الموضوع: تغيير زيت الموتور وزيت الفتيس - نوبيرا اوتوماتيك

السلام عليكم ورحمة الله وبركاته
بصراحة انا بحب المنتدى ده جدا واستفدت منه كتير ربنا يكرمكم وعشان كدة حبيت أشارككم قصة تغيير الزيوت دى لعربيتى النوبيرا اتوماتيك
كنت محتاج اغير زيت الموتور وزيت الفتيس
سألت واحد قال لى غير زيت الفتيس بزيت موبيل وأضمن حاجة فى بنزبنة موبيل وغير زيت الموتور بزيت شيل الأصفر 5000 قلت ماشى
اتوكلت على الله ورحت بنزبنة موبيل اللى فى نص شارع 9 فى المقطم وهية فيها مركز صيانة معتمد لشيفروليه
المهم دخلت على الراجل وفتح الكبوت وقلت له انا عاوز اغير زيت الفتيس هيكلفنى كام؟
قال لى اللتر ب 50 جنيه وهتحتاج 3 لتر يعنى 150 جنيه ومصنعية التغيير 20 جنيه وقول 5 جنيه اكرامية يبقى 175 جنيه !!!!! انا شكيت الصراحة عشان انا كنت سائل برة وقالوالى ان اللتر ب 35 جنيه بس مش 50 جنيه وبعدين 20 جنيه تغيير زيت ليه؟ ده همة كلهم 2 او 3 جنيه حلوين :)
قلت له كدة قعد يحلف ويقول مستحيل يابيه احنا موبيبل ذات نفسها ودى قضية لو نقصت او زودت ربع جنيه واكيد اللى برة ده نوع تانى حتى المهم قلت ف بالى اروح برة اتأكد تانى بس كنت خايف شكلى يطلع عيل ادامه قلت بينى وبين نفسى عيل عيل الفرق كبيييييير :) المهم قلت له لأ شكرا
ربنا هدانى لمركز زيوت مشهور جدا وله فروع كتير اسمه الشيمى فى اول شارع 9 فى المقطم وانت طالع من ناحية مدينة نصر المهم رحت له سألته عن زيت الفتيس موبيل الاتوماتيك قال لى الجركن ب 35 جنيه قلت تمام المهم جاب جهاز كدة وشفط الزيت القديم من الفتيس وحط الزيت الجديد لقيت العربية خدت 2 لتر واستكفت مش زى ما قالولى 3 لتر ونص المهم تمام وبعد كدة خلليته نزل الزيت القديم كله بتاع الموتور وحط لى الشيل 5000 الاصفر اتكلف 125 جنيه + 3 جنيه تغيير زيت الموتور + 70 جنيه 2 لتر زيت موبيل اتوماتيك + 3 جنيه تغيير زيت الفتيس يعنى كله كله 201 جنيه بسسسسسسسسسسسسسسس بدل كانت هغير زيت الفتيس بس فى البنزينة ب 175 جنيه ايه رأيكم :) - وعلى فكرة ادانى نتيجة كبيرة هدية كمان فى الاخر :)

ايوه بس معنا انه محطش الا 2 لتر انه لم يقوم بشفط الزيت كله لأني لما جبت عربيتي نوبير2008 الراجل فك الطبة من تحت وحطينا 4 لتر زيت شل واخدتهم كلهم واتبقا شوية حوالي ربع كيلو