الموضوع: دخان اسود من شكمان اللانوس 99 اوتوماتيك

السلام عليكم ورحمة الله وبركاته....
عندى استفسار وارجو الاقى المساعدة هنا فى المنتدى الجميل ده ... عندى عربية لانوس 99 اوتوماتيك ومن كام يوم لاحظت خروج دخان اسود من الشكمان بيكون بسيط فى اول الدوارة وبعدين يختفى لكن لما بدوس بنزين وعداد r.p.m يوصل ل 3 وما اكثر بيطلع الدخان اسود بشكل كثيف لكن طول مانا تحت ال 3 عادى واسمحولى اقولكم ظروف العربية يمكن اوفر عليكم احتمالات
1- لسة حاطط زيت شيل 3 الاف كيلو وعامل بيه 850 كم من الالف الاولى
2-دايما بحط بنزين 90 او 92 عمرى ما حطيت 80
3-لسة مغير الفلاتر والبوجيهات والرشاشات من اقل من شهرين
4-معظم مشى العربية جوة البلد فى الزحمة يعنى بتقف اكتر ما بتمشى
5-فى الفترة الاخيرة ويمكن دى تكون ملحوظة مهمة كان عندى مشكلة فى المارش سلك المارش كان سايب والحمد لله عملته بس على ما وصلت للعيب وعملته كنت بعمل حركة غبية شوية وانا بدور كان طبعا المارش مش بيقوم فكنت ساعات بدوس بنزين مع الدوارة وفى مرات كنت بكبس بنزين جامد وانا بدور وساعات كنت مش بتدور واسمع صوت رزعة جامد كده زى ما يكون حديدتين خبطوا فى بعض ودلوقتى طبعا بطلت الحركة دى بعد ما المارش اتظبط.
6-رحت لاربع ميكانيكية كل واحد فيهم قاللى حاجة واحد قاللى غير حساس الشكمان والتانى قاللى اغير طقم الرشاشات والتالت والرابع رايهم واحد وهو انى معملش حاجة خالص بس قالولى اطلع بالعربية مشوار جامد على طريق سريع وافتح فى السرعة شوية بحيث المكنة تنفض القرف اللى جواها ونصحونى اغير الزيت بعد اول الف كم رغم انه 3 الاف والزيت فعلا لونه اسود وطبعا قالوا احتمال تكون تفويلة البنزين الاخيرة كان البنزين مخلط فياترى رايكم ايه وهل فيه حد مر بالتجربة دى قبل كده وتنصحونى بايه؟؟
فى حاجة كمان لاحظتها فى نفس الوقت ان المكنة صوتها باءة فيه زى نعرة كده بالذات وهى عالاول والتانى ففى واحد صاحبى بيفهم فى العربيات قاللى ان ده بسبب الحركة اللى كنت بعملها انى بدوس عالبنزين جامد وانا بدور فهل فعلا ده صح وانا عايز افهم هل موضوع صوت النعرة ده له علاقة بالدخان الاسود اللى بيطلع ولا ايه وايه الحل اللى تنصحونى بيه؟؟ معلش طولت عليكم بس حبيت احكى التفاصيل عشان لو حد حب يساعد تبقى الظروف كلها واضحة قدامه وشكرا جزيلا لكم

المشاركة الأصلية كتبت بواسطة moh.hassan

السلام عليكم
يوجد احتمالين باذن الله
أولا: حساس الشكمان
ثانياً : الفصل بتاع الاتوماتيك عندك ممكن يكون عاوز يظبط (ريجلاش) علشان ما بيكملش المشى على الغيار للاخر (بيحرق الغيار) وحضرتك بتقول ان معظم مشاويرك فى البلد .
فحضرتك فعلاً تروح مشوار كبير شوية زى 20 كم رايح جاى وزود سرعة علشان ممكن يكون السبب الثانى عامل كربون كتير فى الشكمان وبعد المشوار دة لو لسة الدخان موجود يبقى اكشف عن الرشاشات لو سليمة يبقى حساس شكمان

جزاك الله خير يا بشمهندس محمد انت فعلا ساعدتنى كده فى ترتيب افكارى خلاص انا اجرب ابسط الحلول اللى هو مشوار كبير برة البلد وبعدين نشوف احتمالات الرشاشات والشكمان شكرا ليك مرة تانية