الموضوع: معلومات مفيدة جدا لكل مالكى الصنى الأوتوماتيك-حكايتى مع الفتيس

المشاركة الأصلية كتبت بواسطة midarwish

انا اسمي محمد درويش وانا بشتغل مهندس ميكانيكا و عايز اعرف رقم موبايل البشمهندس سبعاوى الجامد جدا......

و انا عندي نيسان صني 2007
و انا عندي سؤال،هل يوجد اي مؤشر يشير ان شنطة السيارة مفتوحة؟ اصل انا مرة مشيت مشوار بالعربية و بعد ما وصلت اكتشفت ان انا كنت ناسى الشنطة مفتوحة و بعدين فكرت ،قات ازاى العربية مايكونشي فيها اي حاجة تبين ان انا ناسي شنطة العربية مفتوحة طبعا غير اللمبة الي موجودة جوه شنطة العربية ،هل كل النيسان صني الموديل ده كده ولا انا عندي حاجه مش مضبوطة؟؟؟

أعتقد أن علامة لباب بتكون شغالة يعني اكنك تركت باب وتديك إشارة انا كان عندي كدة في الكسل ولما الكبوت بردو يكون مفتوح بس الصني انا مخدش بالي لأني مش بسيب الشنطة خالص مفتوحة وبقفلها وأتأكد أنها اتقفلت

ماشاء الله جهد عظيم ربنا يباركلك انا ناوى اشترى اوتوماتيك الاسبوع دة وربنا يستر

هذه الطريقه في البحث والمحاوله تلو الاخري بدون ملل هي اللي خات اليابان وامريكا ودول اوربا متقدمه
مبدا التقدم في القران
يا ايها الذين امنوا اصبروا وصابروا واتقوا الله لعلكم تفلحون
لان التقدم له بدايه وليس له نهايه

ما شاء الله عليك مجهود رائع وعرض شيق

المشاركة الأصلية كتبت بواسطة sab3aawy

بداية هقول لكم المعلومة وبعدين هبقى اقول لكم انا وصلت لها ازاى

عاجلا ام آجلا سياتى ذلك اليوم الذى يضايقك فيه اداء الجير بوكس فيما يتعلق بالغيارات، حيث ستلاحظ تأخير موعد النقل من الأول الى ثانى احيانا وستلاحظ ان التغيير يتم بنتشة، ستلاحظ وضوح هذة الظاهرة فى الأيام الحارة و/أو عند تشغيل تكييف السيارة، وستلاحظ انها ستتفاقم مع الوقت
قد تظهر هذة الظاهرة بعد سنة او سنتين او خمسة، عموما فحلها بسيط جدا، لكنه مكلف الى حد ما، حيث ان هذة الظاهرة تشير الى بداية نهاية عمر بطارية السيارة، والحل تغيير البطارية فورا، ويفضل تغييرها باخرى جافة ، كما يفضل اختيار بطارية ذات سعة 55 امبير ساعة

اما القصة التى حدثت معى، والتى فضلت الا احكيها الا بعدما انتهى منها واصل لنهايتها واعرف سببها حتى لا يجد الصائدون فى المياه العكرة الذين يهوون التقليل من شأن المنتج المحلى عموما والصنى خصوصا مكان لممارسة هوايتهم فهى كالتالى

بدأت الملحوظة معى منذ حوالى شهرين تقريبا، وهى تتلخص اننى احيانا اشعر بنتشة فى الغيار من الأول الى الثانى او من الثانى الى الثالث بعد ان تكون السيارة قد وصلت لحرارة تشغيل المحرك والجير بوكس المعتادة

بعد مراجعة زيت الفتيس وجدت ان كله تمام ولا مشكلة

كان اول ما خطر على بالى هو تغيير زيت الفتيس، ولذلك قمت بهذا العمل تحت البيت بعد مراجعة كتالوج الصيانة الخاص بالنسخة الأوروبية من السيارة (ألميرا)ومعرفة خطوات التغيير
النتيجة : السيارة يومين كويسة وبعدين رجعت تانى

