الموضوع: بعد عناء تغيير اجزاء فى العفشه عقبال الباقى

السلام عليكم

كان نفسى يبقى تقرير مصور بس للاسف عندى فضول غبى انى امسك اى حته تطلع من العربيه واقعد العب فيها واحاول افهم شغاله ازاى وعلى ذلك دايما ايدى بتبقى زى ايد الصنايعى بالظبط من شحم وخلافه
مرجيحتى اللى هى عربيتى كانت خلاص جابتلى احباط والناس كلها حواليا عماله تغير عفشه وتظبط العفشه وتجيب عفشه بتاعه مواتير اكبر لدرجه ان واحد غير نص كامل بالعفشه عشان يغيظنى تخيلوا
ده غير انى ركبت فولكس كادى اللى هى مبنيه على من قدام على نفس عفشه البولو وكان فيها باور اللى خلانى بقيت حاسس انى راكب كنبه بتتمرجح على وش الميه فى يوم عاصف
عربيتى ابيزا 94 مكنه انجكشن 1.4 كانت مركونه مش مرفوعه 4 سنين فتقريبا كل كاوتشه او جلبه فى العربيه ماتت المهم صبرت لحد ما جمعت مبلغ كويس وبدات فى العفشه

- اختيار العفشجى
رحت لعفشجى اسمه شعبان ده موجود عندنا فى المنطقه بس بصراحه اول مره اكتشف انه متمكن جدا والصنايعيه اللى عنده بيفهموا بنسبه كبيره المهم التوصيات جت كالاتى اولا صاحبى الانتيم نصحنى بيه وقاللى بعمل كل شغل العفشه عنده ثانيا محمد سيد قعد يوصفلى مكانه وانا فهمت المكان على واحد تانى خالص ثالثا صاحبى اللى شغال ميكانيكى وابوه اللى خاطره كبير قوى عند شعبان وكان زمان لما كان معايا الجولف رحتله مره ظبطلى علبه الدركسيون العاده بس ساعتها كانت ورشته صغيره جدا قبل ما يفتح مكان اكبر

- تقرير العفشجى
رفع العربيه وحل العجله وقاللى هتحتاج الاتى
1- بيض مقصات
2- بارات علبه الدركسيون
3- جلب مقصات مدوره
وقاللى العفشه عندك رايحه فى ستين داهيه ولازم تتغير بس هى مش هتبوظ حاجه تانيه لانه كله بايظ :)

-المكونات واسعارها
1- بيض المقصات 150 جنيه توبران
2- جلب مقصات مدوره 80 جنيه اللى هى الحديد مش الالمونيوم توبران
3- بارات خارجيه 150 توبران
4- بلى العجل 200 جنيه توبران واللى خلانى جبته خشونه جامده قوى من بعد ال30كم/س

-خط سير العمل
العربيه اخدت وقت طويل قبل ما يبدا شغل فيها لانه شغال بنظام صنايعيه وكل صنايعى معاه صبى يمسكوا عربيه من الاول للاخر وهو وابنه بيشرفوا فى الغالب وابنه متخصص اكتر فى الكشف على العربيات وكتابه الطلبات بتاعتها المهم بدأو فيها كالاتى
1- حل الطنابير والتيل والمقص بره العربيه
2- حل علبه الدركسيون اللى هى سكاترا عاده وده طبعا اسهل من الباور بمراحل
3- اخدت علبه الاسكاترا وطلعت على الخراط عشان يكبس البارات الداخليه عشان كانت خفيفه
4- جبت كاوتش مزيكا اللى بيركب فى الاسكاترا وافايز للتثبيت
5- اخدت الطنابير والمقصات للخراط عشان يكبس البليه والجلب المدوره
6- رجعت بالحاجه تانى واشتريت مساميرين نص سن عشان يقفل
7- حل المساعدين اللى ورا وجبنا جلبه اعلى بحوالى 5 سم من الاصليه اللى راكبه
8- قفل العربيه وطلعنا نجرب
9- طلعت على الراجل بتاع الزوايا واللى بالمناسبه من المتميزين فى نظرى
10- بعد ظبط الزوايا رصصت العجل وطلعنا نجرب
11- روحت على البيت علما بانى خارج الساعه 2 وراجع الساعه 12 وكمان كنت مشترى الحاجه ومخليها فى العربيه

