انا جبت اخرى من العربية

**maio_do** · 15-02-2013 03:32 PM

بسم الله الرحمن الرحيم

الموضوع بدا من حوالى شهر المياه بتنزل من العربية كل ماركن نزلت لميكانيكى اللى بتاعامل معاه لقيته قافل يوم والتانى روحت لواحد تانى ماعرفوش

فى الاول قالى دا خرطوم غيرته ب 40 جنية واخد مصنعيه 15 جنية برده تانى يوم المياه نقصت رجعتله

غيرلى كل المواسير الصغيرة واخد 50 جنية وقالى مستحيل تنقط تانى.

العربية كانت بتنزل المياه كل ماركن بعد ماغير المواسير بقت وانا ماشى بتنزل المياه كل مشوار اروحه اقف فيه وازود المياه

رجعتله قالى ومقفل فى وشه كده ما عربيتك اللى بايظة؟؟؟ دا ع اساس انك دكتور نساه

المهم رحت لواحد بتاع ريديتير قالى دى ماسورة ولازم تيجى استيراد ونحل ماعرفش اية وياخد وقت وكلام زى كده قلت وماله قعدت عنده 4 ايام لحد ماجبها وركبها

العربية بقت تسرب بس خفيف اوى يعنى لو ركنتها يوم ابقى املها تانى يوم وانا نازل قلت مفيش مشكلة انا كنت بملها كل مشوار بالظبط مش تعب يعنى

لحد امبارح اللى هو الفلانتين

نزلت الصبح طبعا مليتها مياه بس المره دى اخدت الجيركن كله استغربت بس قلت عادى اتحركت روحت المعادى وانا راجع ع الدائرى لقيت العربية سخنت وقفت مش معايا مياه واحد ابن حلال وقف بالصدفة سالته ادانى ازازة والحمد لله كفت وربنا ستر

سامع صوت غريب دخان طالع كان من الخرطوم اللى متوصل للريدتير ع طول وباين روحت ع الميكانيكى اللى بتعامل معاه فينك من زمان يا عم قالى كنت عيان قولتله الف سلامه غيرلى الخرطوم دا الله يبركلك لان انا قرفت غيره وكل حاجة تمام

نزلت باليل ويا ريتنى مانزلت روحت مساكن شيراتون وانا راجع ع المعادى وقفت فى الاوتوستراد فى حته ضلمة كده وركنت العربية لانها سخنت ونزلت املى مياه خبطت ع بواب وملهالى الخرطوم الجديد اتخرم برده

طلعت دائرى من المعادى وكانت الساعه 11 باليل قلت يا ريت الحق الميكانيكى فى التجمع الدائرى كان واقف وقفة زفت لان كان فيه تصليحات فى الحاره كاملة

العربية مكانتش بتسخن وماشى بيها من غير مياه وقفت بيها مرتين بس فى الزحمة لحد مالطريق فتح مشيت بسرعه العربية سخنت جدااا وقفت بيها فى منطقة ضلمة وقفلت العربية وكانت الساعه 12.30 باليل العداد وصل للاخر لحد ال h وقفت عشر دقايق لحد منزل فى النص ورجعت البيت ع الساعه 1

اتبهدلت ومش عارف العربية بتعمل معايا كده ليه واية سبب الخرطوم يبوظ مرتين حد حصل معاه كده ؟

**ahmedaliaeg** · 15-02-2013 04:03 PM

ممكن تكون العربيه بتنفخ و الحل فى تغيير الجوان
والله اعلم

**maio_do** · 15-02-2013 04:08 PM

المشاركة الأصلية كتبت بواسطة ahmedaliaeg

ممكن تكون العربيه بتنفخ و الحل فى تغيير الجوان
والله اعلم

مش فاهم يعنى اية بتنفخ وتقصد جوان وش سلندر ولا غطا تاكيهات؟

**buddha** · 15-02-2013 04:11 PM

بس الراجل بيقول انها وهى حتى مركونة بيكون فى تسريب !!!!!!!!!!!!!!!!!!!!!!!

