اقتباس:
المشاركة الأصلية كتبت بواسطة Karim_Monir
السلام عليكم ورحمه الله
قد تعجز الحروف عن تكوين كلمات لصياغه ما اود ان اقوله في هذا الموضوع
فمن عاصر تجمعنا في موقع مصري اخر لم نكن ان نطمح او نفكر في منافسته اطلاقا
ولكن كان هدفنا تكوين مكان محترم لجمع شتاتنا عبر صفحات الانترنت
ونقلها الى ارض الواقع
سيعرف ما اتحدث عنه
سيعرف البداية وارقام الهواتف
بداية الاجتماعات والتخطيط والتخبط والشوري
الشوري حتي في اختيار اسم مصري اصيل لهذا المكان
التعب والمجهود
لحظات التكوين والتجمع
حتي عند تنصيب السوفت وير بواسطة صديقي محمود الحفناوي صباح يوم 15 ابريل 2007 واخذ اول رقم في العضوية رقم واحد
وعندما دخلت لاري ماذا نصب لاني كنت باجتماع في عملي كان ترتيبي رقم 32 بعد 3 ساعات من تنصيبة فقط
لم انسي اول لقاء وكانك تلاقي حبيبتك لحظة تلاقي الاحبة وتلاقي وشوش من عرفتهم كاسماء في واقع افتراضي
من يترك لك سيارته لتجربها وهو لا يعرف عنك شيئ كاكبر دليل عن محبته لك
لم انسي اخي معتز سليم يوم كنت افكر في شراء الهيونداي النترا 2007 وكان ممن كان لهم سبق استلام الدفعة الاولي في مصر
جائني اسفل عملي وترك المفتاح وقالي(اطلع جرب براحتك)
لم انسي فطار رمضان لاول مرة واسماء لم تعد ترونها كثيرا
محمد الطويل
احمد جنيدي
هاني ادام
اسلام شاهين
اسلام المصري
لم انسي تدخلات العديد من الاسماء الكبيرة جدا في هذا الكيان
محمود حفناوي
خالد عمر (سبعاوي)
م. سعيد الفار
م.حازم حزه
د.احمد سمير
اسماء عاصرت وكونت اسس وهيكل للمكان ده
عملت دعامه قوية وكان في روح للمكان وليس حروف
تجلت كاكثر ما يكون وقت وفاة شقيقنا محمد جمعه
لم انسي سطوره وقت ان دخل وقال اتابعكم من بعيد وانا على فراش الموت
لم انسي تجمع وهروله وتسابق العشرات للتبرع بالدم والصفائح
فقد اصبحنا اخوة بالدم
لم انسي اصدقاء لم ارهم الا اسماء وكم تمنيت لقياهم ولكن حالت الظروف
لم انسي اخي وصديقي ايمن واستضافته لي في مكتبه عشان يعملي فنجان قهوة من البن الخاص بتاعه
وقد كان اخر لقاء لي به رحمه الله واسكنه فسيح جناته
لم انسي اخي صبحي وضحكته البشوش وكلامه معي في التليفون لما بقولة موضوعك عن المشايات هنا افاد ناس كتير وفضح مافيا المشايات الكهربا في البلد
قالي المهم افيد الناس يا عم ورزقي هاخدة
واتفصل من شغله وهو عريس عشان خاطر يفيد الناس وفضل ثابت على موقفه ضد عيلته ورفض يحذف الموضوع عشان الناس تستفيد واهو باقيله كعمل صالح ومانقطعش عمله من الدنيا
اسماء كتير هنا ردت واسماء شافت الموضوع وقفت قدام كل اسم وافتكر مواقفه الكويسة وردوده اللي فاد بيها اناس
وافتكر قعدتي قدام شاشة نايل موتورز بالساعات والايام سواء في شغل او زيارات او حتي اجازات مع اولادي اللي عرفو اني طالما بكتب على نايل موتورز مايدخلوش يكلموني الا لما اخلص كتابة
عرفو ان ليهم اخ صغير اسمه نايل موتورز بس طلباته كتير قوي
وانا بكتب الرد هنا منسيتش معارف وصداقات اتكونت مكنتش احلم اقابلها في حياتي وناس وقفو جنبي ووقفت جنبهم وكنا في عضد بعض
