أكتئاب البيكانتو 4500 جنية صيانة ال 90 الف

**divianella** · 11-02-2013 04:54 PM

اتصدمت انهاردة وانا بعمل صيانة ال 90000 عند كيا السبع اتوموتيف
و حسيت انى دخلت المستشفى بصداع طلعت وانا مقدمة على طلب زرع قلب

انا صيانتى المفروض تتكلف 4500 ؟؟؟ انا ؟؟؟ انا ؟؟؟؟

طقم دبرياج 1543
تيل فرامل + طنابير امامية 1470
فك جهاز الانذار (اللى ركبته عند الشركة الهندسية فى ميدان الحجاز) و تركيب واحد جديد 440
صيانة ال 90 الف 1085 ( عشان حطيت بنزين 80 فى ازمة البنزين و اضطريت انضف التنك ب 500)

من فضلكم لو جالى سكتة دماغية محدش يلحقنى

طبعا قولتلوا لاءءءءءءءءءءءءء اعملى بس الصيانة و نضف التنك
لو كنت اعرف من الاول كنت اديتهالكم و خدت مكانها مروحة

**AlGazar2** · 11-02-2013 06:01 PM

ايه الاسعار الخزعبليه دى و ليه تنضيف التانك ب 500 جنيه ما منظف دوره البنزين موجود و ب 35 جنيه و اعلى حاجة فيه الى بتنضف كل حاجة ب 70

و طقم الدبرياج للبيكانتو ب 1500 لييييييييييه دى السوبارو الدفع الرباعى طقم الدبرياج بتاعها مش بالتمن ده

و هو جهاز الانذار بايظ عشان يفكوه و يركبوا واحد تانى ولا عايزين اى مصلحه و خلاص

التيل و الطنابير من بره التوكيل و قطع غيار اصليه معتقدش هتعدى نص التمن ده و حوالى 100 جنيه تركيب لو هيركبوا عند ميكانيكى حرامى و طقم الدبرياج كذلك برضه

**mastr_n** · 11-02-2013 07:01 PM

اولا مبروك على الصيانة
ثانيا بجد وعن تجربة اكتر من مركز صيانة اكتشفت ان العميل بيدخل يشرب شاى بالياسمين ويدفع المبلغ المحترم ويطلع مبسوط ( رأى شخصى) انا اروح مركز الصيانة بس فى حاجة صعبة بس ومحتاجة جهاز كشف اعطال أو عطل فى الفتيس مثلا

انما صيانة دورية بتتعمل برة بأقل من نص التكاليف دية

**hi_nmr** · 11-02-2013 11:02 PM

بصراحه الله يعينك
انا شايف بما انك خلاص 90 الف ياعني خلاص الضمان قرب يخلص يبقي قطع الغيار دي كلها اشتريها اصلي من برة وميكانيكي كويس يظبطلك كل حاجه بنص السعر اللي بتتكلمي فيه ده
موضوع تنظيف التانك انت ممكن تفوليه كذا كرة ورا بعض بنزين نضيف شويه واهو هينضف لواحده لاني مش مقتنع بالحاجات اللي بتعمل تنظيف لدورة البنزين دي واللي جربها وفرقت معاه بجد ياريت يقولنا