شباب حد معا لانوس فيها غاز !!

**مصطفى-حسن** · 21-02-2013 11:47 PM

المشاركة الأصلية كتبت بواسطة ahmedzizo131

بسم الله الرحمن الرحيم
الله ينور عليك على المعلومات الجامدة دى
الموضوع بصراحة انا اتعرفت على مهندس فى شركة الغاز و قالى انه هيعملهولى استعمال و يكلفى فى حدود 1600 الى 1700 جنيها شامل كل حاجة
و بضمان سنة ذى الشركة
و انا طبيعي بستعمل زيت فيسكو 3000 اخضر غامق
يعنى نحول على ضمنك
و اية اخبار السرعة و هل بتعدل حاجة فى العفشة الخلفية ؟؟؟

اولا بالنسبة للسعر فهو كدة لقطة لو شامل التركيب وفحص الاسطاونة (واوعى تركب من غير ما تعمل فحص للأسطوانة دة امان ليك وب 100ج بس)
خلى بالك الغاز بيكون كامل (اسطوانة+المكسر+ 2جهاز الكترونى مش فاكر اسمهم بالاضافة لشوية رفايع)
ومتنساش الاوراق بتاعة الغاز

ثانيا موضوع ضمان سنة على المستعمل دة انا مستبعدها تماما لان فية اجراءات ورقية تتم في الشركة بناء على صرف مكونات الغاز الجديدة من مخزن الشركة وعلى الاساس دة بيطلع الضمان للغاز الجديد

بالنسبة للزيت هو فيسكو ngv وخلى بالك من ngv لان دة الزيت المخصص للغاز وسعرة 70ج بس مش فاكر بصراحة هو مكتوب علية 3000 ولا لأ لان كل اللى يهمنى انة يكون ngv

بالنسبة للسرعة انا لسة جاى من على الدائرى الشرقى ومروح للعاشر من رمضان وماشى بسرعة 150 عادى جدا وباخد غرز والعربية ثابتة واستجابتها عالية

بالنسبة للعفشة الخلفية لو انت بتحب العربية بتكون عالية عن الارض زى حالاتى فهتروح للعفشجى يركب لك ورا علايتين كوتش 7سم (اعلى حاجة)ومش هياخد منك 20ج مصنعية او 30ج بالكتير اوى وبيركبوا في ربع ساعة

ولو مبتحبش العربية عالية قوى هتركب العلاية اللى اقل منها شوية (حوالى 4 او 5 سم)

بس لو قررت خلاص انك تركب العلاية الكبيرة قوى قولى عشان فية تعديل بسيط اوى وتافة هتعملة في المساعدين اللى ورا (دا لو انت غاوى عربية عالية زى حالاتى)

**مصطفى-حسن** · 21-02-2013 11:56 PM

المشاركة الأصلية كتبت بواسطة hmada9009_99

علشان حضرتك اقليه انما لو اكتر من 40% من العربيات حولت غاز هتقف طابور مش هينتهي

من واقع خبرة 5 سنين مع الغاز طول النهار ممكن يكون ضغط على المحطات بسبب التاكسيات
فانا معود نفسى اشحن غاز بالليل وانا مروح وفى الحالة دى بخش على البنزينة مبقفش ورا عربية

بس على فكرة اللى بيعمل زحمة في البنزينات العادية
اولا ان الخزان بتاع البنزينة بيفضى زى اى خزان (الغاز مافيهوش الكلام دة)
ثانيا ان البنزين بيتباع في جراكن ودة بيفاقم من الازمة (ودة مش موجود في الغاز)
الغاز مبيتقطعش من المواسير نهائى

**midooo_119** · 22-02-2013 09:42 AM

بس انا كنت اسمع ان الغاز بياكل فالموتور و بيقصر فعمره بشكل ملحوظ ياترى الكلام ده ايه مدى صحته