منسيتش اول من مسك لجنة فض المنازعات وشال شكاوي الاعضاء دكتور احمد عبد الغني اللي ياما اختلفنا واتفقنا لكن في الاخر فضلنا اصدقاء
دكتور احمد سمير اللي حط معظم القواعد الهيكلية للمكان واللي كان لتدخلة وقفات شامخة في اوقات كادت تعصف الاهواء بهذا الكيان
اخي الاكبر خالد سبعاوي اللي عمره ما رجعتلة في مشكلة فنية وخاب ظني حتي لو مايعرفش لازم يقولي ادور ازاي واوصل ازاي
واللي اول ماتشوفلة مشاركة في المنتدي لازم تقراها حتي لو كاتب ريان يا فجل عشان اكيد هاتخرج من وراها بحاجة
اخي مهندس سعيد الفار اللي كان واحد من اللي اسسو المكان واول من استضاف اول اجتماعاتة التاسيسية وكان دايما صاحب افكار جيدة للتطوير
مهندس حازم حزة الرجل الصامت دائما واحد مؤسسين المكان واللي كان دايما يفكرنا بالشق اللي نسيناه في كل موضوع بحكمه تدبيرة ووترتيب افكارة
اخي الاصغر سنا والاكبر حكمة وصديقي الصدوق الصامت دائما نادر الطرابيشي اللي ائتمنته ووفي الامانة كاجمل ما يكون من مثال وشال عبئ المكان سنين ولم اوفيه شكره حتي الان
اخي احمد عبد المقصود الرجل النظيف قلبا وسجلا صاحب الملف اللي ماتلمسش من اي مشرف :-)
اخي الاصغر المرح دائما واللي هموم الدينا معرفتش تكسره ابو لسان مالح :-) شنوري اللي شال ازمات خفية للمنتدي وكان دايما الواجهة البشوش في عز الضيق
اخي محمد ممدوح رجل الميكانيكا اللي كل بشوفلة رد بفتكر شكل الترس او البيل وكل ردودة تحسسني انه قاعد جوة كرنك او موتور كبير رغم انه في الحقيقة ابعد ما يكون عن انه يلمس زيت في شغلة الحقيقي ,محمد ممدوح صاحب اعلي رقم مشاركات في نايل موتورز على الاطلاق كلها في العربيات والمرة اللي دخل فيها الاجتماعي اتوقف ومارجعش تاني :-)
لم انسي اخي الصغير شاركي صاحب لواء الدفاع عن الميجان حتي النهاية واحد اعضاء مجلس ادارة المنتدي واحد اكبر الحريصين على مصلحة المنتدي
واذا ذكرت شاركي لازم اذكر اخي ابو عبد الله محمد شهبور اللي قليلا ما شوفت حد بادب الاختلاف زيه مهما اختلف معاك يكون مؤدب ولما نسي حمله لوا الدفاع عن الياباني ضد شاركي وقد ايه كانت مشاركاتهم ساخنة وجميلة وهو ايضا احد اعضاء مجلس الادارة السابق
لم انسي اخي الاسمر ابن المدينة الساحلية العريقة بورسعيد اخي احمد حسن احد اعضاء مجلس الادارة واحد المؤثرين والمساهمين بقوة في بقاء نايل موتورز باقي على قوته
لم انسي محمد الطويل ابن اسكندريه الاصيل اللي فتح فيلته في الكينج لاجتماعات جميلة للمنتدي وعمره ما خذل واحد قال اي في اسكندرية
لم انسي احمد جنيدي ومحمد فهمي اسماء كتير فيكم مايعرفهاش لكن اللي يعرف نايل من اول ايامه يعرف قد ايه ادوه وقت وجهد ودعم عشان يقف على رجله
لم انسي اخي الصعيدي اللي عرض نفسه لموقف بايخ عشان خاطر اسم نايل موتورز ومش لازم اقول ياقوت
لم انسي اختنا الصعيدية ايضا نور القمر اللي تدخلت عشرات المرات لتقديم المساعدة الفنية للمنتدي في ازمات كثيرة وحبيت اقولها شكرا لكل مساعداتك
لم انسي اختنا الصغيرة مهندسة نهي اللي كانت بترد على مشاركة كل واحد باسلوبها الطفولي وساهمت كتير في رسم البسمه على وشنا واحنا متضايقين
