خبرة سيئة أخرى مع البنك الأهلى سوسيتسه جنرال

**fepsceasar** · 19-02-2013 11:34 AM

الموضوع انى بقسط مع البنك الاهلى سوسيتيه جنرال وبادفع القسط بانتظام كل شهر والحمد لله على كده في ظل الظروف اللى احنا فيها
المهم بقى الاقى كل شوية حد يكلمني الو انا من البنك وعلى حضرتك مصاريف ادارية 120 جنيه !!!
مصاريف إدارية ايه ما انتوا واخدين حقكوا وكسبانين ..لا اصل دى مصاريف من البنك المركزي ..طب ما تدفعوها انتوا هم بيحملوها عليا انا ليه..والمهم دفعت
من يومين واحد بيتص بيا الو احنا حطينا على حضرتك مصاريف 120 جنيه غرامة لانك دفعت فى نص الشهر والمفروض تدفع فى اول يوم عمل فى الشهر!!!!
قلتلوا انا بدفع من سنتين ونصف وما فيش حاجة بالمعنى ده ولا اى انذار ولا اى حاجة ..لا يا فندم ازاى ده مكتوب فى العقد قولتلوا مكتوب فى العقد غرامة 120 جنيه لو اتاخرت ..يقولى غرامة بيقدرها البنك من غير ما يرجع للعميل..بذمتكوا فى اجحاف ايه بعد كده ..
بعت شكوى على الايميل ولا حياة لمن تنادى ..
حد عنده اقتراحات اعمل ايه مع البنك التييت ده
ارجوكوا ما حدش يلومنى على حكاية التقسيط مع البنك وانا طبيعي بلوم نفسي وبقول لكل واحد مد لحافك على قد رجليك وسالت فى شرعية المعاملة هناك من افتانى بانها عقد مرابحة ..
ارجوكوا ركزوا معايا فى الموضوع ده عاوز اشتكيهم ويرفعوا الغرامة والمصاريف الهبلة بتعتهم

**Sh_sunsea** · 19-02-2013 12:38 PM

شئ غريب جدا - للاسف برضه مقسط مع نفس البنك على سبع سنين
وبعد مرور اول سنة حبيت اعمل جمعيات واسدد القرض علشان قفلت من قصة القروض دي

افجائ الراجل بيقولي اني عليه 90% مثلا من المبلغ - انا كنت متخيل اني لما آجي أسدد بعد مرور سنة - هايعيد حسابات القرض وفوائده وكأنها على سنتين مثلا مش سبعة - ويخصم منهم الاقساط الي دفعتها وادفع الباقي - لآ -

ده غير غرامات الدفع المبكر الي بتوصل 1-2% تقريبا - شئ غريب جدا

يعني انا شهريا بدفع 30% اصل القرض و 70% فوائد - وكل شهر الفائدة تقل والاصل يزيد - ليه لما ادفع دلوقتي يظل 70% فوائد السبع سنين كما هي

**fepsceasar** · 19-02-2013 01:12 PM

المشاركة الأصلية كتبت بواسطة sh_sunsea

شئ غريب جدا - للاسف برضه مقسط مع نفس البنك على سبع سنين
وبعد مرور اول سنة حبيت اعمل جمعيات واسدد القرض علشان قفلت من قصة القروض دي

افجائ الراجل بيقولي اني عليه 90% مثلا من المبلغ - انا كنت متخيل اني لما آجي أسدد بعد مرور سنة - هايعيد حسابات القرض وفوائده وكأنها على سنتين مثلا مش سبعة - ويخصم منهم الاقساط الي دفعتها وادفع الباقي - لآ -

ده غير غرامات الدفع المبكر الي بتوصل 1-2% تقريبا - شئ غريب جدا

يعني انا شهريا بدفع 30% اصل القرض و 70% فوائد - وكل شهر الفائدة تقل والاصل يزيد - ليه لما ادفع دلوقتي يظل 70% فوائد السبع سنين كما هي

بياخدوا الفوايد الاول وبعدين اقساط اصل المبلغ.. بجد حاجة تقرف وانسى العميل ده بيتقلب فى وضح النهار

**S O P H O S** · 19-02-2013 01:21 PM

بنك سئ من الكلام ده ..

**Y a r i s** · 19-02-2013 01:24 PM

ايه ده ايه ده
يعني انا لمن اجي بعد سنة. واكون اتصرفت في باقي تمن العربية يقولولي ملانش دعوة عاوزين المبلغ كامل وبالفوائد لمدة خمس سنين ... وبعدين مالمصاريف الاداريه بتدفع قبل مايدوك القرض تقريباً ٢٥٠٠ او ٣٠٠٠ جنية حاجة زي كده مش فاكر انا مقسط على بنك عووودة

**hossam_elwani** · 19-02-2013 01:26 PM

الاول هما بياخدو فعلا غرامة تأخير عن يوم السداد وده فعلا بيبقى مكتوب فى العقد وفى البنك الى بتعامل معاه 50 جنيه هيا قيمة غرامة التأخير وخليك حريص فى عدم تخطى يوم السداد

وهما بياخدو النسبه الاكبر من الفوائد فى اول سنه ونسبه اقل من اصل المبلغ

**hossam_elwani** · 19-02-2013 01:34 PM

المشاركة الأصلية كتبت بواسطة y a r i s

ايه ده ايه ده
يعني انا لمن اجي بعد سنة. واكون اتصرفت في باقي تمن العربية يقولولي ملانش دعوة عاوزين المبلغ كامل وبالفوائد لمدة خمس سنين ... وبعدين مالمصاريف الاداريه بتدفع قبل مايدوك القرض تقريباً ٢٥٠٠ او ٣٠٠٠ جنية حاجة زي كده مش فاكر انا مقسط على بنك عووودة

انا كمان مقسط من بنك عوده والمصاريف الاداريه بتبقى 1.5% من اصل القرض انا دافع مثلا 1150 مصاريف اداريه

واعتقد انها بتدفع مره واحده فى بداية التعاقد يعنى مش كل سنه والله اعلم انا اول سنه معاهم وممكن يكون فيه فعلا مصاريف رمزيه كل سنه دمغات وخلافه

اما بخصوص السداد المبكر بيبقى كالاتى

بتشوف ماهو متبقى عليك فى لحظة ويوم السداد ( شامل حتى فوائد البنك ) و تضربه فى نسبة السداد المبكر ولتكن مثلا 5% = المبلغ الى حيطلع ده هو مكسبهم من السداد المبكر + وحتضيف عليهم اصل المبلغ المتبقى فى يومها وده طبعا بيبقى ظاهر عندهم على الكمبيوتر وممكن تاخد نسخه تفصيليه مطبوعه مفصله زى ما انا واخد وفيها ماهو متبقى وكل ماسبق

**fepsceasar** · 19-02-2013 01:35 PM

المشاركة الأصلية كتبت بواسطة hossam_elwani

الاول هما بياخدو فعلا غرامة تأخير عن يوم السداد وده فعلا بيبقى مكتوب فى العقد وفى البنك الى بتعامل معاه 50 جنيه هيا قيمة غرامة التأخير وخليك حريص فى عدم تخطى يوم السداد

وهما بياخدو النسبه الاكبر من الفوائد فى اول سنه ونسبه اقل من اصل المبلغ

بس انا بقالي سنتين ونص ماحدش قال الكلام ده بتاع غرامة التاخير
يعنى هينفع اشتكى ويشيلوا الغرامة ولا ادفع ثم اشتكي