الموضوع: تغيير فلتر بنزين ميجان بنفسك ( سهل جدا )

السلام عليكم

فلتر بنزين العربية فى موديل 2007 اللى معايا الوكيل موجود فى الجنب الشمال من العربية تحت الباب الخلفى قدام الكاوتش الخلفى من تحت مباشرة

فلتر البنزين بيبقى فيه خرطومين راكبين فيه واحد جاى من تانك البنزين والتانى رايح للمحرك

فلتر البنزين عليه سهم مؤشر كدا لاتجاه سريان البنزين عند نقطة بداية السهم دا مدخل البنزين للفلتر عند قاعدة الفلتر

ورأس المؤشر نفسه اتجاه سريان البنزين بتؤدى للفتحة الخارجة للبنزين من الفلتر عند وش الفلتر بيبقى فيه غطاء مدور دا اللى هو وش الفلتر

طيب التركيب أزاى ؟؟ الفلتر راكب بشكل أفقى

هتبص تحت العربية على الفلتر القديم هنلاقى وش الفلتر باصص ناحية الكاوتش الخلفى معنى كدا إن الخرطوم اللى راكب فيه اللى هو الخرطوم الخلفى إنه الخرطوم اللى رايح للموتور

نبص لقاعدة الفلتر وللخرطوم اللى فيها اللى هما باصين للكاوتش الأمامى فى العربية ودا الخرطوم اللى جاى من تانك البنزين على الفلتر مباشرة


يعنى الخرطوم اللى ورا هو الخرطوم اللى رايح للمحرك والخرطوم اللى قدام هو الخرطوم اللى جاى من تانك البنزين

كل خرطوم فيه فيشة فيها زرارين من فوق ومن تحت بنضغط عليهم ونجيب مفك ونحاول نطلع بيه الفيشة لأنها بتبقى ماسكة كويس صعب تشدها بإيدك

نعمل كدا مع الخرطومين ..... طبعا هنلاقى شوية بنزين نزلوا على الأرض خلى بالك عشان متغرقش نفسك وعشان ضغط البنزين ممكن يطير بسرعة

بعدين بتسحب الفلتر من الحلقة اللى راكب فيها وتركب الفلتر الجديد زى ما الفلتر القديم كان راكب بالظبط وتضغط الخراطيم فى أماكنها كويس جدا لازم تسمع صوت التكة بتاع الفيشة بعد ما تركبها عشان تتأكد إنها دخلت فى مكانها

الصورة دى للتوضيح يا جماعة أنا مشاور بالأحمر على وش الفلتر اللى راكب فيه الخرطوم اللى رايح للمحرك ودا بيبقى باصص على الكاوتش الخلفى
ومشاور بالأخضر على الفيشة اللى فيها زرارين بنضغط عليهم عشان نطلعها
ومشاور بالأرزق على قاعدة الفلتر اللى هى باصة على الكاوتش الأمامى للعربية واللى بيركب فيها الخرطوم اللى جاى من تانك البنزين




بالنسبة لتنظيف الفلتر فهى عملية لا تصلح إلا مؤقتا يا أصدقاء لأن كل حاجة ليها عمر افتراضى والفلتر بيتملى شوائب

بس لو عايز تنظفه مؤقتا هتعملى الآتى

بعد ما تفكه بيبقى جواه شوية بنزين حط صوابعك الاتنين على فتحات الفلتر ورجه جامد وبعدين سيب البنزين ينزل من الفتحة اللى بيدخل منها البنزين من التانك ( اللى هى عند قاعدة الفلتر ) وأنفخ فيها ببقك بسرعة
هتلاقى البنزين لونه أسود

وصل الفيش فى الفلتر تانى من غير ما تركبه ومن غير ما تضغط الفيش على الآخر ودور مارش مرتين كدا وأنزل

حوش منه الفيشتين هتلاقيه اتملى بنزين تانى وكرر الى عملناه قبل كدا وركبه تانى دى أفضل طريقة لتنظيفه مؤقتا


طبعا أنا مرضتش أقول لكم إنك تحط بنزين فى الفتحة الخارجة من الفلتر والبنزين ينزل من الناحية اللى بيدخل منها عشان أنت مش ضامن نقاء البنزين اللى انت بتحطه فى الفلتر

أنا بعمل نفس الكلام ولكن ينزل البنزين ثم يقطع ثم أكرر عمل هذا الكلام حتى أملأ الزجاجة

كيف يحدث هذا عندك ! أكيد عندك عيب أو تعديل كهربائى