موضوع قديم بس ملوش حل يارب حد يفيدني

**ahmed leithy** · 12-02-2013 05:43 AM

السلام عليكم
انا عارف ان الموضوع اللي هتكلم فيه قديم بس انا على اخري بجد منه
المشكلة اني ساكن في فيصل تبع سنترال الهرم ومن حوالي 7 سنين كانت اول محاولة ليا اني ادخل نت في البيت واتفاجأت بأجابة غريبة مينفعش انت خطك فايبر والنت حاليا بيوصل على النحاس بس روح قدم طلب تحويل روحت عملت طلبات كتير جدا وكلها رفضت وبيقولو مفيش امكانية في الوقت الحالي ومن ساعتها وانا متمرمط من الوصلات مع الناس في الشوارع المجاورة وطبعا كلنا عارفين الهم ده
المهم انا خلاص اتخنقت ومش عارف اعمل ايه سبع سنين بحاول ادخل نت او اغير الخط مش عارف مع العلم ان الشارع الموازي ليا الخطوط فيه نحاس
اتمنى حد يقدر يساعدني او حد يكون قدر يعدي المشلكة دي يفيدني
شكرا واسف على الاطالة

**alexaway** · 12-02-2013 07:39 AM

انا فى اسكندرية كان عندنا كل الخطوط الجديدة بتبقي خطوط هوائية زي الموبايل كدا وقالوا مفيش خطوط ارضي حتنزل , لغاية لما لقيت واحد شغال في السينترال وعطيته مبلغ ودخلت خط ارضي نحاسي ووصلت عليه نت , شفلك حد فى السنترال ظبطه وهو حغيرلك الخط بسرعة .

**احمد المصرى** · 12-02-2013 07:46 AM

الحل الامثل انك تلاقى حد فى العماره عندك مثلا وتشترك انت وهو وبس وتريح بالك من وجع القلب دا انا عامل كدا فى العماره عندى

**ahmed leithy** · 12-02-2013 02:04 PM

للأسف مش عارف حد في السنترال
المشكلة مش عندي انا بس دي في الشارع كله لو كان حد معايا في العمارة عنده نحاس مكنش هيبقى في مشكلة
انا شغال بالUSB بس ده خلاني انسى كلمة download ده غير فلوسها اللي مش بتخلص

**Y a r i s** · 12-02-2013 02:46 PM

موضوعك يا صديقي ملهوش حل
الا اذا تعرف واسطه في مجلس الشعب يحلهولك ... او تعرف حرامي شاطر يسرقلك الكيبول الفايبر من تحت الارض وساعتها بس. ممكن يستبدلوه بنحاس ... لكن الصبر طيب

**alexaway** · 13-02-2013 12:10 AM

بص لو الشارع فعلا كله نفس الخطوط دي ومفيش خطوط نحاسية داخلة الشارع يبقي معندكش غير حل واحد ,تشوف اقرب شارع ليك واقرب عمارة هناك لعمارتك اللي انت ساكن فيها وتعمل عقد ايجار قانون جديد لاي شقة هناك وتروح بالعقد للسنترال وتقدم علي خط ارضي وتبقي تظبط اللي حيجي يوصلك الخط انه يوصلك السلك لغاية العمارة اللي انت ساكن فيها وبالخط دا حيبقي تدخل النت , ودا احسن حل لمشكلتك لان الخط حيبقي باسمك وكمان اشتراكك مع نفسك .

**ahmed leithy** · 13-02-2013 05:10 AM

المشاركة الأصلية كتبت بواسطة alexaway

بص لو الشارع فعلا كله نفس الخطوط دي ومفيش خطوط نحاسية داخلة الشارع يبقي معندكش غير حل واحد ,تشوف اقرب شارع ليك واقرب عمارة هناك لعمارتك اللي انت ساكن فيها وتعمل عقد ايجار قانون جديد لاي شقة هناك وتروح بالعقد للسنترال وتقدم علي خط ارضي وتبقي تظبط اللي حيجي يوصلك الخط انه يوصلك السلك لغاية العمارة اللي انت ساكن فيها وبالخط دا حيبقي تدخل النت , ودا احسن حل لمشكلتك لان الخط حيبقي باسمك وكمان اشتراكك مع نفسك .

فكرة كويسة ولو منفعش هحاول اشوف ايه حد في الشارع اجيب الخط على تليفونه وامد سلك النت لحد عندي وابقى اديه وصله ببلاش حتى

**alexaway** · 13-02-2013 05:25 AM

المشاركة الأصلية كتبت بواسطة ahmed leithy

فكرة كويسة ولو منفعش هحاول اشوف ايه حد في الشارع اجيب الخط على تليفونه وامد سلك النت لحد عندي وابقى اديه وصله ببلاش حتى

يستحسن يبقي الخط باسمك لانك برضوا حتلاقي وجع دماغ ,مره يفصل خط التلفون او تحتاج تتصل بالشركة علشان السرعة ,حتوجع دماغك علي فاضي وحتبقي تحت رحمة الجار دا طول الوقت .
انت ممكن تظبط مع اي صاحب عمارة فيهم يعملك عقد ايجار صوري كدا وتدفعله مبلغ , علشان تقدم بيه علي خط التلفون وتظبط اللي بيركب العدد انه يبقي يتصل بيك اول ما يجوا يركبوا .