لم انسي كريم كريبتون اللي تعبناه كتير قوي في تصميم كل شهادات التكريم للاعضاء اللي بتشوفوها كل سنة كاجمل لوحة امتنان من المنتدي للاعضاء
لم انسي اخي ابو معاذ وقت ما كلمني وقت ازمة المنتدي الشهيرة في 2010 وسقوطه لكذا يوم وقام برفع سرعه اتصالي بالانترنت فورا لاقصي سرعه ممكنه للتعجيل برفع الداتا بيز الخاصة بالمنتدي لست انا فقط بل انا وفريق الدعم كله حقيقي الشكر مايوفيهوش حقه
منسيتش اخي بحري اللي مابيعرفش يعمل غير الطحينة :-) الرجل اللي مختلفش علية اتنين من حسن خلقه وادبه واحترامه للجميع
مانستش اخي الاكبر احمد ابراهيم الملقب بكلاتاتا عشان مكنش يعرف الفرق بين الزينون والزيتون كلاماتا وبقي حجة في العربيات بعد كام سنة في نايل موتورز
مانسيتش اختنا علا عثمان اللي دخلت المنتدي ماتعرفش اي حاجة في العربيات غير انها بتمشي على اربع عجلات
وجه اليوم اللي شوفتها بتدي فيه support لحد بيسئل عن العربيات
كانت الفرحة مش سايعاني ان المكان ده فرق كتير قوي كدة
لم انسي اختنا الصغيرة ايضا دينا دونزي اللي دخلت المنتدي تسئل عن عربيات وبعد كدة لقيتها معانا بتعمل موضوعات باسمها في المنتدي عن العربيات :-)
لم انسي دكتورة ضحي وايدها في دراعي في القصر العيني وقت الثورة بتسحب دم وتقولي متخافش هاخد ليتر واحد بس :-) وبنزين عربيتها اللي قطع في القصر العيني معرفتش تروحي واضريت اكسر مصفاة تانك عربيتي عشان اسحبلها كام ليتر تروح بيهم عشان كل البنزينات قافله
لم انس ايمن الشرباصي يوم ماقابلته راجع من توكيل بروتون بتاكسي في عز الحر بقوله ايه روحت تشوف عربيتك قاللي لاء واحد كان عندة مشكلة روحت احلهالة و
قولتلة في الجو ده من غير عربيتك رايح تشوف مشكلة واحد في توكيل يبعد عنك 140 كم رايح جاي قاللي وايه يعني
ده باختصار ايمن الشرباصي ربنا يباركله
لم انسي اخي اسلام فريد ووقفته جنبي في عز ازمات المنتدي وما زال بيقدم الدعم الفني للمنتدي
لم انسي اخي الصغير ياسر طلعت اللي شال لوحدة عبئ الدعم الفني لفترة طويلة وكان دايما الجندي المجهول للمكان وما زلت بصحية من عز التوم لما يكون في مشكلة كبيرة رغم وجود شركة لتقديم الدعم الفني
لم انس اخي الدصديق الصدوق احمد سامي ابن المنصورة اللي ادي المنتي كتير قوي من وقته وجهدة في كل الاوقات
لم انس صديقي احمد كمال اللي تحتار ده دكتور ولا مهندس ولا بتاع طبيخ ولا بتاع اكل من كتر ماهو موسوعه في كل حاجة ما شاء الله ومابيحبش يفتي
لم انس صديقي بتاع الحشيش د.احمد عبد الرحمن اللي نفسه الناس تبطل حشيش :-) وقد ايه كانت مشاركاته مفيدة جدا للناس ولم يبخل على احد بمعلومة
لم انس صديقي م.طارق زويل اللي يخدمك في صمت وقد ايه كان بيفيد الناس في قسم ميتسوبيشي
لم انس صديقي م.احمد اسماعيل الساخر دائما من كل حاجة ومفيش ازمه عرفت تكسره وقد ايه كان مفيد جدا لقسم كيا في عز نشاطة
لم انس مهندس سمير الشهاوي احد اكثر الاعضاء تنظيما للافكار ومحب بشدة لكل ماهو اسيوي
صديقي العزيز واخي احمد مصطفي اللي قدر يجمع حب الناس ربنا يباركله على حب الناس ليه ويكمل المسيرة بدون كلل