التقييم والملاحظات
1- عربيه تانيه بمعنى الكلمه ما شاء الله اتبسطت منها جدا وشيلت فكره انى ابيعها من دماغى
2- التخبيط والشخلله والمرجحه والهلهله اختفوا تماما من العفشه
3- العربيه المساعدين اللى فيها معقولين ونصحنى لو هغير اجيب جديد ولو هجيب استيراد يبقى بلاش اغيرهم دلوقتى لان هيبقوا بنفس حاله اللى راكبين
4- علو العربيه فرق جدا فى المطبات مع وجود صوت خبط فى المساعد الشمال ورا مع الحموله الكامله
5- البليه اللى فى العجله الشمال ناحيه السواق كانت مبوشه بشكل وهمى لدرجه انها فكت من بعضها اول ما الخراط حاول يفكها والبلى طالع فيه نسبه صدئ
6- القطمه اللى ركبتها فيها جزء فير ناقص بيحكم العمود عشان ميبقاش فيها بوش الجزء ده ناقص ومخلى الطاره تعمل صوت
7- الفرامل اتحسنت بشكل كويس بس محتاج اغير الطنابير اللى ورا او املاهم عشان العربيه مش بتمسك من ورا خالص
8- الكاوتشه اللى شبه البوق اللى بتغطى مسامير علبه الدركسيون اتقطعت والراجل بيحلها ودى الملاحظه الوحيده فى الشغل كله

التكلفه
1- 550 مقابل القطع اللى اشتريتها للعفشه
2- 60 خراط لكبس الجلب والبلى
3- 25 كاوتش مزيكا للاسكاترا
4- 12 علايات للسوست اللى ورا
5- 70 ظبط زوايا وترصيص ال4 فرد
6- 20 للصنايعى اللى اشتغل فى العربيه
7- 25 انتقالات ومسامير واكراميات للصبيان
8- المفاجاه الكبرى 100 مصنعيه العفشجى بما فيها تشحيم علبه الدركسيون وبصراح الراجل قاللى هات اللى تجيبه عشان تبع الاسطى مختار واللى هو عامله خاطر بصراحه وده ابو صاحبى اللى بالمناسبه ميكانيكى كويس جدا فى العربيات الكربراتير
يعنى تقريبا من 850 الى 900 جنيه شاكب راكب

موقف مش هنساه
بعد ما ظبطنا زوايا الراجل بتاع الزوايا قاللى تعالى نجرب طلعت على الهادى الاول وبعدين العربيه اغرتنى اجرى بيها ولسه بقول العربيه تمام وعجبانى كانها مش عربيتى وصاحبى واخوه راكبين معايا ورا واللى بالمناسبه صاحبى اللى هو الميكانيكى معاه اوبل فكترا 2001 بس فيها سنسور بايظ فبقوله دانا هحط عليك لقيت ميكروباص وقف قدامى مره واحده وانا الفرامل ضعيفه فى الاساس المهم ضربت فرامل براحه عشان العجل اللى قدام ميقفشى عشان متزحفشى لقيت مفيش فايده رحت كابس قوى العربيه عملت الصوت الشهير واخدت بتاع من 10 الى 15 متر بحاول تقف المهم بتاع الفولكس اتحرك تقريبا متر من مكانه والعربيه وقفت تقريبا على بعد 50 سم منه وقفنا بعدها 5 دقايق عمالين نحمد ربنا والراجل بتاع الزوايا يقولى انا شريط حياتى عدى قدامى وانا قاعد جنبك وصاحبى يقولى اديك مكنتش هتلحق تشد معيا اصلا واخوه بقى اللى نكته كان راكب ورايا وبيحاول يدوس فرامل من مكانه :) المهم عدت على خير
بس فى بقى ملاحظات
اولا العربيه معومتشى وهى بتفرمل مع ان العجل كان بزحف ومطلع شياط على الارض
ثانيا مفيش رعشه فى العجله الشمال اللى كانت فيها مشكله البليه
ثالثا انا كنت دايس دبرياج وانا بفرمل ودى طبعا من هول الموقف لانى كنت على التانى ولو كنت خليت الموتور يساعدنى كانت فرقت كتير
رابعا الرجل بتاع الزوايا هيحرم يطلع يجرب مع حد معاه ابيزا تانى عشان بس لو حد راح يظبط هناك
خامسا واحد ملتحى كان معدى واتفرج على الموقف كله راح قاللى اسد والله يبنى انك عرفت توقفها ودعالى دعوتين حلوين لان بتاع الفولكس اصلا كان واقف شاغل حاره من الطريق اللى هو حارتين اصلا ومش سايب فرصه كمان لحد يعدى من يمينه عشان الناس بتنزل وشمالى كان فى اوتوبيس ماشى على مهله بس كان قفل الغرزه