتغيرش
على ايه ده كله !!
وكان الحل مع ابو عمر

شخصيه رجوله جدا معانا فى جروب المازدا عدل التابلوه بتاعه من 82 ل 87 والقطمه بطارتها ودراعتها والكونتاكت لقطمه 91
ودى عربيته بعد التعديل عند الاسطى مهدى فى المريوطيه

وعرفنى على الكهربائى المعلم اللى قام بالليله - الاسطى مهدى -كان شغال فى ماجد ولطفى يعنى حافظها مسمار وسلك ومابيشتغلش الا الصح وعارف ربنا وبيراعيه فى شغله اهم حاجه

نزلت الوكاله مع الاسطى مهدى واستنضفنا قطمه مازدا 91 بالكونتاكت الاصلى والمفتاح بتاعها -معقد عن القرف اللى فى السوق-وطاره اصغر ونضيفه ودراعات نور محترمه اشيك وانعم من القديمه ويابانى بتاعتها ب 420 جند
70 جنيه فرق بس احسن من كل النواحى

العيب الوحيد بتاعها ان مفيهوش انتظار فوق الطاره زى القديمه فهعمله زرار خارجى تكتين وكان نفسي الدراع اللى بيعلى الطاره وينزلها يشتغل بس التعديل مش هينفع

فقلت اعيش عيشه اهلى احسن

الصور

قبل الشغل

4 فيوزات بس اللى كانو موجودين وكلهم محروقين

ماساه على مدى 30 سنه

ضفيره العربيه اللى اتاكلت من الكاوتش ولقينا شويه سلوك منها مقطوعه وملمسه

ياريت تتاكدوا من حاله الضفيره بتاعتكم فوق الكاوتش علشان متعملش قفله عندكم
خصوصا اللى مش مركب كارتيره زي حالاتى

طبعا الكهربا كانت زفت ومعمول كتاوت لكل حاجه مارش ونور حتى الكلاكس !!

حتى الدينامو وصلات قبل الفيشه ومتركب كتاوت مارش جنبه

شكل الطاره الكئيب والدراعات اللى عامله زى الخوازيق بالنسبه للجديده

الضفيره القديمه اللى فى الكبوت بعد ماتفكت كتر خيرها بصراحه اتفشخت بضمير

الراجل شمر ودخل فك التابلوه فى 5 دقايق كان حافظه (اساتذه فى الهد على رأيه)
واول ماشاف المنظر ده خلصت حسناته على الكهربائيه اللى اشتغلوا فيها من ساعه ماطلعت من المصنع ..كوارث ياجدعان بجد سلوك بالهبل متعريه ومشرزه وكبارى بالهبل على العمومى

ولحسن الحظ احنا اول ناس تفك التابلوه بتاعها

كويس انى مابيعتهاش

الجراح وهو شغال فى استئصال السلوك البايظه وتوفيق الضفيره الاماميه اللى جيبناها من الوكاله مع الضفيره القديمه بتاعتها اللى جواها

عم مهدى ربنا يبارك له

رضا الصبى بتاعه حب يتصور هو كمان

والضفيره اللى جيبناها متعلقه فى الكبوت

بعد

اخيرا عوده لزمن الفيش

الفيوز الكبير ده ملغى او مسروق فى معظم الموديل ده فى مصر وكان عنده وركبهولى وفايدته حمايه الضفيره لو حصل قفله فى المارش او الدينامو
وبرضه الرنان بتاع الابواب وريلاى المساحات كان مسروق من عندى

واخيرا ركبت فيوزات واشتغلت وبقى معايا فيوزات احتياطى (كنت مرتاح من الكلام ده) وكل العفاشه اللى تحت اتشالت

الدينامو والمارش على نضافه من غير وصلات ولا كتاوت
المارش بقى بيلقط صاروخ الحمد لله

حمايه اضافيه للضفيره فوق الكاوتش بالخرطوم ده

بعد توفيق القطمه الجديده مع عمود القديمه وتربيط وتشحيم القطمه وتركيب الطاره والدراعات والكونتاكت والفبر بتاعها

ربنا ستر ومخرمناش للمفتاح

احمد فارما !!

وهو بيدى ختم الجوده على الشغل

التكاليف
قطمه كامله 91 من الوكاله 420 جند
60 جنيه خامات فيوزات قطاش سلوك وترامل وفيش وشيكرتون على حاجات تانيه
80 جنيه ضفيره اماميه استيراد من الوكاله
300 مصنعيه (الراجل اشتغل فيها يومين ورا بعض 28 ساعه على يدى مش وراه الا هي وعطلته ونزلته معايا الوكاله)

الانطباع بعد تغيير القطمه:

الطاره تقلت قوى عن الاول كانت مبوشه جامد زمان دلوقتى اليمين يمين والشمال شمال مفيش بوش خالص والعربيه تقلت وثبتت بعد تربيط القطمه ومش هيفهمنى الا ابو عمر او اى حد بيسوق مازدا ويجرب بتاعتى دلوقتى
التحكم فيها لسه عايز تعود علشان فرق الحجم بس مريحه كنت فاكر انى هتعذب فيها علشان اصغر من القديمه
الكلاكس حلو مريح بدل الصفيحه القديمه
المنظر الحلو فتح نفسي على العربيه بعد ماكنت زابلها وبفكر اشدها اسود مط
لما اكسرها على الاخر ايدى بتخبط فيها لسه عايزه تعود

