انا جربت Carpet & Seat Foaming Cleaner قبل كدة ومعجبنيش خالص.. اولاً الفوم بتاعه كتير قوي بيتغلغل جوة الفرش وريحته بشعة.. والنظافة اقدر اقولك انه بينظف بنسبة 60% تقريباً
وكنت جايبه من كارفور , وعلى فكرة المنتجات دي موجودة في كارفور وفي امارات مصر
عرض للطباعة
فى كمان original للتابلوه السيارة بـ 14ج العبوه الصغيرة
وهو ممتاز بامانة
انا جربتوا هو حلو فعلا ومبيخليش الوساخة تمسك فى الجنوط بس قعد جوالى 3 اسابيع او شهر ومفعولة انتهى واستغلت بصراحة اجيبوا تانة
الأفضل منه وعن تجربة انتريور سوناكس الألماني.. ودي صورته وموجود في كارفور
https://encrypted-tbn0.gstatic.com/i...rE5RsPKoj49PDA
حضرتك جربت ال Carpet & Seat Foaming Cleaner
وهل ينفع على اى لون لفرش العربيه ؟؟ يعنى ميسبش اثر على القماش؟؟
بصراحه أنا ماجربتش منظف الموكيت والكراسي ده .. لأن عندي عامل الكراسي جلد
بس اللي أنا جربته فعلا وممتاز .. منظف الطابلوه , وأعتقد ان كل منتجات الشركه هاتكون بنفس درجة الكفائه .. بس أنا ان شاء الله هابقى أجيب المنظف ده عشان انظف بيه الأبواب (أقصد الأجزاء القماش اللي فيها ) ولما أجربه هاقول على النتيجه .
ملحوظه: لو حضرتك عندك فرش جلد كده عندي ليك نصيحه حلوه .. ممكن تجيب علبة كريم دوف .. وتاخد منه حته صغيره كده وتفرشها على الفرش .. وتجيب حته نظيفه وتدعك بس مش جامد .. هاتلاقي الفرش بينظف وكمان تبقى ريحته حلوه .. والعلبه تقعد معاك كتير .. ويبقى اسمك نظفت الفرش بتاعك بكلام فارغ .. 4 - 5 جنيه . ( بس ياجماعه الكلام ده للفرش الجلد بس .. أحسن حد يروح يحط كريم على القماش ويقولي انا بوظتله الفرش :ma: ) .
تحيـــــاتي
معلومة مفيدة بس ممكن الصابون الدوف او اى سابون عناية بالوجه فى صورة سائلة يفى بالغرض نقطة صغيرة على فوطة نظيفة وادعيلى
شكرا اخى على الموضوع والشركة دى من اشهر الشركات فى موضوع نظافة السيارات لكن الواحد لو مشي ورا العالم دى هنحتاج ميزانية تانية غعلشان نكفى نظافة السيارة
عندك حق ياباشا طبعا في الموضوع ده .. لكن مافيش مانع مثلا من استخدام المنتجات اللي مقدور عليها ومش مكلفه أوي ... زي مثلا ملمع الطابلوه (ممتاز جدا) بترش رشه بسيطه وتلمعه ويفضل معاك لفتره يعني العبوه دي هتاخد معاك وقت كبير على ماتخلص . وكمان مثلا منتجات الواكس والبوليش والحاجات دي , الواحد بيعملها كل فين وفين ده بالعكس بقى .. كتر الإستخدام الكتير ليها غلط على بوية العربيه .
لكن في بعض المنتجات الواحد مش شرط يستخدمها على طول .. زي مثلا ملمع الموكيت والفرش (وخصوصا فرش الأبواب) لأن ده طبعا ماينفعش يتفك يتغسل وكمان صعب ان الواحد يغيره .. انما مافيش مانع ان الواحد لو حس ان شكله اتبهدل يجيبه ينظف بيه مره كل فتره كبيره نسبيا (برضه حسب استعمال كل شخص) .
دي وجهة نظري
وأخيرا ... شرفت الموضوع ياباشا