الموضوع: مين من الاعضاء عايش فى عمان

السلام عليكم
انا عايش في عمان من أخر 2006
وفضلي سنه تقريباً وننزل مصر إن شاء الله نهائي
بالنسبة لاأسعار هنا في مجملها الوقتي بعد الغلاء في مصر الأسعار أفضل من مصر وارخص شوية وجودة المنتجات والخدمات أفضل من مصر بكتير، كفاية انك مابتدفعش اي بقشيش او اي زيادة عن سعر السلعة او الخدمة اللي بتحتاجها
والحياه هادية جداً هنا هاتحس انك في فترة نقاهة بعد الطحنة اللي في مصر والزحمة
يعني ممكن تخلص تجديد رخصة العربية وتستلمها من المرور في حدود 15 - 30 دقيقة لو زحمة و 30 - 60 دقيقة في تجديد الإقامة واستخراج البطاقة
لو انت هاتعيش في عمان انت والعائلة وفي بلد تانية غير مسقط العاصمة فممكن تصرف من 500 إلى 700 ريال عماني، ده لو عندك ولدين تلاتة وفي المدارس الهندي مثلا وفيه ناس ممكن تصرف أقل من 350 ريال، كل ده يرجع ليك انت وطبيعة معيشتك
لكن لو في مسقط الأسعار هاتزيد 200 ريال على الأقل علشان فرق تكلفة السكن واغراءات الخروج والتسوق

بس لو لوحدك طبعا هاتقل التكلفة كتييييير
ممكن تصرف في حدود 200 ريال بس في حالة مشاركة السكن مع أخرين ولو انت حريص شوية
ولو السكن على الكفيل التكلفة هاتقل كمان عن كدة
الأكل هنا بقى أرخص من مصر وخصوصا اللحمة والدجاج والفاكهة بس الخضار ممكن يكون أغلى شوية بس مش كتير ومش في كل اوقات السنة
والملابس هنا أحسن وأرخص من مصر
بالنسبة للمواصلات مش هاقدر افيدك قوي لأني معايا العربية ومابستعملش المواصلات خالص تقريباً

وربنا يوفقك لما فيه الخير ليك وللعائلة
بس بصراحة العيشة هنا حلوة قوي وهاتحس بفرق المعاملة عن مصر وخصوصاً الشعب هنا طيب جداً زيادة عن اللزوم، واحتمال تتخض في الأول من المعاملة الكويسة قوى مع العمانيين خصوصاً خارج مسقط وخاصة لو ربنا وفقك وكنت بتتعامل مع ناس بتحب المصريين، ودول كتبر جداً خارج مسقط
هاتبقى مش عاوز تنزل الأجازة لمصر أخر السنة
وفي الأخر هاتتمنى انك لو تعرف تاخد الجنسية العمانية وده طبعا شبه مستحيل