لكن فى حالة وهى ماشية يبقى جوان عشان طبعا فى تنفيخ...... حل مؤقت عشان الخراطيم ما تضربش انك تسيب غطاء الاربة مفتوح عشان التنفييس

كان الله فى عونك حبيبى والله العربيات القديمة دى بتربى ال يشتريها
الله معاك يا باشا

**AlGazar2** · 15-02-2013 04:17 PM

بص يا باشا الاول كده بتسخن على سرعه يبقى عيب جوان وش سلندر بس اركن ده على جنب شويه و الحاجة التانيه الريدياتير عايز يتسلك فسلك الريدياتير الاول و شوف طبب المياه ايه اخبارها و الماسوره الى ورا اسمها الشجره تقريبا و اكشف على طرمبه المياه و ترموستات الكوعه

**maio_do** · 15-02-2013 04:17 PM

المشاركة الأصلية كتبت بواسطة buddha

بس الراجل بيقول انها وهى حتى مركونة بيكون فى تسريب !!!!!!!!!!!!!!!!!!!!!!!

لكن فى حالة وهى ماشية يبقى جوان عشان طبعا فى تنفيخ...... حل مؤقت عشان الخراطيم ما تضربش انك تسيب غطاء الاربة مفتوح عشان التنفييس

كان الله فى عونك حبيبى والله العربيات القديمة دى بتربى ال يشتريها
الله معاك يا باشا

فعلا هى ربتنى بس المشكلة بتاعت وانا ماشى اتحلت المشكلة دلوقت ان الخرطوم دا تانى مرة يتقطع الىل متوصل بالريدتير ع طول دا ليه سبب ولا سوء حظ؟

**maio_do** · 15-02-2013 04:20 PM

المشاركة الأصلية كتبت بواسطة algazar2

بص يا باشا الاول كده بتسخن على سرعه يبقى عيب جوان وش سلندر بس اركن ده على جنب شويه و الحاجة التانيه الريدياتير عايز يتسلك فسلك الريدياتير الاول و شوف طبب المياه ايه اخبارها و الماسوره الى ورا اسمها الشجره تقريبا و اكشف على طرمبه المياه و ترموستات الكوعه

بص هى سخنت علشان مفهاش مياه خالص واعمل تسليك الريدتير دا ازاى او فين؟

**bebom** · 15-02-2013 04:27 PM

كل ده حصل معايا بالظبط والله كويس الي كان بيحصل ونته لوحده انا كان بيحصل وانا مع الاولاد
ال حمد لله علي كل حاجة
-الصبح والعربيه بارده زود مياه وبص من تحتها حاول تشوف اتسريب منين بص من فوق ومن تحت عند الماتور
لو لقيت او ملقتش
-سخن العربيه وبص برده بس لما العربيه تسخن
لو لقيت او ملقتش
-سخن العربيه وروح مشوار وبص برده
والاحسن لو ميكانيكي يبصلك عشان لازم يرفع العربية ويبص عشان لو تسريب بسيط يبان
انا غيرت الاتي:
1-خراطيم
وبرده في تسريب
2-ماسورة ملقتش جديد لقيتها فيبر روحت عملتها عند الخراط احسن
وبرده في تسريب
3- كويل الي ماسك اخرطوم كان مكسور
وبرده في تسريب
4-طرمبة مياه
وبرده في تسريب
5- جوان وش السلندر وال حمد الله مخرطتش الوش
ال حمد الله مفيش اي تسريب تاني بس عايز اقلك انا والله كنت والولاد بنخاف نخرج بيا اول مشتريتها منه لله الي باعهالي بس ال حمد الله حيتها من الاول وجديد وكنت وخدها بسعرها وممكن اغلا السعر مش لوقطة يعني والك عندي كان كاره العربية استحملتها كتير ودلوقتي بزلهم عشان اركبهم

بحكيلك مشكله من الي كانت فيها عشان انته متزهقش

**أحمد عبدالله** · 15-02-2013 04:30 PM

1-التاكد من سلامة الردياتير
2-التاكد ان طلمبة المية مش مخرومة
3-التاكد بعد ذلك ان المروحة شغالة(واغلب الظن هيه دى المشكلة-ممكن تكون بتشتغل وتفصل فاما تتاكد من علبة الفيوزات او من الترموستات ولو مش كده تخلى الكهربائى يعملك تقوية)
4-جوان
وللافادة عند الضرورة خلى الكهربائى يعرفك مكان فيشة المروحة لما تسخن افصلها هتشتغل المروحة مباشر لحد ما توصل وممكن تساعد بتشغيل التكيف

**blazer** · 15-02-2013 04:37 PM

غير الخراطيم كلهااا
غير ترموستات الحراره
غير صباع الحراره
سللك الردياتير و اغسله بميه نار مخففه " بتوع الردياتير بيغلو ميه نار مخففه بتغسله من جوه "
واتاكد من ان طبب الميه سليمه و ان طرمبة الميه مش بتسرب