**مصطفى-حسن** · 22-02-2013 02:55 PM

المشاركة الأصلية كتبت بواسطة hmada9009_99

شكرا لحضرتك بس بصراحه بالشرح بتاع الغاز ده يبقى الغاز كويس جدا بس الواحد مستحرم يحول العربيه علشان المكنه بتاعتها خايف لأي سبب تتأثر خصوصا ان معظم المواتير جديده ياعني اصدارات حديثه

المشاركة الأصلية كتبت بواسطة midooo_119

بس انا كنت اسمع ان الغاز بياكل فالموتور و بيقصر فعمره بشكل ملحوظ ياترى الكلام ده ايه مدى صحته

اولا لو انت التزمت بالزيت المخصوص وتنزلة على 3000كيلو وغيار الفلتر مع كل غيار زيت وعدم العبث بصيانة الغاز برة الشركة انا زى ما قلت قبل كدة مشيت بالفيات القديمة اكتر من 130 الف كيلو بدون عمرة

واللانوس دلوقتى معايا بقالها سنة والحياة جميلة
ملحوظة هامة :الصيانة فى شركة الغاز عبيطة جدا المصنعية عندهم بتندرج تحت اسم (امر شغل) ب15ج بس ة يعنى لو حبيت تظبط الغاز فى اى وقت لو عندك اى مشكلة من المشاكل العادية االى ممكن تحصل لاى عربية فى الغاز (ظبط يعنى)

دة غير ان قطع الغيار كلها بتبقى موجودة فى الشركة مش نظام دوخينى يا لمونة فى اللف على المحلات وكلها ايطالى اصلى ومعمرة جدا

ثانيا السبب الرئيسى والوحيد لاستهلاك المواتير هو استخدام نوع زيت غير المعتمد وتغيير الفلتر بعد غيارين او 3 غيارا زيت (توفير يعنى) والسير بالزيت مسافة اكتر من المقرر لة

ثالثا تعالى نحسبها بالراحة
متوسط العمرة للموتور بتكون على 150 الف كيلو
لو افترضنا انك بتحط بنزين 80 ومعدل استهلاك البنزين 9 كيلو للتر (دة المعدل المتوسط)
يبقى انت هتمون بنزين بحوالى 13000ج وكسور
وبعدها هتعمل عمرة

طيب بالنسبة للغاز
هنقول ان العمرة هتكون على 140 الف كيلو مثلا (اقل يعنىمن البنزين)
وبما ان متر الغاز ب 45قرش بيعمل 13 كيلو
يبقى انت هتشحن غاز حوالى 500ج تقريبا هيعملوا معاك ال 140 الف كيلو

طب لو انت بتمون بنزين 90 او 92
احسب بقة الارقام المرعبة وقولى على النتيجة

**hossam_elwani** · 22-02-2013 06:57 PM

المشاركة الأصلية كتبت بواسطة zarif

معايا غاز بقالى 5 سنين
4 سنين فى فيات 132
وسنة فى دايو لانوس 2002
انا هقولك على الخلاصة (الزتونة ) بتاعة موضوع الغاز دة
اولا سعرة جديد كاش حوالى 6500ج تقريبا
وقسط طبعا بيذيد تقريبا بيوصل 8000ج وكسور (الاسعار دى تقريبية)
مستعمل بيتراوح بين 1300ج الى 2000ج
وتلاقية عند الناس بتوع معارض السيارات المستعملة
ولازم يكون معاة الورق بتاعة
اللى هى المخالصة (يعنى لازم يكون خالص مش علية اقساط)
لان لو علية اقساط الشركة مش هترضى تركبة
مصاريف التركيب تقريبا 1000ج (شاملة بقة فحص اسطوانة ومواسير جديدة ووصلات وخراطيم ....الخ)
وعلى فكرة كل دة انت ملكش دعوة بية
انت بتروح الشركة تقعد زى الباشا تشرب شاى وتقريبا كل حاجة بتخلص فى حدود 3 ساعات وتمشى بالعربية غاز
التفويلة ب 6 ج بتعمل معاك حوالى 180 كيلو لو الموتور عادى ومظبوط
ولو الموتور على الشعرة (بقفلة مصنعة)يتعمل حوالى 200 او 210 كيلو
يعنى نقول اللتر ب 45 قرش بيعمل حوالى 13 كيلو تقريبا