شكر خاص للرجوله

ابو عمر على وقفته معايا هناك

ياريت اللى عنده مازدا 323 تمانينات او بيحبها يشارك معانا فى الجروب
http://www.facebook.com/groups/253128024771572/
بحمده تعالى : على رشاد

**mazagngi2010** · 10-02-2013 03:03 PM

المشاركة الأصلية كتبت بواسطة aldesha989

ما شاء الله انتا كان عندك تحابين كمان ويا ترى كانت بتقرص ؟ :d :d: D: :d :d

الله ينور والله شغل ميه ميه والله طز فى الفلوس المهم تكون مستريح نفسيآ

انا اى حاجه فى العربيه مش بسكت عليها الا لما اخلصها واحس ان العربيه استريحت وانا كمان استريحت معاها

مشكلتى مع المازدا حاليآ هى الثبات العربيه من اول 85 وتبتدى تطير وتحس ان ثباتها بقى فى الارض وسحبها خلاص على الاخر

يعنى 85 او 90 وتحس انها مش عايزه تجيب المايه خلاص مع انى بكون جايب خامس ولا ممكن علشان انا جايب خامس والتجميع بيبقى عايز وقت والافضل انى احرق على الغيارات ؟

وليه ما نفعش معاك انك تعدل على القطمه وتخليها تنزل وتطلع ؟ لانى كنت عايز اعمل كده فى العربيه عندى

احرق على الغيارات وشوف عفشجى نضيف
لان الزور (الاكس اللى مربوط فى الطاره) اقصر من بتاع العربيه فركبت الزور القديم على القطمه الجديده وانا محكوم بمكان الكونتاكت علشان المسوجر بتاع الطاره

**dr.hazem** · 12-02-2013 09:30 PM

ما شاء الله...
عقبال اما مرسي يشيل شوية من عك ال30 سنه اللي فاتو ولا دي مفيش امل فيها؟!
ههههههههههههههه

ربنا يباركلك فيها...
تحياتي

Sent from my SE Arc S using Forum Runner

**mazagngi2010** · 12-02-2013 10:55 PM

المشاركة الأصلية كتبت بواسطة nicegypt

الف مبروك يا مزجانجي باشا .. ايوة كدة هو دة الكلام
الشغل تمام بتاع الراجل بسم الله ما شاء الله علية تسلم ايدة والله يبارك لة
فكرتنى لما عملت كهربا ف عربيتى بس انا عملتها من الصفر وبصراحة مكنش فية كمية التعابين دى ههههههه
على فكرة البطارية اكيد كانت بتفضي منك شحن لو مدورتش العربية 3 ايام بسبب التلميس اللى كان موجود صح ؟
كدة كلة رجع للاصلة وظبط الكلام .. ربنا يبارك لك فيها ويرزقك خيرها

الله يباركلك يامعلم
البطاريه اتعودت على الشقا وكانت مولفه معاهم :))
الحاجه الوحيده اللى كانت بتسحب كهربا على الفاضى غير الساعه ان عداد ال rpm !!!

**mazagngi2010** · 12-02-2013 10:56 PM

المشاركة الأصلية كتبت بواسطة dr.hazem

ما شاء الله...
عقبال اما مرسي يشيل شوية من عك ال30 سنه اللي فاتو ولا دي مفيش امل فيها؟!
ههههههههههههههه

ربنا يباركلك فيها...
تحياتي

sent from my se arc s using forum runner

البلد عايزه شعب استيراد

**Karim_Monir** · 14-02-2013 12:34 PM

ايه الجمال ده
بصراحة انا مبحبش العك في الكهربا ابدا
افتكر عملت العملة دي في البيتلز من سنين السنين وكلفتني مبلغ محترم
قطة جولف 2
وضفيرة وعبة فيوزات
عشان مابحبش اشوف العك ده
بس هايل الموضوع

**mazagngi2010** · 14-02-2013 01:01 PM

المشاركة الأصلية كتبت بواسطة karim_monir

ايه الجمال ده
بصراحة انا مبحبش العك في الكهربا ابدا
افتكر عملت العملة دي في البيتلز من سنين السنين وكلفتني مبلغ محترم
قطة جولف 2
وضفيرة وعبة فيوزات
عشان مابحبش اشوف العك ده
بس هايل الموضوع

تغيير القطمه ده بيعمل فرق كبير بصراحه وربنا يسامح الصنايعيه الافاضل على اللى بيهييوه
ونورت ياباشا

-

-

الموضوع: >>>تقريرى المصور لتغيير قطمه مازدا 323 م 83 لموديل 91 وازاله عك 30 سنه فى الكهربا<<

LinkBack

أدوات الموضوع

عرض

>>>تقريرى المصور لتغيير قطمه مازدا 323 م 83 لموديل 91 وازاله عك 30 سنه فى الكهربا<< - انشر الموضوع فى :

-

-

-

-

-

-

المواضيع المتشابهه

>>>تقريرى المصور لتغيير قطمه مازدا 323 م 83 لموديل 91 وازاله عك 30 سنه فى الكهربا<<<

تقريرى المصور للسيراتو الجديدة - حصريا لنايل موتورز

تقريرى المصور عن يعض الاضافات الجديده للنيسان صنى 2013 فئه السوبر صالون

قطمه متحركة

شكلها كده قطمه دريكسيون

الكلمات الدلالية لهذا الموضوع

المفضلات

المفضلات

ضوابط المشاركة