الموضوع: إقتراح قومي لتعديل سلوك الناس وتهذيب الأخلاق العامه " جد "

السلام عليكم ورحمة الله وبركاته

صراحه مش عارف أبدأ الكلام ازاي .. خايف الناس تضحك عليه او يقولوا عليه مجنون

على كل حال هقول فكرتي وأمري لله .. وهحاول بقدر المستطاع توضيحها

مقدمه لا بد منها قبل طرح الفكره القوميه :
اولاً : اي دين سماوي نزل هدفه هو تنظيم العلاقه بين البني ادم ونفسه .. وبينه وبين الكائنات الحيه الأخرى .. وبينه وبين الله سبحانه وتعالى

اللي بينك وبين الله .. وبينك وبين نفسك .. دة يضرك انت وحدك وينفعك انت وحدك .. فأنت حر في الحكايه دي

لكن اللي بينك وبين الكائنات الحيه الأخرى .. دة انت مش حر فيه .. لان المنفعه او الضرر على الجميع

يعني ماينفعش تصلي وتصوم .. وتطلع الشارع تشتم في الناس وتجر شكلها .. ما اعتقدش ان ربنا هيتقبل منك صلاتك وانت اخلاقك كدة

انا في اعتقادي والله اعلم ان الشخص اللي اخلاقه حسنه وهو لا يصلي .. افضل عند الله من اللي بيصلي واخلاقه سيئه .. ودة لا يغني عن الصلاه " الصلاة فرض "

" قال صلى الله عليه وسلم: "ما شيء أثقل في ميزان العبد يوم القيامة من خلق حسن، وإن الله ليبغض الفاحش البذيء" أخرجه الترمذي وصححه الألباني "

"إنما بعثت لأتمم مكارم الأخلاق"رواه مالك في الموطأ بلاغاً،
وقال ابن عبد البر هو متصل، ومن ذلك قوله صلى الله عليه وسلم: "ألا أخبركم بأحبكم إلي وأقربكم مني مجلساً يوم القيامة؟ فأعادها ثلاثاً أو مرتين. قالوا: نعم يا رسول الله. قال: "أحسنكم خلقاً" رواه أحمد وجوَّد إسناده الهيثمي .

الفكره :

نكلم بصراحه شديده

احنا شعب يخاف مايختشيش .. ونسبة الجهل عندنا فدادين فدادين .. سوء الأخلاق " ناخد جائزة أوسكار "

بعض المواقف البايخه في الشعب دة " فقط امثله مبسطه "

1- انت راجل محترم قافل عليك باب شقتك في حالك .. جه جيران لك ( مزعجين .. كرهووك في شقتك والعيشه واللي عايشنها ) .. وكلمة مزعجين دي إختصار لأفعال كتيره اوي

2- انت بردو لسه راجل محترم .. وسايق عربيتك زي ما قال الكتاب .. لكن في ناس سايقه جنبك واخدنها فهلوه وعافيه وهو كده

3- انا بحييك علشان انت ما زلت متمسك بإحترامك .. و واقف في الطابور مستني دورك على شباك توزيع عجوه او اي بتنجان في البلد .. وجه عم الخطير المهم المستعجل اللي لازم يدخل قبلك علشان يلحق يدي للواد الرضعه .. ولا علشان هو راكن في الممنوع .. على اساس انك واخد عربيتك في جيبك .

4- نايم في امان الله " مش شرط على فكره نكون بعد نص الليل علشان تبقى نايم " ممكن تكون ظروف شغلك بالليل وبتنام بالنهار .. يا سيدي ولا حتى مش بتشتغل .. من حقك تنام في هدوء وترتاح .. لكن في حد غلس في الشارع عامل دوشه " كلاكس بقى او بينده على حسين كل نص ساعه وحسين يرجع ينده على صلاح وهلم جرا وكأنها طقوس يوميه "

مواقف كتير في حياتنا غلط ومزعجه .. بتضايقنا وبتحرق دمنا وبتقل من راحتنا وتركيزنا ... وبترفع ضغطنا .. ودة في النهايه بينعكس على ادائنا في كل شىء .

الحل ايه ؟ .. الحل " مشروع قومي إجباري لتهذيب الأخلاق .. على غرار مشروع محو الاميه "

لكن دة بقى إجباري .. زي التطعيم كدة وشهادة الجيش

انت بتدخل الجيش مش حباً في الجيش .. انت بتدخله علشان تقفش الشهاده وتقدر تشتغل او تسافر

المشروع دة بردو نفس الفكره

يتعمل دورات تدريبيه بأسلوب معين وتنظيم معين في كل المحافظات والمدن وعلى مراحل

يكون الهدف منه توعيه الناس بالاخلاق والسلوك الحضاري

ويكون حضور الدورات دي اجباري وببطاقة الرقم القومي

بعد انتهاء الدوره لكل شخص .. في امتحان .. للتأكد من ان اخلاقه وسلوكه اتحسن واستوعب العالم الجديد

نجح في الامتحان .. تضاف له الدرجه مع رقمه القومي

دي بقى الزاميه علشان يشتغل .. من غيرها محدش هيشغله .. وكل ما كانت درجته عاليه يبقى دة انسان هيريحنا مش هيتعبنا في الشغل

وتكون مطلوبه في كل حاجه في حياته .. زي البطاقه تماماً

يعني فتح محل عايز يطلع رخصه .. مطلوب شهاده الاخلاق دي

عايز يطلع رخصه عربيه او يبني بينت او يدخل ابنه مدرسه او يأجر شقه اوي اي حاجة في اي حاجه

لازم من ضمن الاوراق " شهادة الاخلاق دي "

وبكدة هنضمن ان العربجي اللي في الشارع .. يجري ويروح ياخد الدوره دي ويكون حريص على انه ينجح . لانه اجلاً ام عاجلاً هيحتاج يعمل مصلحه ويتطلب منه الشهاده دي

دي فكرتي واسف على الإطاله .. وانا شايف ان دة الحل الامثل لتعديل سلوك الشعب " لأن احنا شعب يخاف مايختشيش "