السلام عليكم
كنت راجع على الدائرى الصبح الساعه 10:30 تقريبا .و ماشى 80 او 90 عادى يعنى .و منمتش كويس و مش قادر اسوق .
المهم فى اخر الطريق من كارفور الى كورنيش النيل فوجئت بمعشوقة قلبى A6 بليداتها ببابا غنوجها .ابتديت افوق و اصحصح .الغريب بقى انى اول مره الاقى واحد بفئه زى دى بيجرى اصلا .و اغلب المرسيدس بردو مبيجروش بيها خالص .
المهم كان هو فى ضهرى و عاوز يعدى و الطريق زحمه .و اللى قدامى قافل على .رعشتله و توكلت على الله و قلت هشد معاه من باب التسليه مش اكتر .و انى عارف انى هزعل جامد جدا فى الاخر هههههههههه
ابتديت اقرص و هو ورايا .و ربنا كرمنى بكام غرزه موت .خدتهم زى الفل و قفلت عليه .و سبحان الله انهارده العربيه كانت ثابته بطريقه غريبه .بس طبعا مش زى ال a6 طبعا الطريق خدمنى و الزحمه خدمتنى و معداش منى خالص .على الرغم من فرق التسارع
فى الاخر فرقت عنه ب 800 متر تقريبا .تقريبا هو كان استسلم و دمه اتحرق
النتيجه :متجريش مع a6 فى طريق مفتوح نهائى فرق التسارع رهيب .من ال 80 لل 160 انا كنت جايب اخر الدواسه و انا قدامه و هو بيقرب كانى ثابت و هو ماشى 20 مثلا .طبعا انا كنت بعمل كيك دون قبله و مكنتش مديله فرصه يحصلنى .
اللى استنتجته انه اللى بيركب الفئه دى بيعرف يجرى فى الطريق المفتوح و لكن فى الغرز و الزحمه لا .ممكن فرنا تقطعه .
فى غرزه خدتها من ضمن الغرز العربيه المفروض كانت تعرض منى جامد و تقلب و الغريب ان العربيه مسكت نفسها فى الارض و لا كانى راكب اودى مثلا .و الله مستغرب .اخر مره عملت غرزه زى دى قطم جامد مع لف الطاره كتير و كبس فرامل مع بنزين بعدها .كانت ايام الثوره فى الاول و العربيه عرضت منى على 170 و عملت دريفت السنين .حوالى مثلا 300 متر و الله .بس طبعا مش قصدى و الحمد لله ان سور الدائرى كان لافف فى اتجاه الدريفت هههههههه لى عمر الحمد لله
انما المره دى على 160 تقريبا و انا كنت متوقع يا هعوم و البس يا هلبس و اعوم . و الحمد لله محصلش حاجه من دى مش عارف ازاى .بجد بشكر ربنا و بطلت جرى .
الطريق كان زحمه جدا و خدت غرز جامده و كانت بتقفل على جامد .و الحمد لله الفرامل و العربيه كلبشونى فى الارض .و لحد دلوقتى مش مصدق .
العربيه دى عليها عفريت و الله العظيم
كام يوم الاقيها ثابته و جرايه و ناعمه جدا .و بعدها تلاقيها هبله و مفيش ثبات و نشفه و مبتجريش
بس مؤخرا اعتقد لقيت اسباب الموضوع دا و هعمل بيه موضوع قريب .
الحمد لله انى رجعت البيتو مش ناوى اجرى تانى
طبعا صاحب الa6 كان قارص جامد بس شكله ملوش اوى فى الغرز خصوصا انى كنت باخد الغرزه و بتقفل على زى الفك المفترس .يعنى كويس اوى انه ملبسش بفضل ربنا .انا طبعا مزنقتش عليه اصلا .انا كنت بجرى بعيد عنه .
نصيحه لكل اللى معاه سيراتو
اغسل العربيه من تحت و العفشه كويس .و شحم كل الجلب و المقصات .كلها بلا استثناءات و خلى ضغط الكوتش قدام 32 وورا 30 و ربط عفشه و اعمل صياناتك فى ميعادها .
عاوز تنعم العفشه و تزود الثبات .هتقولى الاتنين عكس بعض .هقولك صح .بس النتيجه الفعليه اثبتت العكس مش عارف دى ممكن حاله فرديه تقريبا .
1- هتشحم العفشه و تربطها
2-ترش مطرى و ملمع الكوتش فى البنزينه بعد الغسيل
3- ضغط الكوتش الخلفى 30 و امامى 32 عشان تثبت العربيه من الخلف و ما تعومش منك .او تقلل نسبة التعويم . و طبعا نيتروجين .
اول حجتين بيجيبو نتيجه مع مرور الوقت .يعنى تشحيم العفشه بينعمها بس بياخدله مثلا اسبوع و او اكتر و لو شحمتها تانى هتجيب نتيجه افضل .
الاسبراى بتاع الكوتش دا عجب العجاب بيطرى الكوتش بطريه سحريه .طبعا دا مبيتبعش دا بيرشوه على العربيه فى الكار كير تركيبه كده بعد الغسيل .و الانواع اللى بتتباع مبتطريش الكوتش نهائى شكل فقط
و الله اعلم