الموضوع: إلى كل من اشترى عربية مستعملة او بالتقسيط

موضوع حلو بصراحه ويمكن يفيد كل شخص بيفكر في الشراء وعشان كده هقول تجربتي في الشراء يمكن يفيد حد بيفكر يشتري

1- قررت تجيب مستعمل على قد فلوسك ولا تجيب جديد وتكمل أقساط؟
قررت اجيب جديد واكمل اقساط

2- ليه اخذت الاختيار ده؟
في اواخر 2007 دورت على مستعمل فعلاً وكنت هجيب ستروين أكسارا 2002 اوتوماتيك على 42000 جنيه بس لاني مكنتش بفهم في العربيات اوي خفت في اخر لحظه من المستعمل وخفت يطلع فيها مشاكل مكتشفهاش غير بعد ما اشتري وللاسف ملاقتش حد ممكن اثق فيه يساعدني في الكشف على السياره قبل الشراء

3 - العربية نوعها ايه؟ وموديلها؟ وكنت شاريها بكام ؟و معاك بقالها فترة قد ايه؟
اشتريت ماتريكس اوتوماتيك 2008 كان سعرها 89000 جنيه دفعت 60000 جنيه مقدم والباقي اقساط وهي معايا لحد دلوقتي يعني بقالها 5 سنين

4- صرفت كام تقريبا على العربية خلال الفترة دى؟
مش فاكر طبعا بس مش قليل عشان كنت مواظب على الصيانات ودي مكلفه غير اني ركبتلها فرش جلد بس حاجه محترمه وغاليه غير اني غيرت كبالن (للاسف عملتها في التوكيل ودفعت رقم وقدره ودي برضوا قله خبره معلش اهو الواحد بيتعلم)

5 - حاسس ان قرارك كان صح ولا غلط؟ ولماذ؟
كان صح من وجهت نظري عشان لو كنت عملت غير كده كان ممكن يتضحك عليا بسهوله جداً عشان الواحد مكانش بيفهم في العربيات خالص ساعتها

6- لو رجع الوقت بيك لمرحلة التفكير كنت هاتجيب عربية مستعملة كاش ولا جديدة قسط؟
هو انا فعلا بفكر الفتره الجايه اجيب عربيه تانيه وبفكر في المستعمل عشان الواحد بقى بيفهم شويه والحمد لله في حواليا كذا حد ممكن يساعدوني في الكشف على العربيه قبل الشراء وواثق فيهم باذن الله

- قررت تجيب مستعمل على قد فلوسك ولا تجيب جديد وتكمل أقساط؟
قررت اجيب مستعمل

ليه اخذت الاختيار ده؟
روحت مزاد تبع المخابرات واخدت فية عربية لوط كنت اسمع ان عربياتهم حلوة ومفيهاش غش

العربية نوعها ايه؟ وموديلها؟ وكنت شاريها بكام؟ و معاك بقالها فترة قد ايه؟
رينو ميجان موديل 2000 وكنت واخدها ب 25 الف بقالها 6 شهور

صرفت كام تقريبا على العربية خلال الفترة دى؟
العربية كان جاى فيها حجات كتير اوى ناقصة ووديتها الحرفين واتصرف عليها 12 الف جنية

حاسس ان قرارك كان صح ولا غلط؟
كان غلط لان العربية كل يوم بحوار واخر حاجة البور بتاع الكباس بتاع التكيف بايظ

لو رجع الوقت بيك لمرحلة التفكير كنت هاتجيب عربية مستعملة كاش ولا جديدة قسط؟
لو كنت اعرف انها كدة كنت جبت اى حاجة مستعملة و قريب زى لانسر بومة