الموضوع: تجربتى مع فقد اللوحات (النمر)

الاخوة الافاضل تعلمت واستفدت كثيرا من هذا المنتدى واتمنى ان افيد الاخوة الاعضاء بهذا الموضوع
فى البدايه نصيحة لكل مالكى السيارات ان يحاولوا تثبيت النمر جيدا فى الاكسدامات ولا يعتمدوا على المسامير الخاصة بالنمر فقط ،تغطية السيارة بغطاء فى حالة الاضطرار للركن فى الشارع .
واليكم تجربتى اشتريت سيارة بى ام وصاحبها عملى توكيل وفى الاسبوع التانى كنت فى سفر فى المنصورة وراكن فى الشارع صحيت الصبح ورايح على العربية فلم أجد النمرة الخلفية وواضح اثار عنف فى خلعها بصيت للامامية فوجدتها فى مكانها ، سالت الناس والجيران حد شاف حاجه محدش شاف حاجه ، المهم اتصلت بمحامى قاللى اطلع على القسم اعمل محضر فقد لوحات واطلع على المرور ، ذهبت لقسم الشرطة فى المركز عملت محضر وبعد ما خلص امين الشرطة ادانى رقم المحضر طلبت منه صوره قال ممنوع قلتله طيب همشى ازاى انا مسافر مصر قاللى يا افندم ممنوع دخلت للظابط قاللى ممنوع لأنك اصلا ممنوع تمشى بالعربية لحد ما تجيب النمر الجديده ، طيب اعمل ايه قاللى تروح بعد 5 ايام المحكمة هتاخد صورة مختومة من المحضر وتطلع على المرور التابع له العربية .
المهم سافرت بالعربية وربنا سترها معايا والحمدلله لم اقف فى اى لجنة لمدة اسبوعين الى ان ذهبت للمحكمة واخدت نسخة من المحضر ، ورجعت تانى على القاهرة لمرور حدائق القبة التابع له السيارة .
الاوراق المطلوبة : المحضر - رخصة السيارة - البطاقة الشخصية - نموذج بتشتريه من المرور .
الاجراءات : يتم تسليم الاوراق السابقة والعربية بتدخل فحص وتستلم النمر الجديدة .
ولانى هنقل العربية باسمى عملت اجراءات تانية لانى تابع لمرور عين الصيرة
تم عمل الاتى :
- استخراج شهادة مخالفات من الدراسة .
- عمل فحص بمرور عين الصيرة ثم مطابقة الارقام بمرور حدائق القبة ( لا نحتاج لوجود السيارة ) بالرجوع الى الملف الاصلى للسيارة ومطابقة الارقام .
-استخراج شهادة بيانات موجهه لمرور عين الصيرة ويجب ان يكتب فيها التالى
(لا يطالب باللوحات ، لا يطالب بالرخصة ، لا يطالب بالمخالفات ، لا يطالب بايصال 105 مرور)
- الرجوع لمرور عين الصيرة وعمل التالى :
الذهاب لمهندس الفحص للتوقيع وختم ورق الفحص الذى تم عمل مطابقة له بالمرور الاخر ، وتقديم شهادة البيانات للموظف المختص ومعها عقد بيع وليس توكيل ، وطلب نمر جديدة .
وبعد ذلك يتم استلام النمر الجديدة وتركيبها .
ارجو ان اكون قد افدت الاخوة فى المنتدى أخوكم / سيد جليله