الموضوع: تجربتى مع liqui moly Motor Oil Saver فى اللانوس

بدايةً انا كانت المشكلة عندى فى كاوتش الصباب, و وظيفة كاوتش الصباب انه يقوم باحكام الصباب فى الدليل بتاعه و منع تسريب الزيت من غرفة التاكيهات الى غرفة الحريق بالاسطوانات.
و كانت اعراض المشكلة عند بداية التدوير صباحاً بخروج كمية دخان فظيعة و ريحة زيت محروق (دخان ابيض مائل للزرقة)

طبعاً الحل هو فك وش السلندر و تغيير كاوتش الصباب, لكن بصراحة الواحد كان مكسل و اصلاً مفيش وقت دة غير ان العملية مكلفة حبتين.
سمعت عن منتج من ليكوى مولى لمنع التسريب من الجوانات و كاوتش الصباب و انا طبعاً مش مصدق ان فيه حاجة ممكن تعالج الموضوع.
و بحثت فى منتديات اجنبية متخصصة فى الزيوت فقط و اضافاتها لقيت ان ناس كتير بتشكر فيه و عالج نسب عالية من الموضوع و فعلاً جربته.

اسمه Liqui Moly Motor Oil Saver و سعره 35 جنيه, مش عارف غلى ولا لأ و دى صورته



على حسب كلام ليكوى مولى انه بيضاف لأى نوع زيت و تأثيره بيبان بعد 600 - 800 كم و فعلاً اضفته لكن اللى حصل,
انى شفت تأثيره بعد 200 كم تقريباً و العربية جيت ادورها الصبح الدخنة قلت جامد (تقريباً انعدمت) و مهما ركنت العربية فترة طويلة لأيام ( كل ما تركن اكتر الدخنة المفروض تكتر) برضه الدخنة قلت خالص !

و لكن الحلو ما يكملش , و انا ماشى ع المحور العربية سخنت منى و ماسورة المياه فى المانيفولد اتقطمت و الدنيا اتبهدلت ( طبعاً المنتج مالوش علاقة بالمشكلة دى) و اضطريت انى اغير جوان وش السلندر و غيرت كاوتش الصباب غصب عنى :)

الخلاصة انا مش بنصح الناس انها تلجأ للمنتج دة لو عندها مشكلة كاوتش الصباب, المفروض انك تغيرها, لكن لو مفيش وقت و الماديات معجزة حبتين جربه مش هتخسر حاجة

ملحوظة: المفروض المنتج دة بيعالج مشاكل التسريب من الجوانات و الاويلسيهات المصنوعة من المطاط عموماً مش شرط كاوتش الصباب بس.