صديقي اللي ماينفعش يكون بتاع ضرايب ابدا من طيبته بيشوي اللي خللي الناس تحبه من بسمته البشوش دائما
اخي الاصغر والاكبر سنا وحجما :-) حسين سونا اللي عايز يتجوز كوكا كان قدر يخللي الناس تحبه من كتر طيبه قلبه الغير طبيعية
منسيتش اخي معاذ الشرباصي ونادر نبيل وايمن بروتون ومهاب سعيد وعشرات الاسماء اللي مش هاوفيهم حقهم ابدا
وغيرهم كتير منسقين للاقسام واستشاريين كانو خير افادة وثقل لنايل موتورز
وعلى الجانب الاخر او زي ما بيقولو الجانب الغامض اللي محدش من الاعضاء يعرفه كانت حفر الباطن
الغرف المغلقة ومطبخ المنتدي الاداري
حياة تانية واسماء كتير منكم عرفو بعضها وكتير خمنو وطلعت تخميناتهم غلط وساعات تطلع صح
ناس شالو على كتافهم عبء الكيان ده
لم يبتغو جزاء ولا شكورا
شالو وما زالو بيشيلو عبئ اشراف اكبر منتدي سيارات مصري
منظومة واحدة بروح واحدة تتدخل عشان تحافظ النظام
رضيو انهم يكونو مخفيين عشان مايعملش اي حساسية بينهم وبين الاعضاء وتقريبا هو المنتدي الوحيد اللي اعضائة مايعرفوش مشرفينه
وده اللي خللي المشرفين حيادين جدا لانهم مش خافين حد يعرفهم ويتضايق منهم ويسببلهم حرج
مابيخافوش غير ربنا وبس وعمل تطوعي يتحسب ليهم انهم كانو تروس قوية في منظومة كبيرة
ربنا يقويهم ويعينهم على استكمالهم بنفس الروح
اخيرا وليس اخرا لم انسي اختنا سما الجنس الاخر الوحيد في منظومة ادارة نايل موتورز
والوحيدة اللي عرفت تخترق الجدار الحديدي لاشراف نايل موتورز وتخلي مجلس الادارة يطلبها بالاسم لاسباب كتير جدا وقدرت في وقت قياسي انها توصل لراس المنظومة وتبقي الترس التاني بعد نادر الطرابيشي في ادارة المنتدي وقدرت تحافظ على شعرة معاوية بينها وبين المشرفين والاعضاء بطريق تحسد عليها وتقدر تكون الجسر وحلقة الوصل بين المشرفين والاعضاء بطريقة سلسة ومحترفة
كل الاسماء اللي ذكرتها واللي مذكرتهاش واللي اجتريت معاهخا ذكريات اكثر من 6 سنوات احب اقولهم
شــــكـــــــــــــــــــ ـــرا
من عميق قلبي
ونشوفكم في احتفال المنتدي بدخول السنة السادسة كمان شهرين باذن الرحمن
اتوجه لكم...
وبجد وبكل حب ومن جوة القلب
بقول وبقوة
شــــــــــــــــــــــــ ــــكــــــــــــرا
لك ولكل ما ذكرتهم ومن لم تذكرهم
اداريين ومشرفين واعضاء
شكرا لنايل موتورز
ككيان يجمع فى داخله كل هذه الدرر
كمجتمع يساعد كل من فيه بعضه بعضا
شكرا
على كل المجهود الذى استمر سنوات وسيستمر بإذن الله
ثم بسواعدكم وسواعد الجميع
شكرا على كل اللحظات الجميلة التى عشناها فى هذا الصرح
شكرا على الأوقات العصيبة التى كنا نعيشها للبحث عن معلومه
ونجدها فى نايل موتورز بكل ود وبساطه وبلا مقابل
شكرا على الروح التى تسود جنبات هذا الكيان الذى نحبه
شكرا لكل من فكر وشارك وساهم وساعد واعطى من مجهوده ووقته
وماله ايضا وكما قلت استاذى العزيز بشكل تطوعى ليرى هذا الصرح النور
شكرا للحب والإخوة والصداقه التى جمعت الجميع
تقبلو جميعا بكل حب ارق واعطر تحيه من قلبى لقلوبكم
meshmesh78
مصطفى