الموضوع: الشيخ حسن الحسيني يقتحم وكر دعارة تونس.. وحصلت المفاجأة !!

naser_56: نعم هي ياصديقي....والله لقد ابكت قلبي وكنت هيحصلي حاجة من هول ما حدث لها........مش ممكن دي تكون تصرفات بني ادم فما بالك بأنه مسلم؟ فما بالك بأنه داعية إسلامي ينصح الناس ليلا ونهاراً؟ والمشكلة ان ابوها داعية سعودي يعني من بلد الرسول. ما علينا الله يرحم البنت وينتقم من ابوها اشد انتقام ان شاء الله.

متعلموش حاجة من مداعبة وتربية النبي لأبنائه؟ مقروش في الكتب عن كيف كان النبي يداعب احفاده ويلعب معهم في عصر كان أهله يعتقدون فيه أنمن يداعب أولاده يعتبر رقيق القلب ضعيف الشخصية؟




-----

شيخ خالد :

انا واثق ان نية الشيخ خالد في ردوده هنا هي فعلا نابعة من غيرته على الحق ومعنديش شك إطلاقاً في كدا والله أعلم بالنيات.

لكن المشكلة ان الشيخ خالد فاكر الناس كلها زيه بتحب الله عز وجل وبتنصح لوجه الله، للأسف يمكن مشافش النماذج اللي بتستغل الدين لأغراض واهداف تانية مع انهم موجودين حوالينا في كل حتة في البلد.

والله ياشيخ خالد اني بحبك في الله ، واكيد بين القلوب مرسال ان شاء الله وانت عارف.وارجو ان كلامي ميزعلكش.

لكن هذه المرة؟ انت على باطل والله أعلم.

ليه؟

1- لو أن الرجل يريد فعلا انه يعمل خير، لكان نصحهم بدون كاميرات ياشيخ خالد، ينفع نروح انا وانت ننصح واحدة انها تبطل الزنا ياشيخ خالد ونصور كلامها ونصور نفسنا واحنا بنجري وراها ونقولها حرام حرام؟ هو دا النصح ياشيخ خالد؟حتى لو خبى وشها فهل دا حلال ياشيخ خالد؟ النصح نروح لمنطقة غريبة ونصور أهلها ونقول عليهم زناة ويرتكبوا الفاحشة وننزل الفيديو للعالم كله يتفرج عليه؟ بالله عليك ياشيخ خالد هي دي النصيحة والعمل الخير؟

ياشيخ خالد انت سيد العارفين وانت اعلم مني، ان النصح في العلم فضيحة ياشيخنا، والله مافعله هذا الرجل هو أنه اساء لهؤلاء النسوة اساءة بالغة واساء لأهل تونس كلهم.

وسيدنا علي وموقفه معروف للكل :


قال رجل لعلي بن أبي طالب رضي الله عنه أمام الناس : يا أمير المؤمنين : إنك أخطأت في كذا وكذا ، وأنصحك بكذا وبكذا ، فقال له علي رضي الله عنه :" إذا نصحتني فانصحني بيني وبينك ، فإني لا آمن عليكم ولا على نفسي حين تنصحني علناً بين الناس "

او كما حدث بنصه....

2- ثانيا ياشيخ خالد، لنفرض انه نيته خير، هل الناتج عن تصرفه خير؟ بالطبع لا.

بالعكس!!، عرف بعض الناس في تونس مكان الوكر دا ومش بعيد يروحوه بعد كدا، واللي مكنش يعرف ان تونس فيها دعارة اهو عرف ياشيخ خالد واتفضحوا قدام العالم والانترنت مش هيبقى ليه شغلانة غير الموضوع دا و هيكتب ان تونس بلد الدعارة وبص على التعليقات عاليوتيوب وهتلاقي فعلا ان بعض الشباب بدأ يدخل يشتم بعضه، والتوانسة متدايقين جدا لانهم فهمو انه يريد التشهير بنسائهم والموضوع بقى حرب شتايم والكل بيشتم في الكل. واصبر لحد اسبوعين كدا وهتشوف كمان تصعيدات ومين عارف ايه هيحصل كمان!

ووالله لهم كل الحق، لانه لو شيخ عمل كدا في مصر هنلومه وكان اولى عليه ينصح أهله. ياشيخنا انت سيد العارفين انه النصح للأقربون أولى.

لماذا لم ينصح نساء بلده أولاً؟ الا يوجد في بلده دعارة؟ معقولة بلده خالية من الدعارة ورايح لحد تونس اقصى الغرب العربي عشان ينصحهم؟

طب بلاش....دي

ولله المثل الأعلى طبعا ، رسول الله صلى الله عليه وسلم، عندما بدأ الدعوة، هل دعا أهل مكة أولا أم دعا قوم يثرب؟ بدأ بأهله يا شيخنا وبدأ بأهل مكة ياشيخنا، وبعد كدا دعا باقي المدن .

3- ثالثا ياشيخ خالد تخيل رد فعل النسوة؟ رجل جاء بالكاميرات من الخليج لكي يصور كلامهم وينصحهم امام الكاميرات، فهل سيصدقون دعوته؟ الم ترى رد فعل السيدة التي قالت له انت من الخليج لديكم النفط الخ الخ....؟ يعني هل فعلا هو يريد نصحهم؟

4- كان لازم نشوف دموعه وهو بيعيط مثلاً؟ يعني كان لازم يتصور وهو بيعيط وتنزل؟ طيب. الا تشعر ياشيخنا ان الموضوع لغرض الشو الاعلامي؟

هل لاحظت كلمة يا اهل الخير انقذوا نساء تونس؟ هل لاحظت ياشيخنا الجملة؟ نســــــــــــاء تــــــــــونـــــــــس؟ هل لاحظتها ياشيخنا؟

ارجو انك ترد على كلامي ياشيخ خالد، ربما انا على باطل فتصحح لي، او انك على باطل وانا صححت لك فنكون ان شاء الله من الناصحين فعلاً وعملاً ونكون نعم الاخ لأخيه .


وياجماعة براحة شوية الشيخ خالد من الاعضاء القدامى المحترمين هنا ومعروف انه من اكثر الناس احتراما وغيرة على الدين ونيته معروفة يعني دفاعه دفاع عن مبدأ وليس عن شخص الرجل....


واخر كلامنا اللهم صلي على سيدنا محمد النور الذاتي و السر الساري في سائر الاسماء و الصفات وعلى آله وصحبه وسلم تسليما كثيراً.