وسعت دائراة الأبحاث وعثرت على كتالوج صيانة النسخة الأمريكية من السيارةsentra، وبالقراءة وجدت معلومات عن كيفية احساس الفيتيس بموعد النقلة عن طريق الtps ،حيث ان طريقة عمل الفتيس الكترونية تماما تعتمد على مجموعة من الحساسات تنقل معلومات معينة لكارتة اسمها tcu(tarnsmission control unit) وتقوم هذة الدائرة بابلاغ بلوف الفتيس بالنقلات ،وكذلك وجدت معلومات عن كيفية ضبط الtps بدون الاستعانة بجهاز السكانر وذلك باداء خطوات معينة باستخدام مفتاح السيارة(كتبت عنها فى موضوع سابق)
قمت بضبط الtps وبرغم ذلك لم يتحسن الوضع كثيرا

المزيد من البحث فى كتالوج النسخة الأمريكية ساعدنى فى العثور على اسلوب لضبط الtps ميكانيكيا عن طريق تهوية صواميل ربط الtps وتحريكه ملييمتر او ملليمترين فى اتجاه عقارب الساعة او عكس عقارب الساعة لضبط نقطة السلانسيه ونقطة فتح البلف على الآخر(وهما النقطتان اللاتى يستخدمهما الفتيس لتحديد النقل العادى والكيك دوان) ، جربت اوضاع عديدة لكن بدون تحسن كبير

هنا جربت مرحلة اخرى من البحث فى منتديات نيسيان فى امريكا مستخدما مفاتيح بحث nissan,auto transaxle,shifing,problem,jerk ووجدت عدد من المالكين للسنترا والماكسيما والمورانو وحتى الانفينيتى لديهم مشاكل مشابهة(يعنى مش مشكلة تقفيل محلى ) ،ووجدت الخبراء هناك يتحدثون ان هذة المشكلة تحدث بسبب منسوب الزيت(ده اول حاجة انا تاكدت منها طبعا) او بسبب ضبط ال tps (عدينا المرحلة دى) او بسبب ان فيه قطعة اسمها dpop resistanse ممكن تكون فيها مشكلة، وبالتالى ابتديت ادور ورا الدروب ريزيستانس دى ، وهل هى موجودة فى موديلاتنا ولا لأ، بالفعل وجدتها ، وهى عبارة عن مقاومة كهربائية بسيطة جدا زى اللى كنا بندرسها فى المدرسة الأعدادية وظيفتها ضبط التيار الداخل لبلوف الفتيس ، مكانها فى السيارة داخل حوض الموتور داخل غلاف بسيط من الصاج ومربوطة بمسمارين 10 فى علبة الشاسيه بتاعة العربية ورا الفانوس الشمال وعلى شمال البطارية، يمكن ملاحظتها بسهولة لو بصيت على ماسورة الهواء البلاستيكية اللى داخلة لفلتر الهواء، فى نصها هتلاقى تفريعة مسدودة طالعة لفوق كدة على شكل عكاز، هى على شمال التفريعة دى ، المهم انا قريت عن المقاومة دى انها لما بتسخن قيمتها بتعلا وبالتالى التيار اللى رايح للبلوف بتاعة الفتيس بيقل وده بيسبب النتشة ، وهنا قررت انى اعمل اضافة عجيبة شوية للسيارة وهى مروحة صغيرة تقوم بالتهوية على المقاومة المذكورة ، قمت ببحث سريع فى مكونات اجهزة الكومبيوتر فى محلات باب اللوق ووجدت ان كل مراوح البروسيسور الصغيرة ومراوح الباور سابلاى الأكبر حجما المعروضة فى المحلات تعمل على 12 فولت وبالتالى هى مناسبة لبطارية السيارة ، اشتريت مروحة بروسيسور وقمت بتثبيتها امام المقاومة بشريط معدنى من ذلك النوع الذى يستخدم مع كاسيتات السيارات وحصلت على مصدر كهربى لها من غرفة المحرك(حكيت عن قصة المصدر الكهربى ده فى رسالة سابقة عنوانها "للحصول على مصدر كهربى يعمل مع مفتاح السيارة") ، النتيجة كانت لا بأس بها لكن لم تحل المشكلة بشكل نهائى، قمت باستبدال المروحة بمروحة اكبر(بتاعة باور سابلاى) وبرضه فيه تحسن لكن غير مبهر