تمام كدة

انت كدة ركبت غاز خلاص

ازاى تستمع بالغاز الطبيعى فى سيارتك بدون اى ملاحظات او مشاكل

اولا : اوعى تستخدم اى زيت غير فيسكو ngv ولونة اخضر فاتح
(لأن دة الشركة عاملة مخصوص للعربيات اللى بتشتغل غاز بنزين)
وسيبك من كل الهرى والفتاوى اللى ممكن تسمعها من سواقين التاكسى والميكانيكية

ثانيا : مع كل غيار زيت ارمى الفلتر وركب واحد جديد

ثالثا : اوعى تعمل اى حاجة فى الغاز (صيانة او ما شابة) برة الشركة

بس خلاص
لو عملت اللى انا قولت لك علية دة مش هيكون عندك اى مشاكل على الاطلاق

لان انا لما التزمت بكل دة مشيت بالعربية الفيات 132 اللى كانت معايا 131 الف كيلو متر على مدار 4 سنوات بدون عمرة للموتور ولا يحزنون

دة تقريبا الاطار العام بتاع موضوع تحويل الغاز
ولو عندك اى استفسارات انا فى الخدمة

شكرا على النظره الايجابيه

**مصطفى-حسن** · 22-02-2013 07:19 PM

المشاركة الأصلية كتبت بواسطة ahmedzizo131

بسم الله الرحمن الرحيم
طيب لو انا اشتريته مستعمل
هل لية ورق مطلوب
و اية هو الورق دة
و اية فايدة او استخدم
يا باشا

الورق دة عبارة عن ورقتين لو الغاز اللى هتشترية كان قسط
الورقة الاولى هى ورقة التعاقد بين صاحب الغاز والشركة
والورقة التانية (ودى الاهم) هى المخالصة اللى بتقول ان صاحب الغاز سدد اللى علية للشركة
لان زى ماقلت لك قبل كدة ان الشركة مش هتركب غاز مستعمل الا لما يكون خالص
والورقة التالتة ان صاحب الغاز يعملك مبايعة بالغاز

لكن فى حالة لو الغاز صاحبة كان مركبة كاش يبقى مش هتحتاج غير المخالصة والمبايعة

واتفق معاة ان لو فى اى عيب فى المكونات يخصم من الثمن

على فكرة الغاز الاولانى ليا كان مباشرة من الشركة قسط على الفيات 132
والغاز التانى كان مستعمل للانوس 2002
وبصراحة المستعمل اوفر بكتييرررررررر
وشغال تمام

وعلى فكرة انت لو دورت على غاز مستعمل عند بتوع معارض السيارات المستعملة هتلاقى زى الرز
دة فى حالة لو قريبك اللى انت ذكرتة لم يوفى معك

**hossam_elwani** · 22-02-2013 07:21 PM

المشاركة الأصلية كتبت بواسطة zarif

من واقع خبرة 5 سنين مع الغاز طول النهار ممكن يكون ضغط على المحطات بسبب التاكسيات
فانا معود نفسى اشحن غاز بالليل وانا مروح وفى الحالة دى بخش على البنزينة مبقفش ورا عربية

بس على فكرة اللى بيعمل زحمة في البنزينات العادية
اولا ان الخزان بتاع البنزينة بيفضى زى اى خزان (الغاز مافيهوش الكلام دة)
ثانيا ان البنزين بيتباع في جراكن ودة بيفاقم من الازمة (ودة مش موجود في الغاز)
الغاز مبيتقطعش من المواسير نهائى

كنت عايز اعرف معنى الجمله دى "الخزان بتاع البنزينة بيفضى زى اى خزان (الغاز مافيهوش الكلام دة)"

هل فيه مواسير دايركت لكل محطه ؟؟

وهل الغاز ينفع يركب فى العربيات الحديثه زى الكروز على الرغم من ان دواسة البنزين فيها كهربا مش واير ؟؟