الموضوع: عيب غريب جدا فى درجة حرارة لانوس ! رجاء المساعدة !

المشاركة الأصلية كتبت بواسطة batviser

استاذ msobhy .... ممكن تقولى كانت الاعراض عندك ايه ؟
و تغيير الترموستات دى بيتعمل ازاى و هل لازم افك ترس الكامه ؟؟؟ و بياخد وقت قد ايه و مصنعيه كام .. يعنى شوية تفاصيل كده يا باشا ...

الاعراض كالتالى
طول ما انت أقل من 100 كيلو العربيه مظبوطه على الشعره - لو مشيت فتره متواصله تزيد عن 5 دقائق تلاقى فوق ال 100 كيلو المؤشر يبدء يعلى لفوق - لو مشيت فوق ال 140 العربيه بتسخن بجد وملهاش حل غير انك تنزل بالسرعه

تحليلى للموضوع ان الترموستات مش بتفتح بنسبة 100% وعليه لما بتفتح - بتفتح بنسبه بسيطه وعليه دورة الميه بتبقى ضعيفه بين الموتور والريدياتور

طريقة التغيير
والله يا باشا انا عارف انك بتحب تشتغل بإيدك - نسبيا زيى لكن انا خفت أعملها - لكن انت اعلى منى فى النقطه ديه وأعتقد انك ممكن تعملها لواحدك

انا صبرت عليها وعملتها مع تغيير مجموعة السيور - لأن كنت من هواة انى اعمل كذا حاجه فى نفس الوقت - سير كاتينه + بلية كاتينة + بلية تكيف + سير تكيف + كوعه + ترموستات + جوان الترموستات (بلاش سيلكون زى ما غلب الناس بتعمل - هات الجوان ال gm وسعره غالى جدا - 2 جنيه)

أولا يفضل تغير الكوعه معاك بالمره - لازم الكوعه والترموستات تكون gm ولازم تتأكد انك شغال بسيلكون حرارى
ثانيا للأسف لازم تفك سير الكاتينة وتحل ترس الكامه
ثالثا تفك كوعة الميه وسواء كانت سليمه أو غير سليمه - غيرها
رابعا هاتلاقى الترموستات جوه الكوعه هاترمي الكوعه القديمة بالترموستات وتركب الترموستات الجديده اللى راكب عليها الجوان جوه الكوعه الجديده
خامسا انا متأكد أن حضرتك أقدر وأشطر منى بكتير فى النقطه ديه بس علشان لو فيه أى عضو من الاعضاء هايعملها - لازم تصنفر مكان الكوعه القديم كويس (اللى على الموتور) وبعدها تنظفها كويس - بعد كده حط كمية سليكون بسيطه (تقريبا بسمك نص مللى) على مكان تركيب الكوعه - نفس القصه تحط سيلكون على الكوعه نفسها فى مكان تركيبها على الموتور وليس على مكان الخرطوم - تسيبهم 5 دقائق بدون تركيب وبعد كده ركب وان شاء الله هاتلاقى الدنيا بقت زى الفل

بخصوص التكلفه - عند اى ميكانيكى محترم - من 50 الى 100 - عند واحد صاحبنا هايقولك 200 جنيه ومع ان تكلفتها 3000 جنيه بس انا عملت معاك واجب ونخليها 200 جنيه بس