هنا قمت بشئ آخر، فكيت المقاومة من السيارة وقمت بقياسها على الآفوميتر ، ووجدت انها حوالى 12 أوم، وقمت ببحث سريع على الانترنت لأعلم انها تتحمل حتى 10 وات ، هنا ذهبت لشركة مأمون للألكترونيات والموجودة فى شارة الأهرام بمصر الجديدة والمتخصصة فى توريد مكونات الداوئر الالكترونية واشتريت مقاومة مماثلة (مقاومة سيراميك بقيمة 12 أوم وقدرة 10 وات ) ، ثمنها كام........جنيه واحد(يا ترى قطعة الغيار دى تمنها كام فى التوكيل) وفمت بعمل heat sink (طارد حرارة-مشط) لها ،استعملت فيه heat sink خاص ببروسيسور كومبيوتر قديم كان لدى(لا ارمى هذة الأشياء ابدا-بيجيلها يوم وتنفع) وركبتها مكان المقاومة الأصلية، برضه الأداء لم يختلف كثيرا

فى تلك الاثناء ومع تركيزى مع الظاهرة حاولت ان الاحظ متى تحدث، لاحظت انها تحدث بشكل متكرر لما بكون مشغل التكييف، وتحدث قليلا جدا لما اكون طافى التكييف، تقريبا لا تحدث صباحا ، لكن تحدث بشكل اكبر اثناء العودة للمنزل آخر اليوم
بالطبع فان تفكيرى اتجه فى البداية للسخونة لأن تشغيل التكييف يتسبب فى قيام المروحة بتبيريد التكييف والردياتير وتضخ كمية كبيرة من الهواء الساخن لغرفة المحرك مما يتشبب فى سخونة المقاومة وهذا دفعنى الى القيام بعمل اكثر من فكرة لمسارات هواء قمت بتشكيلها بالكرتون لكى تضخ هواء بارد للمروحة، ومع ذلك فالنتيجة لم تكن عظيمة
كان اخر شئ قمت به هو قياس المقومة وهى ساخنة، لأجد اناه لم تتغير كثيرا عن 12 أوم ، وهنا كان لابد من استبعاد فكرة السخونة

هنا وكما يهبط شيطان الشعر على الشعراء هبط على الالهام فجأة، تعلمنا فى المدرسة الاعدادية ان التيار يساوى الجهد على المقاومة، فلو افترضنا ان مشكلة الجيربوكس ان التيار الذاهب للفتيس اقل مما ينبغى وحيث اننا تأكدنا ان المشكلة ليست من ارتفاع المقاومة ، يبقى المشكلة ممكن تكون من انخفاض مصدر الجهد وهو فى حالتنا البطارية ، قمت بقياس جهد البطارية فى حالة التحميل وعدم التحميل وفى حالة تدوير السيارة وعدم تدويرها ، كانت قراءات البطارية عادية ، لكن بالطبع لم استطع قياس اداء السيارة فى لحظة الغيار لأنى بكون سايق العربية ساعتها، عضد فكرتى ايضا ان ظهور المشكلة مع التكييف ، وكذلك ظهورها بدون تكييف فى آخر اليوم يساوى ظهورها لحظة تشغيل مراوح الردياتير التى تضع احمال عالية على البطارية

هنا فكرت فى تبديل بطارية السيارة الريجاتا(55 أمبير-جديدة عمرها 5 شهور فقط) مكان بطارية الصنى، وواجهتنى مشكلة بسيطة هى ان اقطاب بطارية الريجاتا معكوسة بالنسبة لبطارية الصنى، فيما لا يسمح بتوصيل الأقطاب، تغلبت على هذة المشكلة عن طريق فك بطارية الريجاتا مع سلك الأرضى الخاص بها واستعماله كوصله تطويل لبطارية الصنى(حتى لحظة كتابة هذة السطور تقف السيارة الريجاتا لا حول لها ولا قوة بدون سلك ارضى :) )

وبعد تركيب البطارية وتجربة السيارة لمدة يومين انتهت ولله الحمد المشكلة تماما مما اكد لى انها حدثت بسبب اضمحلال اداء بطارية الصنى

ودى كانت حكايتى مع الفتيس، بقى لى منها فقط حل مشكلة السيارة الريجاتا التى تحتاج الى سلك ارضى لكى تتحرك

(ياريت يا جماعة اللى ناوى يرد رد له علاقة بموضوع ان المنتج المحلى زفت وقطران وان الصنى عربية مالهاش لازمة من اصله يعفينى من قراءة رده الكريم ومن مجهود انى ارد عليه)

السلام عليكم ورحمة الله وبركاته
بصراحه عجبنى فيك حاجتين
إصرارك على حل المشكلة
حبك لمصر

بالتوفيق وجزاك الله كل خير

والله العظيم روعة تسلم ايدك