الموضوع: أعوذ بالله من الشيطان الرجيم

حكاية كل سنة.. دخول رمضان و محاولة إستعداد الناس إيمانيا لرمضان و تذكير بعضهم و أنفسهم بالذكر و الطاعات.. ييجي إبليس طبعا مش عاجبه.. يقوم يشعلل خناقات و خلافات و يكبر حاجات في دماغ ناس عشان يهاجموا بعض و ما يسكتوش و يتخانقوا وينشغلوا بالخناق عن الاستعداد لرمضان.

ده اللي انا وصلت له بعد حوالي 7 سنوات في المنتديات.. كل سنة ده بيحصل بالحرف.. في الأول ما كنتش باخد في بالي.. انما سنة ورا سنة و بالرجوع لتاريخ الخناقات الكبيرة اللي كانت بتحصل في المنتدى (منتدى تاني بقالي فيه 6 سنين مش نايل موتورز يعني) بالاقي ان تواريخ معظم الخلافات الشديدة يرجع لشهر شعبان.. صدقا والله مش مبالغة، لأ وكمان في محيط اللي اعرفهم بلاقي سوء التفاهم و الخلافات بين الأزواج كمان بتكتير اوي في الوقت ده.. خصوصا بالنسبة للناس اللي فارق معهم دخول شعبان و قرب حلول شهر رمضان.

بس أرجع و أقول مش بالضرورة هو ده السبب الرئيسي للخلافات.. بالتأكيد فيه أسباب تانية و كل حد على خلاف مع حد تاني ربما كانت له أسبابه الوجيهة للخلاف.. بس محتاجين نفطن لحاجة زي دي و ان ممكن يكون وسوسات الشيطان بتوجه ردود أفعالنا اتجاه تاني ممكن ما نكونش من اللي بيتجهوا له لو مش واقعين تحت وسوسة الشيطان.

انا مش باقول اننا واقعين تماما تحت سيطرة الشيطان و بنمشي مسلوبي الإرادة.. احنا بالتأكيد أقوى منه و الله سبحانه و تعالي يقول "إن كيد الشيطان كان ضعيفا".. انما برضه ماننساش اننا بنتعامل مع عدو مافيش وراه غير إثارة العداوة و البغضاء بين المؤمنين و إبعادهم عن الطاعات و واخد عهد على نفسه بكده قدام ربنا.. يعني الشغلانة اللي هو مكرس نفسه ليها دي فول تايم.. ما بيشتغلش شغلانة تانية بعد الظهر مثلا.. ده احنا شغلته و متفرغ لنا تماما

محتاجين بس ناخد بالنا و ما ننساقش ورا انفعالاتنا و نقول في الوقت الصح: أعوذ بالله من الشيطان الرجيم و نستشعر قوتها و نستشعر اوي احنا بنستعيذ بمين.. بنستعيذ بالله جل و علا.. ساعتها هانحس أوي أد ايه الشيطان ده ضعيف أوي قدام استعاذتنا بالله.. و كل سنة و انتوا طيبين

هو ده فعلا وقته اننا نقول كلنا أعوذ بالله من الشيطان الرجيم.